Read Ang Bagong Ang Biblia Jonah 2 Bible Online

Jonah 2 - Ang Bagong Ang Biblia bible

Jonah 2

¹ Nang magkagayo'y nanalangin si Jonas sa PANGINOON niyang Diyos mula sa tiyan ng isda,

² at kanyang sinabi, "Tinawagan ko ang PANGINOON mula sa aking pagdadalamhati, at siya'y sumagot sa akin; mula sa tiyan ng Sheol ako'y sumigaw, at iyong dininig ang aking tinig.

³ Sapagkat inihagis mo ako sa kalaliman, sa pusod ng dagat, At ang tubig ay nasa palibot ko; Ang lahat ng iyong alon at iyong mga daluyong ay umaapaw sa akin.

⁴ Kaya't aking sinabi, 'Ako'y inihagis mula sa iyong harapan; gayunma'y muli akong titingin sa iyong banal na templo.'

⁵ Kinukulong ako ng tubig sa palibot. Ang kalaliman ay nasa palibot ko. Ang mga damong dagat ay bumalot sa aking ulo.

⁶ Ako'y bumaba sa mga ugat ng mga bundok. Ang lupain at ang mga halang nito ay nagsara sa akin magpakailanman. Gayunma'y iniahon mo ang aking buhay mula sa hukay, O PANGINOON kong Diyos.

⁷ Nang ang aking buhay ay nanlulupaypay, naalala ko ang PANGINOON; at ang aking dalangin ay umabot sa loob ng iyong banal na templo.

⁸ Ang mga nagpapahalaga sa mga walang kabuluhang diyus-diyosan ay nagtatakwil ng kanilang tunay na katapatan.

⁹ Ngunit ako'y mag-aalay sa iyo na may tinig ng pasasalamat. Aking tutuparin ang aking ipinanata. Ang pagliligtas ay mula sa PANGINOON!"

¹⁰ At inutusan ng PANGINOON ang isda, at iniluwa nito si Jonas sa tuyong lupa.