Read Ang Bagong Ang Biblia Numbers 18 Bible Online

Numbers 18 - Ang Bagong Ang Biblia bible

Numbers 18

¹ Sinabi ng PANGINOON kay Aaron, "Ikaw at ang iyong mga anak at ang sambahayan ng iyong mga magulang na kasama mo ay magpapasan ng kasalanan ukol sa santuwaryo, at ikaw at ang iyong mga anak na kasama mo ay magpapasan ng kasalanan ng inyong pagiging pari.

² Isama mo rin ang iyong mga kapatid mula sa lipi ni Levi, na lipi ng iyong ama upang sila'y makasama mo at maglingkod sa iyo samantalang ikaw at ang iyong mga anak na kasama mo ay nasa harap ng tolda ng patotoo.

³ Sila'y maglilingkod para sa iyo at para sa buong tolda. Huwag lamang silang lalapit sa mga kasangkapan ng santuwaryo, ni sa dambana, upang hindi sila mamatay, maging kayo man.

⁴ Sila'y makikisamasa iyo, at maglilingkod sa toldang tipanan, sa buong paglilingkod sa tolda at walang sinumang ibang dapat lumapit sa iyo.

⁵ Gampanan ninyo ang mga gawain sa santuwaryo, at ang gawain sa dambana upang huwag nang magkaroon pa ng kapootan sa mga anak ni Israel.

⁶ Ako ang pumili sa inyong mga kapatid na mga Levita sa gitna ng mga anak ni Israel. Sila ay isang kaloob sa inyo, na ibinigay sa PANGINOON, upang gawin ang paglilingkod sa toldang tipanan.

⁷ At gagampanan mo at ng iyong mga anak na kasama mo ang inyong gawain bilang pari sa bawat bagay ng dambana at doon sa nasa loob ng tabing at kayo'y maglilingkod. Ibinibigay ko sa inyo ang pagiging pari bilang kaloob at ang sinumang ibang lumapit ay papatayin."

⁸ Sinabi ng PANGINOON kay Aaron, "Ako'y narito, ibinigay ko sa iyo ang katungkulan sa mga handog na para sa akin, lahat ng mga banal na bagay ng mga anak ni Israel. Ibinigay ko sa iyo ang mga ito bilang bahagi; at sa iyong mga anak bilang marapat na bahagi ninyo magpakailanman.

⁹ Ito'y magiging iyo sa mga pinakabanal na bagay, na hindi pinaraan sa apoy: bawat alay nila, bawat handog na butil at bawat handog pangkasalanan, at bawat handog nila para sa may salang budhi na kanilang ihahandog sa akin ay magiging pinakabanal sa iyo at sa iyong mga anak.

¹⁰ Gaya ng mga kabanal-banalang bagay ay kakain ka ng mga iyan: bawat lalaki ay kakain niyon; iyon ay banal na bagay para sa iyo.

¹¹ Ito ay iyo rin, ang handog na iwinagayway na kanilang kaloob, samakatuwid ay ang lahat ng mga handog na iwinagayway ng mga anak ni Israel; ibinigay ko ang mga ito sa iyo, at sa iyong mga anak na lalaki at babae na kasama mo bilang walang hanggang bahagi magpakailanman. Bawat malinis sa iyong bahay ay kakain niyon.

¹² Lahat ng pinakamabuting langis, at lahat ng pinakamabuting alak at trigo, ang mga unang bunga ng mga iyon na kanilang ibibigay sa PANGINOON ay ibibigay ko sa iyo.

¹³ Ang mga unang hinog na bunga ng lahat na nasa kanilang lupain, na kanilang dinadala sa PANGINOON ay magiging iyo; bawat malinis sa iyong bahay ay kakain niyon.

¹⁴ Lahat ng mga bagay na nakatalaga sa Israel ay magiging iyo.

¹⁵ Lahat ng mga bagay na nagbubukas ng bahay-bata, sa lahat ng laman na kanilang inihahandog sa PANGINOON, sa mga tao at gayundin sa mga hayop, ay magiging iyo. Gayunman, ang panganay sa tao ay tunay na iyong tutubusin, at ang panganay sa maruruming hayop ay iyong tutubusin.

