Read Ang Bagong Ang Biblia Nahum 1 Bible Online

Nahum 1 - Ang Bagong Ang Biblia bible

Nahum 1

¹ lsang pahayag tungkol sa Ninive. Ang aklat ng pangitain ni Nahum na taga-Elkos.

² Ang PANGINOON ay mapanibughuin at naghihiganting Diyos, ang PANGINOON ay naghihiganti at puno ng poot; ang PANGINOON ay naghihiganti sa kanyang mga kaaway, at siya'y naglalaan ng poot sa kanyang mga kaaway.

³ Ang PANGINOON ay banayad sa galit ngunit may dakilang kapangyarihan, at sa anumang paraan ay hindi pawawalang-sala ng PANGINOON ang nagkasala. Ang kanyang daan ay sa ipu-ipo at sa bagyo, at ang mga ulap ay siyang alabok ng kanyang mga paa.

⁴ Kanyang sinasaway ang dagat at ito'y tinutuyo, at tinutuyo niya ang lahat ng ilog, ang Basan at Carmel ay natutuyo, at ang bulaklak ng Lebanon ay nalalanta.

⁵ Ang mga bundok ay nanginginig sa harapan niya, ang mga burol ay natutunaw; ang lupa'y nawawasak sa kanyang harapan, ang sanlibutan at ang lahat ng naninirahan doon.

⁶ Sino ang makakatayo sa harap ng kanyang galit? Sinong makakatagal sa bangis ng kanyang galit? Ang kanyang poot ay ibinubuhos na gaya ng apoy, at ang malalaking bato ay binabasag niya.

⁷ Ang PANGINOON ay mabuti, isang muog sa araw ng kaguluhan; at nakikilala niya ang mga nanganganlong sa kanya.

⁸ Ngunit sa pamamagitan ng umaapaw na baha kanyang lubos na wawakasan ang kanyang mga kaaway, at hahabulin ang kanyang mga kaaway sa kadiliman.

⁹ Ano ang inyong binabalak laban sa PANGINOON? Siya'y gagawa ng lubos na kawakasan; ang pagdadalamhati ay hindi titindig ng dalawang ulit.

¹⁰ Gaya ng mga tinik, sila'y nagkakabuhol-buhol, gaya ng mag-iinom, sila'y naglalasing; gaya ng tuyong dayami, sila'y natutupok.

¹¹ Hindi ba lumabas ang isa sa iyo na nagpanukala ng kasamaan laban sa PANGINOON, at nagpapayo ng masama?

¹² Ganito ang sabi ng PANGINOON, "Bagaman sila'y malakas at marami, sila'y puputulin at lilipas. Bagaman pinahirapan kita, hindi na kita pahihirapan pa.

¹³ At ngayo'y babaliin ko ang kanyang pamatok na nasa iyo, at aking lalagutin ang iyong mga gapos."

¹⁴ Ang PANGINOON ay nagbigay ng utos tungkol sa iyo: "Hindi na magpapatuloy ang iyong pangalan, mula sa bahay ng iyong mga diyos ay aking ihihiwalay ang larawang inanyuan at ang larawang hinulma. Aking gagawin ang iyong libingan, sapagkat ikaw ay walang halaga."

¹⁵ Narito, nasa ibabaw ng mga bundok ang mga paa niya na nagdadala ng mabubuting balita, na nagpapahayag ng kapayapaan! Ipagdiwang mo ang iyong mga kapistahan, O Juda, tuparin mo ang iyong mga panata; sapagkat ang masama. ay hindi na dadaan pa sa iyo; siya'y lubos na ititiwalag.