Read Ang Bagong Ang Biblia Zechariah 5 Bible Online

Zechariah 5 - Ang Bagong Ang Biblia bible

Zechariah 5

¹ Muli kong itinaas ang aking mga paningin at aking nakita, at narito, isang lumilipad na balumbon!

² Sinabi niya sa akin, "Ano ang iyong nakikita?" Ako'y sumagot, "Nakikita ko ang isang lumilipad na balumbon. Ang haba nito ay dalawampung siko at ang luwang nito ay sampung siko."

³ Nang magkagayo'y sinabi niya sa akin, "Ito ang sumpa na lumalabas sa ibabaw ng buong lupain; tiyak na ang bawat nagnanakaw ay mahihiwalay sa isang dako ayon doon; at bawat manunumpa na may kasinungalingan ay mahihiwalay sa kabilang dako, ayon doon.

⁴ Aking isusugo iyon, sabi ng PANGINOON ng mga hukbo, ito'y papasok sa bahay ng magnanakaw, at sa bahay ng nanunumpa ng kasinungalingan sa pangalan ko. Ito'y titira sa gitna ng kanyang bahay at uubusin ito, ang mga kahoy at mga bato."

⁵ Ang anghel na nakipag-usap sa akin ay lumapit at sinabi sa akin, "Itaas mo ang iyong paningin, at tingnan mo kung ano itong dumarating."

⁶ Aking sinabi, "Ano iyon?" Kanya namang sinabi, "Ito ang efa na dumarating." At kanyang sinabi, "Ito ang kanilang anyo sa buong lupain."

⁷ At narito, ang tinggang panakip ay itinaas at may isang babaing nakaupo sa gitna ng efa!

⁸ Kanyang sinabi, "Ito ang Kasamaan." Kanyang itinulak itong pabalik sa gitna ng efa, at ipinatong ang pabigat na tingga sa bunganga niyon.

⁹ Itinaas ko ang aking paningin, aking nakita, at lumalapit ang dalawang babae! Ang hangin ay nasa kanilang mga pakpak; sila nga'y may mga pakpak na gaya ng mga pakpak ng tagak at kanilang itinaas ang efa sa pagitan ng lupa at langit.

¹⁰ Nang magkagayo'y sinabi ko sa anghel na nakikipag-usap sa akin, "Saan nila dadalhin ang efa?"

¹¹ Sinabi niya sa akin, "Sa lupain ng Sinar upang ipagtayo ito ng bahay doon; at kapag ito'y naihanda na, ilalagay ito doon sa patungan nito."