Read Ang Bagong Ang Biblia Ezekiel 27 Bible Online

Ezekiel 27 - Ang Bagong Ang Biblia bible

Ezekiel 27

¹ Bukod dito'y ang salita ng PANGINOON ay dumating sa akin, na sinasabi,

² "At ikaw, anak ng tao, managhoy ka para sa Tiro;

³ at sabihin mo sa Tiro na naninirahan sa pasukan sa dagat, ang mangangalakal ng mga bansa sa maraming pulo, ganito ang sabi ng Panginoong DIYOS: "O Tiro, sinabi mo, 'Ako'y sakdal sa kagandahan.'

⁴ Ang iyong mga hangganan ay nasa kalaliman ng mga dagat; ginawang sakdal ang iyong kagandahan ng iyong mga tagapagtayo.

⁵ Ang lahat mong mga tabla ay mula sa mga puno ng abeto na mula sa Senir; sila'y nagsikuha ng sedro mula sa Lebanon, upang gumawa ng palo para sa iyo.

⁶ Ginawa nilang iyong mga sagwan ang mga ensina sa Basan; kanilang ginawang mga bangko ang mga puno ng pino mula sa mga pulo ng Chittim na balot ng garing.

⁷ Pinong telang lino na may burda mula sa Ehipto ang iyong layag na nagsisilbing iyong watawat; kulay asul at ube mula sa mga pulo ng Elisha ang iyong karang.

⁸ Ang mga naninirahan sa Sidon at Arvad ay iyong mga tagasagwan; ang iyong mga pantas na lalaki, O Tiro, ay nasa iyo, sila ang iyong mga piloto.

⁹ Ang matatanda sa Gebal at ang kanyang mga pantas na lalaki ay nasa iyo, na inaayos ang iyong mga dugtungan; ang lahat ng sasakyan sa dagat at lahat ng mga tauhan nito ay nasa iyo, upang ipangalakal ang iyong paninda.

¹⁰ "Ang Persia, Lud, at Put ay nasa iyong hukbo bilang iyong mga mandirigma. Kanilang ibinitin ang kalasag at helmet sa iyo; binigyan ka nila ng kariktan.

¹¹ Ang mga lalaki ng Arvad at ang iyong hukbo ay nasa ibabaw ng iyong mga pader sa palibot, at ang mga lalaki ng Gamad ay nasa iyong mga muog. Kanilang isinabit ang kanilang mga kalasag sa iyong mga kuta sa palibot; kanilang pinasakdal ang iyong kagandahan.

¹² 'Ang Tarsis ay nangalakal sa iyo dahil sa napakalaki mong kayamanan na iba't ibang uri; ang pilak, bakal, lata, at tingga, ay ipinapalit nila sa iyong mga kalakal.

¹³ Ang Javan, Tubal, at Meshec ay nakipagkalakalan sa iyo; kanilang ipinapalit ang mga tao at ang mga sisidlang tanso sa iyong mga kalakal.

¹⁴ Ipinagpalit ng Bet-togarmah sa iyong mga kalakal ang kanilang mga kabayo at mga kabayong pandigma at mga mola.

¹⁵ Ang mga tao sa Dedan ay nakipangalakal sa iyo. Ang maraming pulo ay naging iyong tanging pamilihan. Kanilang dinala bilang kabayaran ang mga sungay na garing at ebano.

¹⁶ Nakipagkalakalan sa iyo ang Aram dahil sa dami ng iyong mga paninda. Sila'y nakikipagpalitan sa iyong mga kalakal ng mga esmeralda, kulay-ube, bagay na may burda, pinong telang lino, koral, at mga rubi.

¹⁷ Nakipagkalakalan sa iyo ang lupain ng Juda at Israel. Sila'y nakikipagpalitan sa iyong mga kalakal ng trigo, olibo, pulot, langis, at balsamo.

