Read Ang Bagong Ang Biblia Hosea 11 Bible Online

Hosea 11 - Ang Bagong Ang Biblia bible

Hosea 11

¹ Nang bata pa ang Israel, minahal ko siya, at mula sa Ehipto ay tinawag ko ang aking anak.

² Habang lalo ko silang tinatawag ay lalo naman silang lumalayo sa akin sila'y patuloy na nag-aalay sa mga Baal, at nagsusunog ng mga kamanyang sa mga diyus-diyosan.

³ Gayunma'y ako ang nagturo sa Efraim na lumakad; kinalong ko sila sa aking mga bisig; ngunit hindi nila nalaman na pinagaling ko sila.

⁴ Akin silang pinatnubayan ng panali ng tao, ng mga panali ng pag-ibig. Sa kanila ako'y naging gaya ng nag-aalis ng pamingkaw sa kanilang mga panga; at ako'y naglagay ng pagkain sa harap nila.

⁵ Sila'y hindi babalik sa lupain ng Ehipto; ngunit ang Asiria ang magiging hari nila, sapagkat sila'y tumangging manumbalik sa akin.

⁶ Ang tabak ay magngangalit sa kanilang mga lunsod, at tutupukin ang mga halang sa kanilang mga pintuan, at lalamunin sila dahil sa kanilang sariling mga pakana.

⁷ Ang bayan ko ay mahilig lumayo sa akin. Bagaman tumatawag sila sa Kataas-taasan, walang sinumang nagtataas sa kanya.

⁸ Paano kitang pababayaan, O Efraim? Paano kita itatakuwil, O Israel? Paano kita gagawing tulad ng Adma? Paano kita ituturing na tulad ng Zeboim? Ang aking puso ay nabagbag sa loob ko, ang aking habag ay nagningas.

⁹ Hindi ko igagawad ang aking mabangis na galit, hindi ako babalik upang wasakin ang Efraim; sapagkat ako'y Diyos, at hindi tao; ang Banal sa gitna mo; at hindi ako darating na may poot.

¹⁰ Sila'y lalakad nang ayon sa PANGINOON, siya'y uungal na parang leon; kapag siya'y umungal, ang kanyang mga anak ay darating na nanginginig mula sa kanluran.

¹¹ Sila'y darating na nanginginig na parang mga ibon mula sa Ehipto, at parang mga kalapati mula sa lupain ng Asiria; at ibabalik ko sila sa kanilang mga tahanan, sabi ng PANGINOON.

¹² Pinalibutan ako ng Efraim ng kasinungalingan, at ng sambahayan ni Israel ng daya; ngunit ang Juda ay lumalakad pa ring kasama ng Diyos, at tapat pa rin sa Banal.