Read Ang Bagong Ang Biblia Amos 2 Bible Online

Amos 2 - Ang Bagong Ang Biblia bible

Amos 2

¹ Ganito ang sabi ng PANGINOON: "Dahil sa tatlong pagsuway ng Moab, at dahil sa apat, hindi ko pawawalang-bisa ang parusa; sapagkat kanyang sinunog upang maging apog ang mga buto ng hari ng Edom.

² Kaya't ako'y magsusugo ng apoy sa Moab, at tutupukin nito ang mga tanggulan ng Kiryot; at ang Moab ay mamamatay sa gitna ng pagkakagulo, na may sigawan at tunog ng trumpeta.

³ At aking ihihiwalay ang hukom sa gitna niyon, at papatayin ko ang lahat ng pinuno niyon na kasama niya," sabi ng PANGINOON.

⁴ Ganito ang sabi ng PANGINOON: "Dahil sa tatlong pagsuway ng Juda, at dahil sa apat, hindi ko pawawalang-bisa ang parusa, sapagkat kanilang itinakuwil ang kautusan ng PANGINOON, at hindi iningatan ang kanyang mga tuntunin, kundi iniligaw sila ng kanilang mga kasinungalingang nilakaran din ng kanilang mga magulang.

⁵ Kaya't magsusugo ako ng isang apoy sa Juda; at tutupukin niyon ang mga tanggulan ng Jerusalem."

⁶ Ganito ang sabi ng PANGINOON: "Dahil sa tatlong pagsuway ng Israel, at dahil sa apat, hindi ko pawawalang-bisa ang parusa; sapagkat kanilang ipinagbili ang matuwid dahil sa pilak, at ang nangangailangan sa isang pares na sandalyas —

⁷ kanilang tinapakan ang ulo ng dukha sa alabok ng lupa, at inililiko ang lakad ng mapagpakumbaba; at ang lalaki at kanyang ama ay sumisiping sa iisang dalaga, kaya't nalapastangan ang aking banal na pangalan.

⁸ At sila'y nakahiga sa tabi ng bawat dambana, sa ibabaw ng mga kasuotang nakuha sa pamamagitan ng sangla; at sa bahay ng kanilang Diyos ay umiinom sila ng alak na binili mula sa multa na kanilang ipinataw.

⁹ "Gayunma'y nilipol ko ang Amoreo sa harapan nila, na ang taas ay gaya ng taas ng mga sedro, at kasinlakas na gaya ng mga ensina; nilipol ko ang kanyang bunga sa itaas, at ang kanyang mga ugat sa ilalim.

¹⁰ Iniahon ko rin kayo sa lupain ng Ehipto, at pinatnubayan ko kayo nang apatnapung taon sa ilang, upang angkinin ninyo ang lupain ng Amoreo.

¹¹ At pinili ko ang ilan sa inyong mga anak upang maging mga propeta, at ang ilan sa inyong mga binata upang maging mga Nazirita. Di ba gayon, O bayan ng Israel? sabi ng PANGINOON.

¹² "Ngunit pinainom ninyo ng alak ang mga Nazirita, at inutusan ninyo ang mga propeta, na sinasabi, 'Huwag kayong magsalita ng propesiya!

¹³ "Narito, pabibigatan ko kayo sa inyong dako, na gaya ng pagpapabigat sa isang karwaheng puno ng mga bigkis.

¹⁴ Ang pagtakas ay maglalaho sa matulin; at hindi mapapanatili ng malakas ang kanyang kalakasan; ni maililigtas ng makapangyarihan ang kanyang sarili.

¹⁵ Hindi makakatindig ang humahawak ng pana; at siyang matulin ang paa ay hindi makakatakas, ni siya mang nakasakay sa kabayo ay makapagliligtas ng kanyang buhay.

¹⁶ At siya na matapang sa mga makapangyarihan ay tatakas na hubad sa araw na iyon," sabi ng PANGINOON.