Read Ang Bagong Ang Biblia Ezekiel 30 Bible Online

Ezekiel 30 - Ang Bagong Ang Biblia bible

Ezekiel 30

¹ Ang salita ng PANGINOON ay dumating uli sa akin, na sinasabi,

² "Anak ng tao, magpahayag ka ng propesiya at iyong sabihin, Ganito ang sabi ng Panginoong DIYOS: "Managhoy kayo, 'Kahabag-habag ang araw na iyon!'

³ Sapagkat ang araw ay malapit na, ang araw ng PANGINOON ay malapit na, magiging araw iyon ng mga ulap, panahon ng kapahamakan para sa mga bansa.

⁴ Ang isang tabak ay darating sa Ehipto, at ang kahirapan ay darating sa Etiopia, kapag ang mga patay ay nabubuwal sa Ehipto; at dinadala nila ang kanyang kayamanan, at ang kanyang mga pundasyon ay winawasak.

⁵ Ang Etiopia, Put, Lud, buong Arabia, Libya, at ang mga anak ng lupain na magkakasundo, ay mabu buwal na kasama nila sa pamamagitan ng tabak.

⁶ "Ganito ang sabi ng PANGINOON: Ang mga tumutulong sa Ehipto ay mabubuwal, at ang kanyang palalong kapangyarihan ay bababa, mula sa Migdol hanggang sa Syene mabubuwal sila roon sa pamamagitan ng tabak, sabi ng Panginoong DIYOS.

⁷ At sila'y mawawasak sa gitna ng mga lupaing wasak; at ang kanyang mga lunsod ay malalagay sa gitna ng mga lunsod na giba.

⁸ At kanilang malalaman na ako ang PANGINOON, kapag ako'y nagpaningas ng apoy sa Ehipto, at ang lahat ng kanyang mga katulong ay nalipol.

⁹ "Sa araw na iyon ay lalabas ang mabibilis na mga sugo mula sa harapan ko upang takutin ang hindi naghihinalang mga taga-Etiopia; at magkakaroon ng kahirapan sa kanila sa araw ng kapahamakan ng Ehipto; sapagkat narito, ito'y dumarating!

¹⁰ "Ganito ang sabi ng Panginoong DIYOS: Akin namang wawakasan ang karamihan ng Ehipto, sa pamamagitan ni Nebukadnezar na hari ng Babilonia.

¹¹ Siya at ang kanyang bayang kasama niya, na kakila-kilabot sa mga bansa, ay ipapasok upang gibain ang lupain; at kanilang bubunutin ang kanilang mga tabak laban sa Ehipto, at pupunuin ng mga patay ang lupain.

¹² At aking tutuyuin ang Nilo, at aking ipagbibili ang lupain sa kamay ng masasamang tao; at aking sisirain ang lupain at lahat ng naroon, sa pamamagitan ng kamay ng mga dayuhan; akong PANGINOON ang nagsalita.

¹³ "Ganito ang sabi ng Panginoong DIYOS: Aking wawasakin ang mga diyus-diyosan, at aking wawakasan ang mga larawan sa Memfis; at hindi na magkakaroon pa ng pinuno sa lupain ng Ehipto; at ako'y maglalagay ng takot sa lupain ng Ehipto.

¹⁴ Aking sisirain ang Patros, at ako'y magsusunog sa Zoan, at maglalapat ako ng mga hatol sa Tebes.

¹⁵ Aking ibubuhos ang aking poot sa Sin, na tanggulan ng Ehipto, at aking ititiwalag ang karamihan ng Tebes.

¹⁶ At ako'y magpapaningas ng apoy sa Ehipto; ang Sin ay malalagay sa malaking kadalamhatian; at ang Tebes ay mabubutas, at ang Memfis ay magkakaroon ng mga kahirapan sa araw-araw.

¹⁷ Ang mga binata ng On at Pi-beseth ay mabubuwal sa pamamagitan ng tabak; at ang mga babae ay tutungo sa pagkabihag.

¹⁸ Sa Tafnes nama'y magdidilim ang araw, kapag aking binasag doon ang mga pamatok ng Ehipto, at ang kanyang palalong kapangyarihan ay magwawakas; tatakpan siya ng ulap, at ang kanyang mga anak na babae ay tutungo sa pagkabihag.

¹⁹ Ganito ko ilalapat ang mga kahatulan sa Ehipto. Kanilang malalaman na ako ang PANGINOON."

²⁰ Nang ikapitong araw ng unang buwan ng ikalabing-isang taon, ang salita ng PANGINOON ay dumating sa akin, na sinasabi,

²¹ "Anak ng tao, aking binali ang bisig ni Faraon na hari ng Ehipto; at narito, hindi ito natalian, upang pagalingin ito, ni binalot ng tapal, upang ito ay maging malakas na humawak ng tabak.

²² Kaya't ganito ang sabi ng Panginoong DIYOS: Ako'y laban kay Faraon na hari ng Ehipto, at aking babaliin ang kanyang mga bisig, ang malakas na bisig at ang nabali; at aking pababagsakin ang tabak mula sa kanyang kamay.

²³ Aking pangangalatin ang mga Ehipcio sa gitna ng mga bansa, at pagwawatak-watakin ko sila sa mga lupain.

²⁴ Aking palalakasin ang mga bisig ng hari ng Babilonia, at ilalagay ko ang aking tabak sa kanyang kamay; ngunit aking babaliin ang mga bisig ni Faraon, at siya'y dadaing sa harap niya tulad ng taong nasugatan nang malubha.

²⁵ Aking palalakasin ang mga bisig ng hari ng Babilonia, ngunit ang mga bisig ni Faraon ay babagsak, at kanilang malalaman na ako ang PANGINOON. Kapag aking inilagay ang aking tabak sa kamay ng hari ng Babilonia, kanyang iuunat ito sa lupain ng Ehipto.

²⁶ At aking pangangalatin ang mga Ehipcio sa gitna ng mga bansa at pagwawatak-watakin sila sa mga lupain. Kanilang malalaman na ako ang PANGINOON."