Read Ang Bagong Ang Biblia Lamentations 5 Bible Online

Lamentations 5 - Ang Bagong Ang Biblia bible

Lamentations 5

¹ Alalahanin mo, O PANGINOON, kung ano ang nangyari sa amin. Iyong masdan, at tingnan ang aming kahihiyan!

² Ang aming mana ay ibinigay sa mga dayuhan, ang aming mga bahay ay sa mga taga-ibang bayan.

³ Kami ay naging mga ulila at walang ama; gaya ng mga balo ang aming mga ina.

⁴ Dapat kaming magbayad sa tubig na aming iniinom, dapat naming bilhin ang kinukuha naming kahoy.

⁵ Ang mga humahabol sa amin ay nasa aming leeg; kaini ay pagod na, wala kaming kapahingahan.

⁶ Sa mga taga-Ehipto, kami ay nakipagkamay, at sa mga taga-Asiria upang makakuha ng sapat na tinapay.

⁷ Ang aming mga ninuno ay nagkasala at wala na; at kami ay nagpapasan ng mga kasamaan nila.

⁸ Mga alipin ang namumuno sa amin, walang magliligtas sa amin sa kanilang kamay.

⁹ Nalalagay sa panganib ang aming buhay upang makakuha ng tinapay, dahil sa tabak sa ilang.

¹⁰ Ang aming balat ay kasing-init ng pugon, dahil sa nagniningas na init ng taggutom.

¹¹ Ang mga babae sa Zion ay ginahasa nila, ang mga dalaga sa mga bayan ng Juda.

¹² Ang mga pinuno ay ibinitin sa kamay nila, hindi iginagalang ang matatanda.

¹³ Ang mga binata ay pinagtrabaho sa gilingan, at sa bigat ng kahoy ang mga bata ay nagpasuray-suray.

¹⁴ Iniwan na ng matatanda ang pintuang-bayan, at ang mga binata ang kanilang mga tugtugan.

¹⁵ Ang kagalakan ng aming puso ay huminto na, ang aming pagsasayaw ay napalitan ng pagluluksa.

¹⁶ Nahulog mula sa aming ulo ang korona; kahabag-habag kami, sapagkat kami'y nagkasala!

¹⁷ Dahil dito ay nagkasakit ang aming puso, dahil sa mga bagay na ito ang mga mata nami'y lumabo;

¹⁸ dahil sa bundok ng Zion na nawasak, ang mga asong-gubat ay pagala-gala roon.

¹⁹ Ikaw, O PANGINOON, magpakailanman ay naghahari, ang iyong trono ay nananatili sa lahat ng salinlahi.

²⁰ Bakit mo kami nililimot magpakailanman, bakit mo kami pinababayaan nang kaytagal?

²¹ Ibalik mo kami sa iyo, O PANGINOON, Upang kami ay makapanumbalik! Ibalik mo ang aming mga araw na gaya nang una.

²² Talaga bang kami'y iyo nang itinakuwil? Ikaw ba ay lubhang galit na galit sa amin?