Read Ang Bagong Ang Biblia Numbers 25 Bible Online

Numbers 25 - Ang Bagong Ang Biblia bible

Numbers 25

¹ Samantalang ang Israel ay naninirahan sa Shittim,ang taong-bayan ay nagpasimulang makiapid sa mga anak na babae ng Moab.

² Sapagkat inanyayahan ng mga ito ang taong-bayan sa mga paghahandog sa kanilang mga diyos; at ang bayan ay kumain at yumukod sa mga diyos ng Moab.

³ Ang Israel ay nakipag-isa sa Baal ng Peor; at ang galit ng PANGINOON ay nagningas laban sa Israel.

⁴ Kaya't sinabi ng PANGINOON kay Moises, "Isama mo ang lahat ng pinuno sa bayan at bitayin mo sila sa harap ng araw sa harap ng PANGINOON, upang ang matinding galit ng PANGINOON ay mapawi sa Israel.

⁵ Sinabi ni Moises sa mga hukom sa Israel, "Patayin ng bawat isa sa inyo ang mga taong nakipag-isa sa Baal ng Peor."

⁶ At dumating ang isa sa mga anak ni Israel at nagdala sa kanyang mga kapatid ng isang babaing Midianita sa paningin ni Moises at ng buong kapulungan ng mga anak ni Israel, habang sila'y umiiyak sa pintuan ng toldang tipanan.

⁷ Nang makita ito ni Finehas, na anak ni Eleazar, na anak ng paring si Aaron, ay tumindig siya sa gitna ng kapulungan at hinawakan ang isang sibat.

⁸ Pumunta siya sa likod ng lalaking Israelita sa loob ng tolda, at tinuhog silang pareho, ang lalaking Israelita at ang babae, tagos sa katawan nito. Sa gayon ang salot ay huminto sa mga anak ni Israel.

⁹ Ang mga namatay sa salot ay dalawampu't apat na libo.

¹⁰ At nagsalita ang PANGINOON kay Moises, na sinasabi,

¹¹ "Pinawi ni Finehas na anak ni Eleazar, na anak ng paring si Aaron, ang aking galit sa mga anak ni Israel, sa paraang siya'y nanibugho dahil sa aking paninibugho sa kanila, na anupa't hindi ko nilipol ang mga anak ni Israel sa aking paninibugho.

¹² Kaya't sabihin mo, narito, ibinibigay ko sa kanya ang aking tipan ng kapayapaan.

¹³ At magiging kanya at sa binhing susunod sa kanya ang tipan ng walang hanggang pagkapari, sapagkat siya'y mapanibughuin para sa kanyang Diyos at ginawa ang pagtubos para sa mga anak ni Israel."

¹⁴ Ang pangalan ng lalaking Israelita na napatay, na pinatay na kasama ng babaing Midianita ay Zimri na anak ni Salu, na pinuno sa isang sambahayan ng mga Simeonita.

¹⁵ Ang pangalan ng babaing Midianita na napatay ay Cozbi, na anak ni Zur; siya'y pinuno sa bayan ng isang sambahayan ng mga sambayanan sa Midian.

¹⁶ Nagsalita ang PANGINOON kay Moises, na sinasabi,

¹⁷ "Guluhin ninyo ang mga Midianita, at inyong daigin sila;

¹⁸ sapagkat ginulo nila kayo ng kanilang mga pandaraya sa inyo sa nangyari sa Peor, at sa pangyayari kay Cozbi, na anak na babae ng pinuno sa Midian, na kanilang kapatid na namatay nang araw ng salot dahil sa pangyayari sa Peor.