¹⁸ Nakipagkalakalan sa iyo ang Damasco dahil sa dami ng iyong mga paninda, dahil sa napakalaki mong kayamanan na iba't ibang uri; alak ng Helbon, at maputing lana.

¹⁹ Nakikipagpalitan ang Vedan at Javan sa iyong mga kalakal ng sinulid na lana; ng pundidong bakal, kasia, at ng kalamo.

²⁰ Nakipagkalakalan sa iyo ang Dedan ng telang upuan para sa pangangabayo.

²¹ Ang Arabia at lahat ng prinsipe ng Kedar ay naging iyong mga mamimili ng mga kordero, mga lalaking tupa, at mga kambing. Sa mga ito'y nakipagkalakalan sila sa iyo.

²² Ang mga mangangalakal ng Seba at Raama ay nakipagkalakalan sa iyo. Kanilang ipinagpalit sa iyong mga kalakal ang pinakamabuting uri ng lahat ng pabango, at lahat ng mahahalagang bato at ginto.

²³ Ang Haran, Canneh, at Eden, Ashur at ang Chilmad ay nakipagkalakalan sa iyo.

²⁴ Ang mga ito ay nakipagkalakalan sa iyo ng mga piling pananamit, mga damit na kulay asul at may burda, at mga alpombrang may kulay na natatalian ng mga sintas at ginawang matibay. Sa mga ito'y nakipagkalakalan sila sa iyo.

²⁵ Ang mga sasakyan sa Tarsis ay naglakbay para sa iyong kalakal. "Kaya't ikaw ay napuno at naging totoong maluwalhati sa kalagitnaan ng mga dagat.

²⁶ Dinala ka ng iyong mga mananagwan sa malawak na dagat. Winasak ka ng hanging silangan sa kalagitnaan ng dagat.

²⁷ Ang iyong kayamanan, ang iyong mga kalakal, ang iyong paninda, ang iyong mga mananagwan, at ang iyong mga piloto, ang iyong mga taga-ayos ng dugtong, at ang tagapagtinda ng iyong mga kalakal, at ang lahat mong mandirigma na nasa iyo, at ang lahat ng pangkat na nasa gitna mo, ay lulubog sa kalagitnaan ng dagat sa araw ng iyong pagkawasak.

²⁸ Sa lakas ng sigaw ng iyong mga piloto, ang mga nayon ay nayayanig,

²⁹ at pababa sa kanilang mga sasakyan ay dumating ang lahat ng humahawak sa sagwan. Ang mga marino at lahat ng mga piloto ng dagat ay nakatayo sa pampang,

³⁰ at tumataghoy nang malakas sa iyo at umiiyak na mainam. Binuhusan nila ng alabok ang kanilang mga ulo, at naglubalob sa mga abo;

³¹ nagpakalbo sila dahil sa iyo, at nagbigkis ng sako, at kanilang iniyakan ka na may kapaitan ng kaluluwa, at matinding pananangis.

³² Bukod dito sa kanilang pagtangis ay nananaghoy sila para sa iyo, at tinangisan ka: 'Sino ang kagaya ng Tiro na tulad niyang tahimik sa gitna ng dagat?

³³ Kapag ang iyong mga kalakal ay dumating mula sa mga dagat, iyong binubusog ang maraming bayan; iyong pinayaman ang mga hari sa lupa ng karamihan ng iyong mga kayamanan at mga kalakal.

³⁴ Ngayo'y nawasak ka sa karagatan, sa kalaliman ng mga tubig; ang iyong kalakal at ang lahat mong mga tauhan ay lumubog na kasama mo.

³⁵ Lahat ng naninirahan sa mga pulo ay natitigilan dahil sa iyo; at ang kanilang mga hari ay tunay na natakot, sila'y nabagabag sa kaanyuan.

³⁶ Pinagsutsutan ka ng mga mangangalakal sa gitna ng mga bayan; ikaw ay dumating sa isang kakilakilabot na wakas, at hindi ka na mabubuhay pa magpakailanman.'"