Read Ang Bagong Ang Biblia Matthew 24 Bible Online

Matthew 24 - Ang Bagong Ang Biblia bible

Matthew 24

¹ Lumabas si Jesus sa templo at paalis na, nang lumapit sa kanya ang mga alagad niya upang ipakita sa kanya ang mga gusali ng templo.

² Ngunit siya'y sumagot at sinabi sa kanila, "Hindi ba ninyo nakikita ang lahat ng mga bagay na ito? Katotohanang sinasabi ko, walang matitira ni isang bato rito na nasa ibabaw ng ibang bato na hindi ibabagsak."

³ Samantalang siya'y nakaupo sa Bundok ng mga Olibo, lumapit sa kanya nang sarilinan ang mga alagad, na nagsasabi, "Sabihin mo sa amin, kailan mangyayari ang mga bagay na ito at ano ang tanda ng iyong pagdating, at ng katapusan ng panahon?

⁴ Sumagot si Jesus at sinabi sa kanila, "Mag-ingat kayo na huwag kayong mailigaw ng sinuman.

⁵ Sapagkat marami ang darating sa aking pangalan, na nagsasabi, 'Ako ang Cristo' at ililigaw nila ang marami.

⁶ At makakarinig kayo ng mga digmaan at ng mga bali-balita ng mga digmaan. Mag-ingat kayo na huwag kayong mangamba, sapagkat kailangang mangyari ito, subalit hindi pa ito ang wakas.

⁷ Sapagkat maglalaban ang bansa sa bansa, at ang kaharian laban sa kaharian. Magkakaroon ng taggutom at mga lindol sa iba't ibang dako.

⁸ Ngunit ang lahat ng mga ito ay pasimula lamang ng matinding paghihirap.

⁹ "Pagkatapos ay ibibigay kayo sa kapighatian at kayo'y papatayin; at kayo'y kapopootan ng lahat ng mga bansa dahil sa aking pangalan.

¹⁰ Maraming tatalikod. magtataksil at mapopoot sa isa't isa.

¹¹ Maraming bulaang propeta ang lilitaw at ililigaw nila ang marami.

¹² Dahil sa paglaganap ng kasamaan, ang pag-ibig ng marami ay lalamig.

¹³ Subalit ang magtiis hanggang sa wakas ay siyang maliligtas.

¹⁴ At ang magandang balitang ito ng kaharian ay ipahahayag sa buong daigdig bilang patotoo sa lahat ng mga bansa; at pagkatapos ay darating ang wakas.

¹⁵ "Kaya, kapag nakita ninyo ang karumaldumal na paglapastangan na sinabi sa pamamagitan ni propeta Daniel, na nakatayo sa dakong banal (unawain ng bumabasa),

¹⁶ ang mga nasa Judea ay tumakas na patungo sa mga bundok.

¹⁷ Ang nasa bubungan ay huwag nang bumaba upang kunin ang mga bagay sa loob ng kanyang bahay.

¹⁸ At ang nasa bukid ay huwag nang bumalik upang kunin ang kanyang balabal.

¹⁹ Ngunit kahabag-habag ang mga buntis at ang mga nagpapasuso sa mga araw na iyon!

²⁰ Kaya't idalangin ninyo na huwag mangyari ang pagtakas ninyo sa taglamig o sa Sabbath.

²¹ Sapagkat sa panahong iyon ay magkakaroon ng matinding paghihirap na hindi pa nangyayari buhat sa pasimula ng sanlibutan hanggang ngayon, at hindi na mangyayari kailanman.

²² At kung hindi paiikliin ang mga araw na iyon, ay walang makakaligtas na laman, subalit alang-alang sa mga hinirang ay paiikliin ang mga araw na iyon.

²³ At kung may sinumang magsabi sa inyo, 'Masdan ninyo, narito ang Cristo!' o, 'Nariyan siya!' huwag ninyong paniwalaan.

²⁴ Sapagkat lilitaw ang mga bulaang Cristo at ang mga bulaang propeta, at magpapakita ng mga dakilang tanda at mga kababalaghan, anupa't ililigaw, kung maaari, pati ang mga hinirang.

²⁵ Tingnan ninyo, ipinagpauna ko nang sinabi sa inyo.

²⁶ Kaya, kung sasabihin nila sa inyo, 'Tingnan ninyo, siya'y nasa ilang,' huwag kayong lumabas. 'Tingnan ninyo, siya'y nasa mga silid,' huwag ninyong paniwalaan.

