Read Ang Bagong Ang Biblia Hosea 10 Bible Online

Hosea 10 - Ang Bagong Ang Biblia bible

Hosea 10

¹ Ang Israel ay isang mayabong na baging na namumunga. Habang dumarami ang kanyang bunga, dumarami rin ang mga itinatayo niyang dambana; kung paanong bumubuti ang kanyang lupain ay gayon niya pinabubuti ang mga haligi niya.

² Ang kanilang puso ay di-tapat; ngayo'y dapat nilang pasanin ang kanilang kasalanan. Ibabagsak ng PANGINOON ang kanilang mga dambana, at wawasakin ang kanilang mga haligi.

³ Sapagkat ngayo'y kanilang sasabihin, "Wala kaming hari; sapagkat hindi kami natatakot sa PANGINOON; at ang hari, ano ang magagawa niya para sa amin?"

⁴ Sila'y bumibigkas ng mga salita lamang; sa pamamagitan ng mga hungkag na panata ay gumagawa sila ng mga tipan; kaya't ang paghatol ay sumisibol tulad ng damong nakalalason sa mga lupang binungkal sa bukid.

⁵ Ang mga naninirahan sa Samaria ay nanginginig dahil sa mga guya ng Bet-haven. Sapagkat ang taong-bayan niyon ay magluluksa doon, at ang mga paring sumasamba sa diyus-diyosan niyon ay mananangisi doon, dahil sa kaluwalhatian niyon na nawala roon.

⁶ Dadalhin mismo ang bagay na iyon sa Asiria, bilang kaloob sa Haring Jareb. Ang Efraim ay ilalagay sa kahihiyan, at ikahihiya ng Israel ang kanyang sariling payo.

⁷ Ang hari ng Samaria ay mapapahamak, na parang bula sa ibabaw ng tubig.

⁸ Ang matataas na dako ng Aven, ang kasalanan ng Israel ay mawawasak. Ang mga tinik at mga dawag ay tutubo sa kanilang mga dambana; at sasabihin nila sa mga bundok, Takpan ninyo kami; at sa mga burol, Mahulog kayo sa amin.

⁹ O Israel, ikaw ay nagkasala mula sa mga araw ng Gibea; doon sila ay nagpatuloy. Hindi ba sila aabutan ng digmaan sa Gibea?

¹⁰ Ako'y darating laban sa masasamang tao upang parusahan sila; at ang mga bansa ay titipunin laban sa kanila, kapag sila'y nagapos sa kanilang dalawang pagsalangsang.

¹¹ Ang Efraim ay isang turuan na dumalagang baka, na mahilig gumiik, at aking iniligtas ang kanyang magandang leeg; ngunit ilalagay ko ang Efraim sa pamatok, ang Juda ay dapat mag-araro, dapat hilahin ng Jacob ang kanyang pansuyod.

¹² Maghasik kayo para sa inyong sarili ng katuwiran; mag-ani kayo ng bunga ng kabutihang loob; bungkalin ninyo ang inyong tiwangwang na lupa, sapagkat panahon nang hanapin ang PANGINOON, upang siya'y dumating at magpaulan ng katuwiran sa inyo.

¹³ Kayo'y nag-araro ng kasamaan, kayo'y nag-ani ng walang katarungan; kayo'y nagsikain ng bunga ng kasinungalingan. Sapagkat ikaw ay nagtiwala sa iyong lakad, at sa dami ng iyong mga mandirigma.

¹⁴ Kaya't babangon ang kaguluhan ng digmaan sa iyong mga taong-bayan, at lahat ng iyong mga muog ay magigiba, gaya ni Salman na giniba ang Bet-arbel sa araw ng paglalaban: ang mga ina ay pinagluray-luray na kasama ng kanilang mga anak.

¹⁵ Gayon ang gagawin sa inyo, O Bethel, dahil sa inyong malaking kasamaan. Sa pagbubukang-liwayway, ang hari ng Israel ay pupuksain.