Read Ang Bagong Ang Biblia Hosea 14 Bible Online

Hosea 14 - Ang Bagong Ang Biblia bible

Hosea 14

¹ O Israel, manumbalik ka sa PANGINOON mong Diyos; sapagkat ikaw ay nabuwal dahil sa iyong kasamaan.

² Magdala kayo ng mga salita, at manumbalik kayo sa PANGINOON; sabihin ninyo sa kanya, "Alisin mo ang lahat ng kasamaan, tanggapin mo ang mabuti; at aming ihahandog ang bunga ng aming mga labi.

³ Hindi kami ililigtas ng Asiria; hindi kami sasakay sa mga kabayo; hindi na kami magsasabi sa gawa ng aming mga kamay, 'Aming Diyos.' Sa iyo'y nakakatagpo ng awa ang ulila."

⁴ Aking gagamutin ang kanilang pagtataksil, malaya ko silang iibigin; sapagkat ang aking galit ay naalis na sa kanila.

⁵ Ako'y magiging tulad ng hamog sa Israel; siya'y mamumukadkad gaya ng liryo, at kakalat ang kanyang ugat tulad ng Lebanon.

⁶ Ang kanyang mga sanga ay yayabong, at ang kanyang kagandahan ay magiging gaya ng puno ng olibo, at ang kanyang bango ay tulad ng Lebanon.

⁷ Sila'y muling maninirahan sa kanyang lilim sila'y lalago gaya ng trigo, at mamumulaklak na gaya ng puno ng ubas, at ang kanilang bango ay magiging gaya ng alak ng Lebanon.

⁸ O Efraim, ano ba ang kinalaman ko sa mga diyus-diyosan? Ako ang siyang sumasagot at nagbabantay sa iyo." Ako'y tulad sa sipres na laging luntian, sa akin nanggagaling ang iyong bunga.

⁹ Sinuman ang pantas, unawain niya ang mga bagay na ito; sinumang may pang-unawa, alamin niya ang mga ito; sapagkat ang mga daan ng PANGINOON ay matuwid, at nilalakaran ng mga taong matuwid, ngunit natitisod sa mga iyon ang mga makasalanan.