Read Ang Bagong Ang Biblia Leviticus 7 Bible Online

Leviticus 7 - Ang Bagong Ang Biblia bible

Leviticus 7

¹ "Ito ang batas tungkol sa handog para sa budhing maysala: ito ay kabanal-banalan.

² Sa dakong pinagpapatayan nila ng handog na sinusunog ay doon papatayin ang handog para sa budhing maysala at ang dugo niyon ay iwiwisik niya sa palibot ng dambana.

³ Lahat ng taba nito ay ihahandog; ang buntot na mataba at ang taba na bumabalot sa lamang loob,

⁴ at ang dalawang bato at ang tabang nasa mga iyon na nasa mga balakang, at ang lamad na nasa ibabaw ng atay na iyong aalisin na kasama ng mga bato.

⁵ Ang mga iyon ay susunugin ng pari sa ibabaw ng dambana, isang handog sa PANGINOON na pinaraan sa apoy; ito ay handog para sa budhing maysala.

⁶ Bawat lalaki sa mga pari ay kakain niyon; ito ay dapat kainin sa dakong banal.

⁷ Kung ano ang handog pangkasalanan ay gayundin ang handog para sa budhing maysala, ang dalawa'y may iisang batas. Ang pari na gumawa ng pagtubos sa pamamagitan nito ay siyang tatanggap nito.

⁸ Ang paring naghahandog ng handog na sinusunog ng sinumang tao ay siyang magmamay-ari ng balat ng handog na sinusunog na inialay.

⁹ Bawat butil na handog na niluto sa hurno, at lahat na inihanda sa kawali, mapupunta sa pari na naghahandog niyon.

¹⁰ Ngunit bawat butil na handog na tuyo o hinaluan ng langis ay pantay-pantay na paghahatian ng lahat ng anak ni Aaron.

¹¹ "Ito ang batas tungkol sa alay na mga handog pangkapayapaan na ihahandog sa PANGINOON.

¹² Kung ihahandog niya iyon bilang pasasalamat, ihahandog niyang kasama ng alay ang mga maninipis na tinapay na walang pampaalsa na hinaluan ng langis, mga munting tinapay na hinaluan ng langis, at manipis na tinapay na gawa sa magandang uri ng harina na hinaluan ng langis.

¹³ Ihahandog niya ang kanyang alay na munting tinapay na walang pampaalsa kasama ng alay na handog pangkapayapaan para sa pasasalamat.

¹⁴ At mula sa mga iyon, siya ay mag-aalay ng isang tinapay sa bawat handog, bilang isang handog sa PANGINOON; ito ay mapupunta sa paring magwiwisik ng dugo ng mga handog pangkapayapaan.

¹⁵ Ang laman ng handog pangkapayapaan bilang pasasalamat ay kakainin sa araw ng paghahandog nito; hindi siya magtitira nito hanggang sa umaga.

¹⁶ Ngunit kung ang alay na kanyang inihahandog ay isang panata o kusang-loob na handog, ito ay kakainin sa araw ng kanyang paghahandog; at sa kinaumagahan ay kanyang kakainin ang nalabi rito;

¹⁷ subalit ang nalabi sa laman ng alay sa ikatlong araw ay susunugin sa apoy.

¹⁸ Kung kakainin sa ikatlong araw ang alinmang bahagi ng laman ng alay na handog pangkapayapaan, ito ay hindi tatanggapin. Ito ay hindi ibibilang sa kanya na naghahandog niyon; ito ay magiging kasuklamsuklam, at ang taong kumain nito ay magkakasala.

¹⁹ "Ang laman na mapasagi sa anumang bagay na marumi ay hindi kakainin; ito ay susunugin sa apoy. Tanging ang lahat na malinis ang makakakain ng gayong laman.

²⁰ Ngunit ang taong kumakain ng laman ng alay na mga handog pangkapayapaan na para sa PANGINOON na nasa maruming kalagayan ay ititiwalag sa kanyang bayan.

²¹ Kapag ang isang tao ay humipo sa anumang maruming bagay, maging ng dumi ng tao, o ng hayop na marumi, o anumang kasuklamsuklam, at pagkatapos ay kumain ng laman ng alay na mga handog pangkapayapaan na para sa PANGINOON, ang taong iyon ay ititiwalag sa kanyang bayan."

²² Ang PANGINOON ay nagsalita kay Moises, na sinasabi:

²³ "Sabihin mo sa mga anak ni Israel, huwag kayong kakain ng anumang taba ng baka, ng tupa, o ng kambing.

²⁴ Ang taba ng namatay sa kanyang sarili, at ang taba ng nilapa ng hayop, ay magagamit sa anumang paggagamitan, ngunit sa anumang paraan ay huwag ninyong kakainin.

²⁵ Sapagkat sinumang kumain ng taba ng hayop na iyon kung saan ang handog ay pinaraan sa apoy para sa PANGINOON, ay ititiwalag sa kanyang bayan.

²⁶ At huwag kayong kakain ng anumang dugo maging ng ibon o ng hayop, sa lahat ng inyong tahanan.

²⁷ Sinumang kumain ng anumang dugo ay ititiwalag sa kanyang bayan."

²⁸ Ang PANGINOON ay nagsalita kay Moises, na sinasabi:

²⁹ "Sabihin mo sa mga anak ni Israel, Ang naghahandog sa PANGINOON ng handog pangkapayapaan ay magdadala sa PANGINOON ng handog na mula sa kanyang mga handog pangkapayapaan.

³⁰ Ang kanyang sariling mga kamay ang magdadala sa PANGINOON ng mga handog na pinaraan sa apoy; dadalhin niya ang taba kasama ang dibdib upang iwagayway bilang handog na iwinawagayway sa harapan ng PANGINOON.

³¹ Susunugin ng pari ang taba sa ibabaw ng dambana, subalit ang dibdib ay magiging kay Aaron at sa kanyang mga anak.

³² At ang kanang hita ay ibibigay ninyo sa pari bilang handog mula sa alay ng inyong mga handog pangkapayapaan.

³³ Ang anak ni Aaron na naghahandog ng dugo ng mga handog pangkapayapaan at ng taba ang tatanggap ng kanang hita bilang bahagi.

³⁴ Sapagkat aking kinuha sa mga anak ni Israel, sa kanilang mga alay na mga handog pangkapayapaan, ang dibdib na iwinagayway at ang hitang inialay, at aking ibinigay sa paring si Aaron at sa kanyang mga anak, sa pamamagitan ng isang walang hanggang bahagi na nauukol sa kanila, mula sa mga anak ni Israel.

³⁵ Ito ang bahagi ni Aaron at ng kanyang mga anak mula sa mga handog na pinaraan sa apoy para sa PANGINOON, nang araw na sila ay buhusan ng langis upang maglingkod bilang mga pari ng PANGINOON;

³⁶ iniutos ng PANGINOON na ibibigay sa kanila sa araw na kanyang buhusan sila ng langis mula sa mga anak ni Israel. Ito ay isang walang hanggang tuntunin sa buong panahon ng kanilang salinlahi."

³⁷ Ito ang batas tungkol sa handog na sinusunog, sa butil na handog, sa handog pangkasalanan, sa handog para sa budhing maysala, sa pagtatalaga, at sa mga handog pangkapayapaan,

³⁸ na iniutos ng PANGINOON kay Moises sa bundok ng Sinai, nang araw na iniutos sa mga anak ni Israel na kanilang dalhin ang kanilang mga handog sa PANGINOON sa ilang ng Sinai.