²⁷ Sapagkat gaya ng kidlat na nanggagaling sa silangan at nagliliwanag hanggang sa kanluran, gayundin naman ang pagdating ng Anak ng Tao.

²⁸ Kung saan naroon ang bangkay, ay doon magkakatipon ang mga buwitre.

²⁹ "At pagkatapos ng paghihirap sa mga panahong iyon ay magdidilim ang araw, at ang buwan ay hindi magbibigay ng kanyang liwanag, at mahuhulog ang mga bituin mula sa langit, at yayanigin ang mga kapangyarihan sa langit.

³⁰ Pagkatapos ay lilitaw ang tanda ng Anak ng Tao sa langit, at tatangis ang lahat ng mga lipi sa lupa, at makikita nila ang Anak ng Tao na dumarating na nasa mga ulap ng langit na may kapangyarihan at dakilang kaluwalhatian.

³¹ Isusugo niya ang kanyang mga anghel na may malakas na tunog ng trumpeta at kanilang titipunin ang kanyang mga hinirang mula sa apat na hangin, mula sa isang dulo ng langit hanggang sa kabila.

³² "Kaya, pag-aralan ninyo mula sa puno ng igos ang kanyang talinghaga: kapag malambot na ang sanga nito at umuusbong na ang mga dahon, alam ninyong malapit na ang tag-araw.

³³ Gayundin naman kayo, kapag nakita ninyo ang lahat ng mga bagay na ito, alam ninyong siya'y malapit na, nasa mga pintuan na.

³⁴ Katotohanang sinasabi ko sa inyo, hindi lilipas ang lahing ito, hanggang sa maganap ang lahat ng mga bagay na ito.

³⁵ Ang langit at ang lupa ay lilipas, ngunit ang aking mga salita ay hindi lilipas.

³⁶ "Subalit tungkol sa araw at oras na iyon ay walang nakakaalam, kahit ang mga anghel sa langit, ni ang Anak kundi ang Ama lamang.

³⁷ Kung paano sa mga araw ni Noe, gayundin naman ang pagdating ng Anak ng Tao.

³⁸ Sapagkat kung paano sa mga araw na iyon bago bumaha, sila'y kumakain at umiinom, at nag-aasawa at pinag-aasawa, hanggang sa araw na pumasok si Noe sa barko,

³⁹ at hindi nila nalalaman hanggang sa dumating ang baha, at tinangay silang lahat, ay gayundin naman ang pagdating ng Anak ng Tao.

⁴⁰ Kaya, may dalawang taong pupunta sa bukid, ang isa'y kukunin, at ang isa'y iiwan.

⁴¹ May dalawang babaing magtatrabaho sa isang gilingan; ang isa'y kukunin, at ang isa'y iiwan.

⁴² Magbantay kayo, sapagkat hindi ninyo nalalaman kung anong araw darating ang inyong Panginoon.

⁴³ Ngunit unawain ninyo ito, na kung nalalaman ng puno ng sambahayan kung anong bahagi ng gabi darating ang magnanakaw, magpupuyat sana siya at hindi niya hahayaang pasukin ang kanyang bahay.

⁴⁴ Kaya, maging handa rin naman kayo, sapagkat ang Anak ng Tao ay darating sa oras na hindi ninyo inaasahan.

⁴⁵ "Sino nga ba ang tapat at matalinong alipin na inatasan ng kanyang panginoon na pangasiwaan ang kanyang sambahayan, upang magbigay sa kanila ng pagkain sa tamang panahon?

⁴⁶ Mapalad ang alipin na kung dumating ang kanyang panginoon ay maratnan siyang gayon ang kanyang ginagawa.

⁴⁷ Katotohanang sinasabi ko sa inyo, ipagkakatiwala niya sa kanya ang lahat ng kanyang ari-arian.

⁴⁸ Ngunit kung ang masamang aliping iyon ay magsabi sa kanyang puso, 'Magtatagal ang aking panginoon,'

⁴⁹ at pinasimulan niyang bugbugin ang mga kapwa niya alipin, at nakisalo at nakipag-inuman sa mga lasing,

⁵⁰ darating ang panginoon ng aliping iyon sa araw na hindi niya inaasahan, at sa oras na hindi niya nalalaman,

⁵¹ at siya'y pagpuputul-putulin at ilalagay na kasama ng mga mapagkunwari, kung saan ay magkakaroon ng pagtangis at pagngangalit ng mga ngipin.