Read Ang Bagong Ang Biblia Numbers 20 Bible Online

Numbers 20 - Ang Bagong Ang Biblia bible

Numbers 20

¹ Ang mga anak ni Israel, ang buong kapulungan, ay dumating sa ilang ng Zin nang unang buwan; at ang bayan ay nanatili sa Kadesh. Si Miriam ay namatay, at inilibing doon.

² At walang tubig na mainom ang kapulungan at sila'y nagpulong laban kina Moises at Aaron.

³ Nakipag-away ang bayan kay Moises at nagsabi, "Sana ay namatay na kami nang mamatay ang aming mga kapatid sa harap ng PANGINOON!

⁴ Bakit ninyo dinala ang kapulungan ng PANGINOON sa ilang na ito upang kami at ang aming mga hayop ay mamatay dito?

⁵ At bakit ninyo kami pinaahon mula sa Ehipto upang dalhin kami sa masamang lugar na ito? Hindi ito lugar na bukirin, o ng igos, o ng ubasan, o ng mga granada; at dito'y walang tubig na mainom."

⁶ Sina Moises at Aaron ay umalis sa harap ng kapulungan at nagtungo sa pintuan ng toldang tipanan at nagpatirapa. Ang kaluwalhatian ng PANGINOON ay nagpakita sa kanila.

⁷ Nagsalita ang PANGINOON kay Moises, na sinasabi,

⁸ "Kunin mo ang tungkod at tipunin mo ang kapulungan, ikaw at ang kapatid mong si Aaron, at magsalita kayo sa bato sa harapan nila upang magbigay ito ng kanyang tubig. Sa gayon ka maglalabas ng tubig para sa kanila mula sa bato; gayon ka magbibigay ng inumin para sa kapulungan at sa kanilang mga hayop."

⁹ At kinuha ni Moises ang tungkod sa harap ng PANGINOON, na gaya ng iniutos sa kanya.

¹⁰ Tinipon nina Moises at Aaron ang kapulungan sa harap ng malaking bato, at kanyang sinabi sa kanila, "Makinig kayo ngayon, mga mapaghimagsik! Ikukuha ba namin kayo ng tubig sa malaking batong ito?"

¹¹ Itinaas ni Moises ang kanyang kamay at dalawang ulit na hinampas ng kanyang tungkod ang malaking bato at ang tubig ay lumabas na sagana, at uminom ang kapulungan at ang kanilang mga hayop.

¹² Sinabi ng PANGINOON kina Moises at Aaron, "Sapagkat hindi kayo sumampalataya sa akin upang ipakita ang aking kabanalan sa paningin ng mga anak ni Israel, kaya't hindi ninyo dadalhin ang kapulungang ito sa lupain na aking ibinigay sa kanila."

¹³ Ito ang tubig ng Meriba; na kung saan nakipag-away ang mga anak ni Israel sa PANGINOON at ipinakita niya sa kanila na siya ay banal.

¹⁴ Si Moises ay nagsugo sa mga hari sa Edom mula sa Kadesh, "Ganito, ang sabi ng iyong kapatid na Israel, Alam mo ang lahat ng kahirapan na dumating sa amin.

¹⁵ Kung paanong ang aming mga ninuno ay pumunta sa Ehipto, at kami ay nanirahan sa Ehipto ng matagal na panahon at pinahirapan kami at ang aming mga ninuno ng mga Ehipcio.

¹⁶ Nang kami ay dumaing sa PANGINOON ay pinakinggan niya ang aming tinig, at nagsugo siya ng isang anghel, at inilabas kami sa Ehipto. At ngayon, kami ay nasa Kadesh, na isang bayan na nasa dulo ng iyong nasasakupan.

¹⁷ Ipinapakiusap ko sa iyo na paraanin mo kami sa iyong lupain. Hindi kami daraan sa kabukiran o sa ubasan, ni hindi kami iinom ng tubig sa mga balon. Kami ay daraan sa Daan ng Hari. Hindi kami liliko sa dakong kanan o sa kaliwa man hanggang sa makaraan kami sa iyong nasasakupan.'"

¹⁸ Sinabi ni Edom sa kanya, "Huwag kang daraan sa aking lupain, baka salubungin kita ng tabak."

¹⁹ At sinabi ng mga anak ni Israel sa kanya, "Kami ay aahon sa lansangan at kung kami at ang aming mga hayop ay iinom ng iyong tubig, ito ay babayaran ko. Pahintulutan mo lamang ako na makaraan. Wala ng iba pa."

²⁰ Ngunit kanyang sinabi, "Hindi ka makakaraan." Ang Edom ay lumabas laban sa kanya na may dalang maraming tao, at may malakas na hukbo.

²¹ Ganito tumanggi ang Edom na paraanin ang Israel sa kanyang nasasakupan kaya't ang Israel ay lumayo sa kanya.

²² Sila at ang buong kapulunganng mga Israelita ay naglakbay mula sa Kadesh at nakarating sa bundok ng Hor.

²³ At sinabi ng PANGINOON kina Moises at Aaron sa bundok ng Hor, sa hangganan ng lupain ng Edom,

²⁴ "Si Aaron ay ititipon sa kanyang bayan. Siya'y hindi papasok sa lupain na aking ibinigay sa mga anak ni Israel, sapagkat kayo'y naghimagsik laban sa aking utos sa tubig ng Meriba.

²⁵ Dalhin mo sina Aaron at Eleazar na kanyang anak sa bundok ng Hor.

²⁶ Hubaran mo si Aaron ng kanyang mga kasuotan at isuot mo kay Eleazar na kanyang anak at si Aaron ay ititipon sa kanyang bayan, at doon siya mamamatay."

²⁷ Ginawa ni Moises ang iniutos ng PANGINOON at sila'y umahon sa bundok ng Hor sa paningin ng buong kapulungan.

²⁸ Hinubaran ni Moises si Aaron ng kanyang mga kasuotan at isinuot kay Eleazar na kanyang anak. Namatay si Aaron doon sa tuktok ng bundok at sina Moises at Eleazar ay bumaba sa bundok.

²⁹ Nang makita ng buong kapulungan na si Aaron ay patay na, ang buong sambahayan ni Israel ay tumangis para kay Aaron sa loob ng tatlumpung araw.