¹⁶ At ang halaga ng pantubos sa kanila, mula sa isang buwang gulang ay iyong tutubusin, ayon sa halaga ng limang siklong pilak, ayon sa siklo ng santuwaryo (na dalawampung gera).

¹⁷ Ngunit ang panganay ng baka, o ang panganay ng tupa, o ang panganay ng kambing ay huwag mong tutubusin; banal ang mga iyon. Iyong iwiwisik ang kanilang dugo sa ibabaw ng dambana, at iyong susunugin ang kanilang taba bilang handog na pinaraan sa apoy, na mabangong samyo para sa PANGINOON.

¹⁸ Ngunit ang laman nila ay magiging iyo, gaya ng dibdib na iwinagayway at gaya ng kanang hita ay magiging iyo.

¹⁹ Lahat ng banal na handog na ihahandog ng mga anak ni Israel sa PANGINOON ay aking ibinigay sa iyo, at sa iyong mga anak na lalaki at babae na walang hanggang bahagi. Iyon ay tipan ng asin magpakailanman sa harap ng PANGINOON para sa iyo at sa iyong binhi na kasama mo."

²⁰ Sinabi ng PANGINOON kay Aaron, "Hindi ka magkakaroon ng mana sa kanilang lupain, ni magkakaroon ka ng anumang bahagi sa gitna nila. Ako ang iyong bahagi at ang iyong mana sa gitna ng mga anak ni Israel.

²¹ Sa mga anak ni Levi, narito, aking ibinigay ang lahat ng ikasampung bahagi sa Israel bilang mana, na ganti sa kanilang paglilingkod na kanilang ipinaglilingkod, samakatuwid ay sa paglilingkod sa toldang tipanan.

²² Mula ngayon ay huwag lalapit ang mga anak ni Israel sa toldang tipanan, baka silay magtaglay ng kasalanan, at mamatay.

²³ Ngunit gagawin ng mga Levita ang paglilingkod sa toldang tipanan at kanilang papasanin ang kanilang kasamaan; ito'y magiging tuntunin magpakailanman sa buong panahon ng inyong mga salinlahi, at sa gitna ng mga anak ni Israel ay hindi sila magkakaroon ng mana.

²⁴ Sapagkat ang ikapu ng mga anak ni Israel na kanilang ihahandog bilang handog sa PANGINOON ay aking ibinigay sa mga Levita bilang mana. Kaya't aking sinabi sa kanila, 'Sa gitna ng mga anak ni Israel ay hindi sila magkakaroon ng mana.'"

²⁵ At nagsalita ang PANGINOON kay Moises, na sinasabi,

²⁶ "Bukod dito'y sasabihin mo sa mga Levita, "Pagkuha ninyo sa mga anak ni Israel ng ikasampung bahagi na aking ibinigay sa inyo mula sa kanila bilang inyong mana, ay inyong ihahandog bilang handog na ibinigay sa PANGINOON, ang ikasampung bahagi ng ikasampung bahagi.

²⁷ Ang inyong mga handog ay ibibilang sa inyo na parang trigo ng giikan at ng kasaganaan ng pisaan ng ubas.

²⁸ Ganito rin kayo maghahandog ng handog sa PANGINOON sa inyong buong ikasampung bahagi, na inyong tinatanggap sa mga anak hi Israel; at ganito ninyo ibibigay sa paring si Aaron ang handog sa PANGINOON.'

²⁹ Sa lahat ng inyong natanggap na kaloob ay inyong ihahandog ang bawat handog na ukol sa PANGINOON, ang lahat ng pinakamabuti sa mga iyon, samakatuwid ay ang banal na bahagi niyon.

³⁰ Kaya't iyong sasabihin sa kanila, "Kapag inyong naialay na ang pinakamabuti sa handog, ang nalabi ay ibibilang sa mga Levita, na parang bunga ng giikan at parang pakinabang sa pisaan ng ubas.

³¹ Maaari ninyong kainin saanmang lugar, kayo at ang inyong mga kasambahay sapagkat ito'y inyong gantimpala dahil sa inyong paglilingkod sa toldang tipanan.

³² At hindi kayo magtataglay ng kasalanan dahil dito, kapag naialay na ninyo ang pinakamabuti sa mga iyon at huwag ninyong lalapastanganin ang mga banal na bagay ng mga anak ni Israel, upang huwag kayong mamatay."