Read Ang Bagong Ang Biblia Hosea 6 Bible Online

Hosea 6 - Ang Bagong Ang Biblia bible

Hosea 6

¹ "Halikayo at tayo'y manumbalik sa PANGINOON; sapagkat siya ang lumapa, ngunit pagagalingin niya tayo; sinugatan niya tayo ngunit tayo'y kanyang bebendahan.

² Pagkatapos ng dalawang araw ay muli niya tayong bubuhayin; sa ikatlong araw ay ibabangon niya tayo, upang tayo'y mabuhay sa harap niya.

³ At ating kilalanin, tayo'y magpatuloy upang makilala ang PANGINOON; ang kanyang paglabas ay kasintiyak ng bukang-liwayway; at siya'y paparito sa atin na parang ulan, tulad ng ulan sa tagsibol na dumidilig sa lupa."

⁴ Anong gagawin ko sa iyo, O Efraim? Anong gagawin ko sa iyo, O Juda? Ang inyong katapatan ay parang ulap sa umaga, at parang hamog na maagang umaalis.

⁵ Kaya't sila'y aking pinutol sa pamamagitan ng mga propeta; pinatay ko sila ng mga salita ng aking bibig; at ang aking mga kahatulan ay lumalabas na parang liwanag.

⁶ Sapagkat nalulugod ako sa katapatan, kaysa alay, ng pagkakilala sa Diyos kaysa mga handog na sinusunog.

⁷ Ngunit gaya ni Adan ay sumuway sila sa tipan; doo'y nagsigawa silang may kataksilan sa akin.

⁸ Ang Gilead ay lunsod ng mga gumagawa ng kasamaan; tigmak ng dugo.

⁹ Kung paanong ang mga tulisan ay nag-aabang sa isang tao, gayon nagsasama-sama ang mga pari; sila'y pumapatay sa daan patungong Shekem. Sila'y gumagawa ng kasamaan.

¹⁰ Sa sambahayan ni Israel ay nakakita ako ng kakilakilabot na bagay; ang pagiging bayarang babae ng Efraim ay naroroon, ang Israel ay dinudungisan ang sarili.

¹¹ Sa iyo rin, O Juda, ay may nakatakdang pag-aani, kapag ibabalik ko na ang mga kayamanan sa aking bayan.