Read Ang Bagong Ang Biblia Amos 5 Bible Online

Amos 5 - Ang Bagong Ang Biblia bible

Amos 5

¹ Pakinggan ninyo ang salitang ito na aking itinataghoy sa inyo, O sambahayan ni Israel:

² "Siya*y bumagsak na, hindi na siya babangon pa, ang birhen ng Israel; siya'y itinakuwil sa kanyang lupain, walang magbangon sa kanya."

³ Sapagkat ganito ang sabi ng Panginoong DIYOS: "Ang lunsod na lumabas na isang libo ay magkakaroon ng isandaang maiiwan, at ang lumabas na isandaan ay magkakaroon ng sampung maiiwan, sa sambahayan ni Israel."

⁴ Sapagkat ganito ang sabi ng PANGINOON sa sambahayan ni Israel, "Hanapin ninyo ako, at kayo'y mabubuhay;

⁵ ngunit huwag ninyong hanapin ang Bethel, at huwag pumasok sa Gilgal, ni dumaan sa Beer-seba; sapagkat ang Gilgal ay tiyak na patungo sa pagkabihag, at ang Bethel ay mauuwi sa wala.

⁶ Inyong hanapin ang PANGINOON, at kayo'y mabubuhay; baka siya'y magsiklab na parang apoy sa sambahayan ni Jose, at lalamunin nito ang Bethel, at walang makakapatay niyon.

⁷ O kayo na ginagawa ninyong mapait na kahoy ang katarungan, at inihahagis sa lupa ang katuwiran!

⁸ Siya na lumikha ng Pleyades at Orion, at ang gabing malalim ay ginagawang umaga, at pinadidilim ang araw upang maging gabi, na tinatawag ang mga tubig ng dagat, at ibinubuhos ang mga iyon sa ibabaw ng lupa ang PANGINOON ang kanyang pangalan;

⁹ siya ang nagdadala ng biglang pagkawasak laban sa malakas, anupa't ang pagkawasak ay dumarating sa tanggulan.

¹⁰ Kanilang kinapopootan ang nananaway sa pintuan, at kanilang kinasusuklaman ang nagsasalita ng katotohanan.

¹¹ Kaya't yamang inyong niyayapakan ang dukha, at pinagbubuwis ninyo siya ng trigo, kayo'y nagtayo ng mga bahay na batong tinabas, ngunit hindi ninyo iyon tatahanan; kayo'y nagtanim ng magagandang ubasan, ngunit hindi ninyo iinumin ang alak niyon.

¹² Sapagkat alam ko kung gaano karami ang inyong mga pagsuway, at kung gaano kalaki ang inyong mga kasalanan — kayong nagpapahirap sa matuwid, kayo na kumukuha ng suhol, at itinutulak sa isang tabi ng pintuan ang nangangailangan.

¹³ Kaya't siya na mabait ay tatahimik sa panahong iyon; sapagkat iyon ay masamang panahon.

¹⁴ Hanapin ninyo ang mabuti at hindi ang masama, upang kayo'y mabuhay; at sa gayo'y ang PANGINOON, ang Diyos ng mga hukbo, ay magiging kasama ninyo, gaya ng inyong sinasabi.

¹⁵ Inyong kapootan ang masama, at ibigin ang mabuti, at kayo'y magpairal ng katarungan sa pintuang-bayan. Marahil ang PANGINOON, ang Diyos ng mga hukbo ay magiging mapagpala sa mga nalabi sa Jose.

¹⁶ Kaya't ganito ang sabi ng PANGINOON, ng Diyos ng mga hukbo, ang Panginoon: "Magkakaroon ng panaghoy sa lahat ng mga liwasan, at sila'y magsasabi sa lahat ng lansangan, 'Kahabag-habag! Kahabag-habag!' Kanilang tatawagin ang magbubukid upang magdalamhati, at sa pagtangis ang mga bihasa sa panaghoy.

¹⁷ At sa lahat ng ubasan ay magkakaroon ng panaghoy; sapagkat ako'y daraan sa gitna mo," sabi ng PANGINOON.

¹⁸ Kahabag-habag kayong nagnanais ng araw ng PANGINOON! Sa anong layunin ang araw ng PANGINOON sa inyo? Iyon ay kadiliman at hindi kaliwanagan,

¹⁹ gaya ng isang tao na tumakas sa leon, at sinalubong siya ng oso, o pumasok sa bahay at ikinapit ang kanyang kamay sa dingding,' at isang ahas ang tumuka sa kanya.

²⁰ Hindi ba kadiliman ang araw ng PANGINOON, at hindi kaliwanagan, at kadiliman na walang ningning doon?

²¹ "Aking kinapopootan, aking hinahamak ang inyong mga kapistahan, at hindi ako malulugod sa inyong mga takdang pagtitipon.

²² Bagaman inyong inihahandog sa akin ang inyong mga handog na sinusunog at mga handog na butil, hindi ko iyon tatanggapin; ni akin mang pagmamasdan ang mga handog pangkapayapaan ng inyong mga pinatabang hayop.

²³ Ilayo mo sa akin ang ingay ng iyong mga awit; hindi ako makikinig sa himig ng iyong mga alpa.

²⁴ Kundi paagusin ninyo ang katarungan na parang tubig, at ang katuwiran na parang batis na patuloy na umaagos.

²⁵ "Nagdala ba kayo sa akin ng mga alay, at mga handog sa ilang sa loob ng apatnapung taon, O sambahayan ni Israel?

²⁶ Inyong dinala si Sakkuth na inyong hari, at si Kaiwan na inyong mga larawan, ang bituin ng inyong diyos, na inyong ginawa para sa inyong sarili.

²⁷ Kaya't kayo'y aking dadalhin sa pagkabihag sa kabila ng Damasco," sabi ng PANGINOON, na ang pangalan ay Diyos ng mga hukbo.