Read Ang Bagong Ang Biblia Numbers 21 Bible Online

Numbers 21 - Ang Bagong Ang Biblia bible

Numbers 21

¹ Nang mabalitaan ng Cananeo, na hari ng Arad, na naninirahan sa Negeb, na ang Israel ay daraan sa Atarim, nilabanan niya ang Israel at binihag ang iba sa kanila.

² Ang Israel ay gumawa ng sumpa sa PANGINOON at nagsabi, "Kung tunay na ibibigay mo ang bayang ito sa aking kamay, aking lubos na gigibain ang kanilang mga bayan."

³ Pinakinggan ng PANGINOON ang tinig ng Israel at ibinigay sa kanila ang Cananeo. Kanilang lubos na nilipol sila at ang kanilang mga bayan. Kaya't ang ipinangalan sa dakong iyon ay Horma.

⁴ Sila'y naglakbay mula sa bundok ng Hor patungo sa Dagat na Pula upang umikot sa lupain ng Edom; at ang damdamin ng mga tao ay nainip sadaan.

⁵ Ang bayan ay nagsalita laban sa Diyos at laban kay Moises, "Bakit ninyo kami iniahon mula sa Ehipto, upang mamatay sa ilang? Sapagkat walang pagkain at walang tubig at ang kaluluwa namin ay nasusuya na sa walang kuwentang pagkaing ito."

⁶ Pagkatapos, ang PANGINOON ay nagsugo ng mga makamandag na ahas sa mga taong-bayan, at tinuklaw ng mga ito ang mga tao, kaya't marami sa Israel ang namatay.

⁷ Ang bayan ay pumunta kay Moises at nagsabi, "Kami ay nagkasala, sapagkat kami ay nagsalita laban sa PANGINOON at laban sa iyo. Idalangin mo sa PANGINOON, na kanyang alisin sa amin ang mga ahas. At idinalangin ni Moises ang bayan.

⁸ At sinabi ng PANGINOON kay Moises, "Gumawa ka ng isang makamandag na ahas at ipatong mo sa isang tikin, at bawat taong nakagat ay mabubuhay kapag tumingin doon."

⁹ Kaya't si Moises ay gumawa ng isang ahas na tanso at ipinatong sa isang tikin, at kapag may nakagat ng ahas, at tumingin ang taong iyon sa ahas na tanso ay nabubuhay.

¹⁰ Ang mga anak ni Israel ay naglakbay, at nagkampo sa Obot.

¹¹ Sila'y naglakbay mula sa Obot, at nagkampo sa Ije-abarim sa ilang na nasa tapat ng Moab, patungo sa dakong sinisikatan ng araw.

¹² Mula roon ay naglakbay sila, at nagkampo sa libis ng Zared.

¹³ Mula roon ay naglakbay sila, at nagkampo sa kabilang ibayo ng Arnon, na nasa ilang na humahantong sa hangganan ng mga Amoreo; sapagkat ang Arnon ay hangganan ng Moab, na nasa pagitan ng Moab at ng mga Amoreo.

¹⁴ Kaya't sinasabi sa aklat ng Mga Pakikipaglaban ng PANGINOON, Ang Waheb sa Sufa, at ang mga libis ng Arnon,

¹⁵ at ang tagiliran ng mga libis na hanggang sa dakong tahanan ng Ar, at humihilig sa hangganan ng Moab.

¹⁶ At mula roon ay nagpatuloy sila patungo sa Beer, na siyang balon kung saan sinabi ng PANGINOON kay Moises, "Tipunin mo ang bayan at bibigyan ko sila ng tubig."

¹⁷ Nang magkagayo'y inawit ng Israel ang awit na ito: "Bumukal ka, O balon; awitan ninyo siya!

¹⁸ Ang balong hinukay ng mga pinuno, na pinalalim ng mga maharlika ng bayan, ng kanilang setro at mga tungkod." At mula sa ilang, sila'y nagpatuloy patungo sa Matana,

¹⁹ mula sa Matana patungong Nahaliel; at mula sa Nahaliel patungong Bamot;

²⁰ mula sa Bamot patungo sa libis na nasa bukid ng Moab, sa tuktok ng Pisga, na pababa sa ilang.

²¹ Pagkatapos, ang Israel ay nagpadala ng mga sugo kay Sihon, na hari ng mga Amoreo, na sinasabi,

²² "Paraanin mo ako sa iyong lupain. Kami ay hindi liliko sa bukid o sa ubasan. Kami ay hindi iinom ng tubig mula sa mga balon; kami ay daraan sa Daan ng Hari hanggang sa makaraan kami sa iyong nasasakupan."

²³ Ngunit hindi pinahintulutan ni Sihon ang Israel na dumaan sa kanyang nasasakupan. Tinipon ni Sihon ang kanyang buong bayan, at lumabas sa ilang laban sa Israel at dumating sa Jahaz, at nilabanan ang Israel.

²⁴ Pinatay siya ng Israel sa talim ng tabak, at inangkin ang kanyang lupain mula sa Arnon hanggang Jaboc, hanggang sa mga anak ni Ammon; sapagkat ang hangganan ng mga anak ni Ammon ay matibay.

²⁵ At sinakop ng Israel ang lahat ng mga bayang ito. Ang Israel ay nanirahan sa lahat ng mga bayan ng mga Amoreo, sa Hesbon at sa lahat ng mga bayan niyon.

²⁶ Sapagkat ang Hesbon ay siyang bayan ni Sihon na hari ng mga Amoreo, na siyang nakipaglaban sa unang hari sa Moab, at sumakop ng buong lupain niyon sa kanyang kamay hanggang sa Arnon.

²⁷ Kaya't ang mga nagsasalita ng mga kawikaan ay nagsasabi, "Halina kayo sa Hesbon, itayo at itatag ang lunsod ni Sihon.

²⁸ Sapagkat may isang apoy na lumabas sa Hesbon, isang liyab mula sa bayan ni Sihon. Tinupok nito ang Ar ng Moab, ang mga panginoon sa matataas na dako ng Arnon.

²⁹ Kahabag-habag ka, Moab! Ikaw ay napahamak, O bayan ni Cemos! Hinayaan niyang maging takas ang kanyang mga anak na lalaki, at ipinabihag ang kanyang mga anak na babae, kay Sihon na hari ng mga Amoreo.

³⁰ Aming pinana sila. Ang Hesbon ay namatay hanggang sa Dibon, at aming winasak hanggang Nora, na umaabot hanggang Medeba.

³¹ Kaya't nanirahan ang Israel sa lupain ng mga Amoreo.

³² Si Moises ay nagsugo upang tiktikan ang Jazer, at kanilang sinakop ang mga bayan niyon at pinalayas nila ang mga Amoreo na naroroon.

³³ Sila'y lumiko at umahon sa daan ng Basan. Si Og na hari sa Basan ay lumabas laban sa kanila, siya at ang buong bayan niya, upang makipaglaban sa Edrei.

³⁴ Ngunit sinabi ng PANGINOON kay Moises, "Huwag mo siyang katakutan, sapagkat ibinigay ko siya sa iyong kamay, at ang buong bayan niya, at ang kanyang lupain, at iyong gagawin sa kanya ang gaya ng iyong ginawa kay Sihon na hari ng mga Amoreo, na naninirahan sa Hesbon."

³⁵ Gayon nila pinatay siya at ang kanyang mga anak, at ang buong bayan niya hanggang sa walang natira sa kanya, at kanilang inangkin ang kanyang lupain.