Read Ang Bagong Ang Biblia Joel 1 Bible Online

Joel 1 - Ang Bagong Ang Biblia bible

Joel 1

¹ Ang salita ng PANGINOON na dumating kay Joel na anak ni Pethuel:

² Pakinggan ninyo ito, O matatanda, pakinggan ninyo, kayong lahat na naninirahan sa lupain! May nangyari na bang ganitong bagay sa inyong mga araw, o sa mga araw ng inyong mga ninuno?

³ Sabihin ninyo iyon sa inyong mga anak, at ng inyong mga anak sa kanilang mga anak, at ng kanilang mga anak sa susunod na salinlahi.

⁴ Ang iniwan ng nagngangatngat na balang, ay kinain ng kuyog na balang. Ang iniwan ng kuyog na balang ay kinain ng gumagapang na balang; at ang iniwan ng gumagapang na balang ay kinain ng maninirang balang.

⁵ Gising, kayong mga maglalasing, at umiyak kayo; tumangis kayo, kayong lahat na manginginom ng alak, dahil sa matamis na alak na inilayo sa inyong bibig.

⁶ Sapagkat ang isang bansa ay sumalakay sa aking lupain, malakas at di mabilang, ang kanyang mga ngipin ay mga ngipin ng leon, at siya'y may mga pangil ng babaing leon.

⁷ Kanyang sinira ang aking puno ng ubas, at sinibak ang aking puno ng igos; kanyang binalatan at inihagis, ang kanilang mga sanga ay pumuti.

⁸ Managhoy ka na parang birheng may bigkis ng damit-sako, para sa asawa ng kanyang kabataan.

⁹ Ang handog na butil at ang handog na inumin ay inalis sa bahay ng PANGINOON. Ang mga pari na mga lingkod ng PANGINOON ay nagdadalamhati.

¹⁰ Ang mga bukid ay sira, ang lupain ay nagluluksa, sapagkat ang trigo ay sira, ang bagong alak ay natuyo at ang langis ay kulang.

¹¹ Mahiya kayo, O kayong mga magsasaka, tumangis kayong mga nag-aalaga ng ubasan, dahil sa trigo at sebada; sapagkat ang ani sa bukid ay nasira.

¹² Ang puno ng ubas ay natuyo, at ang puno ng igos ay nalalanta. Ang puno ng granada, ang puno ng palma at ang puno ng mansanas, at lahat ng punungkahoy sa parang ay tuyo; sapagkat ang kagalakan ay nawala sa mga anak ng mga tao.

¹³ Magbigkis kayo ng damit-sako at tumaghoy, O mga pari at tumaghoy, manangis, kayong mga lingkod sa dambana. Halikayo, palipasin ninyo ang magdamag na suot ang damit-sako, O mga lingkod ng aking Diyos! Sapagkat ang handog na butil at ang handog na inumin ay ipinagkait sa bahay ng inyong Diyos.

¹⁴ Magtakda kayo ng pag-aayuno, tumawag kayo ng isang banal na pagtitipon. Tipunin ninyo ang matatanda at ang lahat ng nahinirahan sa lupain sa bahay ng PANGINOON ninyong Diyos, at dumaing kayo sa PANGINOON.

¹⁵ Kahabag-habag ang araw na iyon! Sapagkat ang araw ng PANGINOON ay malapit na, at ito'y darating na gaya ng pagkawasak mula sa Makapangyarihan sa lahat.

¹⁶ Hindi ba ang pagkain ay inalis sa ating harapan, ang kagalakan at kasayahan mula sa bahay ng ating Diyos?

¹⁷ Ang mga binhi ay natutuyo sa ilalim ng lupa, ang mga kamalig ay walang laman, ang mga imbakan ay wasak; sapagkat walang trigo.

¹⁸ Nag-uungalan ang mga hayop! Ang mga kawan ng mga baka ay nalilito sapagkat wala silang pastulan; pati ang mga kawan ng tupa ay nagdurusa.

¹⁹ O PANGINOON, tumatawag ako sa iyo. Sapagkat tinupok ng apoy ang mga pastulan sa ilang, at sinunog ng apoy ang lahat ng punungkahoy sa parang.

²⁰ Maging ang mga hayop sa bukid ay humihingal sa iyo; sapagkat ang mga tubig sa batis ay natutuyo, at tinupok ng apoy ang mga pastulan sa ilang.