Read Ang Bagong Ang Biblia Jonah 1 Bible Online

Jonah 1 - Ang Bagong Ang Biblia bible

Jonah 1

¹ Ang salita ng PANGINOON ay dumating kay Jonas na anak ni Amitai, na nagsasabi,

² "Bumangon ka, pumaroon ka sa Ninive, sa malaking lunsod na iyon, at sumigaw ka laban doon; sapagkat ang kanilang kasamaan ay umabot sa harapan ko."

³ Ngunit si Jonas ay bumangon upang tumakas patungo sa Tarsis mula sa harapan ng PANGINOON. Siya'y lumusong sa Joppa at nakatagpo ng barkong patungo sa Tarsis. Nagbayad siya ng pamasahe at lumulan upang sumama sa kanila sa Tarsis papalayo sa harapan ng PANGINOON.

⁴ Ngunit ang PANGINOON ay naghagis ng malakas na hangin sa dagat, at nagkaroon ng malakas na unos sa dagat, anupa't ang barko ay nagbantang mawasak.

⁵ Nang magkagayo'y natakot ang mga magdaragat at tumawag ang bawat isa sa kanya-kanyang diyos; at kanilang inihagis sa dagat ang mga dala-dalahang nasa sasakyan upang makapagpagaan sa kanila. Samantala, si Jonas ay nasa ibaba sa pinakaloob na bahagi ng barko na doon ay nakahiga siya at nakatulog nang mahimbing.

⁶ Sa gayo'y dumating ang kapitan at sinabi sa kanya, "Ano ang ibig mong sabihin, at natutulog ka pa? Bumangon ka, tumawag ka sa iyong diyos! Baka sakaling alalahanin tayo ng diyos upang huwag tayong mamatay."

⁷ Sinabi nila sa isa't isa, "Pumarito kayo at tayo'y magpalabunutan upang ating malaman kung dahil kanino dumating ang kasamaang ito sa atin." Kaya't nagpalabunutan sila, at ang nabunot ay si Jonas."

⁸ Nang magkagayo'y sinabi nila sa kanya, "Sabihin mo sa amin, dahil kanino dumating ang kasamaang ito sa atin? Ano ang iyong hanap-buhay? At saan ka nanggaling? Ano ang iyong lupain? Sa anong bayan ka?"

⁹ Kanyang sinabi sa kanila, "Ako'y isang Hebreo. Ako'y may takot sa PANGINOON, sa Diyos ng langit na gumawa ng dagat at ng tuyong lupain."

¹⁰ Nang magkagayo'y lubhang natakot ang mga tao, at sinabi sa kanya, "Ano itong iyong ginawa?" Sapagkat nalaman ng mga tao na siya'y tumatakas mula sa harapan ng PANGINOON, sapagkat sinabi niya sa kanila.

¹¹ At sinabi nila sa kanya, "Anong gagawin namin sa iyo upang ang dagat ay tumahimik sa atin?" Sapagkat ang dagat ay lalong nag-aalimpuyo.

¹² Sinabi niya sa kanila, "Buhatin ninyo ako at ihagis ninyo ako sa dagat. Sa gayo'y ang dagat ay tatahimik para sa inyo, sapagkat alam ko na dahil sa akin ay dumating ang malaking unos na ito sa inyo."

¹³ Gayunman, ang mga lalaki ay sumagwan ng mabuti upang maibalik ang barko sa lupa, ngunit hindi nila magawa sapagkat ang dagat ay lalo pang nag-aalimpuyo laban sa kanila.

¹⁴ Kaya't sila'y tumawag sa PANGINOON, at nagsabi, "Nagmamakaawa kami sa iyo, O PANGINOON, huwag mo kaming ipahamak dahil sa buhay ng lalaking ito. Huwag mong iatang sa amin ang walang salang dugo; sapagkat ginawa mo, O PANGINOON, ang nakakalugod sa iyo."

¹⁵ Kaya't kanilang binuhat si Jonas at inihagis siya sa dagat; at ang dagat ay tumigil sa pagngangalit nito.

¹⁶ Nang magkagayo'y lubhang natakot ang mga tao sa PANGINOON; at sila'y naghandog ng isang alay sa PANGINOON at gumawa ng mga panata.

¹⁷ At naghanda ang PANGINOON ng isang malaking isda upang lunukin si Jonas; at si Jonas ay nasa tiyan ng isda sa loob ng tatlong araw at tatlong gabi.