Read Ang Bagong Ang Biblia Matthew 8 Bible Online

Matthew 8 - Ang Bagong Ang Biblia bible

Matthew 8

¹ Nang bumaba si Jesus mula sa bundok, sinundan siya ng napakaraming tao;

² at lumapit sa kanya ang isang ketongin, at lumuhod sa harapan niya na nagsasabi, "Panginoon, kung ibig mo ay malilinis mo ako."

³ Iniunat ni Jesus ang kanyang kamay, at hinawakan niya ito na nagsasabi, "Ibig ko. Maging malinis ka." At nalinis kaagad ang kanyang ketong.

⁴ At sinabi ni Jesus sa kanya, "Ingatan mong huwag sabihin kaninuman, kundi humayo ka, magpakita ka sa pari, at ihandog mo ang kaloob na ipinag-utos ni Moises bilang patotoo sa kanila."

⁵ Pagpasok niya sa Capernaum ay lumapit sa kanya ang isang senturion na nakikiusap sa kanya,

⁶ at nagsasabi, "Panginoon, ang aking alipin ay nakaratay sa bahay, lumpo, at lubha siyang nahihirapan."

⁷ Sinabi niya sa kanya, "Pupuntahan ko siya at pagagalingin."

⁸ Ngunit sumagot ang senturion at sinabi, "Panginoon, hindi ako karapat-dapat sa iyo na puntahan mo ang aking bahay, ngunit sabihin mo lamang ang salita at gagaling ang aking alipin.

⁹ Sapagkat ako ay isang taong nasa ilalim ng awtoridad na may mga kawal na nasa ilalim ko. Sinasabi ko sa isa, 'Humayo ka,' at siya ay humahayo; at sa iba naman, Halika,' at siya ay lumalapit; at sa aking alipin, 'Gawin mo ito,' at ginagawa nga niya. "

¹⁰ Nang marinig ito ni Jesus ay namangha siya, at sinabi sa mga sumusunod sa kanya, "Katotohanang sinasabi ko sa inyo, kahit sa Israel man ay hindi ako nakatagpo ng ganito kalaking pananampalataya.

¹¹ Sinasabi ko sa inyo, marami ang manggagaling sa silangan at sa kanluran at mauupong kasalo ni Abraham, ni Isaac at ni Jacob sa kaharian ng langit,

¹² ngunit ang mga anak ng kaharian ay itatapon sa kadilimang nasa labas. Doon nga ang pagtangis at pagngangalit ng mga ngipin."

¹³ Sinabi ni Jesus sa senturion, "Humayo ka na; mangyayari para sa iyo ang ayon sa iyong pananampalataya." At gumaling nga ang alipin nang oras ding iyon.

¹⁴ Nang pumasok si Jesus sa bahay ni Pedro, nakita niya ang biyenang babae nito na nakaratay dahil sa lagnat.

¹⁵ Hinawakan niya ang kamay ng babae, at nawala ang kanyang lagnat. Bumangon siya at naglingkod kay Jesus.

¹⁶ Nang gabing iyon ay dinala nila sa kanya ang maraming inaalihan ng mga demonyo. Pinalayas niya ang mga espiritu sa pamamagitan ng salita at pinagaling ang lahat ng mga may sakit.

¹⁷ Ito ay upang matupad ang sinabi sa pamamagitan ni propeta Isaias: "Kinuha niya ang ating mga sakit at pinasan niya ang ating mga karamdaman."

¹⁸ Nang makita ni Jesus ang napakaraming tao sa palibot niya, ipinag-utos niyang tumawid sa kabilang pampang.

¹⁹ Lumapit ang isang eskriba at nagsabi sa kanya, "Guro, susunod ako sa iyo saan ka man magtungo."

²⁰ Sinabi ni Jesus sa kanya, "May mga lungga ang mga asong-gubat, at ang mga ibon sa himpapawid ay may mga pugad; ngunit ang Anak ng Tao ay walang mapagpahingahan ng kanyang ulo."

²¹ Isa pa sa mga alagad ay nagsabi sa kanya, "Panginoon, hayaan mo muna akong makauwi at mailibing ko ang aking ama."

²² Ngunit sinabi sa kanya ni Jesus, "Sumunod ka sa akin; at hayaan mong ang mga patay ang maglibing sa sarili nilang mga patay."

²³ Nang makasakay si Jesus sa bangka, sumunod sa kanya ang kanyang mga alagad.

²⁴ At dumating ang isang malakas na bagyo sa dagat, anupa't matatabunan na ng alon ang bangka; ngunit siya ay natutulog.

²⁵ Lumapit sila sa kanya at siya ay ginising, na nagsasabi, "Panginoon, iligtas mo kami; mamamatay kami!"

²⁶ Sinabi niya sa kanila, "Bakit kayo natatakot, O kayong maliliit ang pananampalataya?" Kaya't bumangon siya at sinaway ang mga hangin at ang dagat, at nagkaroon ng lubos na kapayapaan.

²⁷ Kaya't namangha ang mga tao, na nagsasabi, "Anong uring tao ito na maging ang mga hangin at ang dagat ay sumusunod sa kanya?"

²⁸ Nang makarating si Jesus sa kabilang pampang, sa lupain ng mga Gadareno, ay sinalubong siya ng dalawang inaalihan ng mga demonyo na lumabas mula sa mga libingan. Napakabangis nila kaya't walang makadaan doon.

²⁹ Sila ay sumigaw na nagsasabi, "Anong gagawin mo sa amin, O Anak ng Diyos? Naparito ka ba upang pahirapan kami bago dumating ang takdang panahon?"

³⁰ Sa may kalayuan sa kanila ay may isang kawan ng maraming baboy na nanginginain.

³¹ At nagmakaawa sa kanya ang mga demonyo, na nagsasabi, "Kung palalayasin mo kami ay papuntahin mo kami sa kawan ng mga baboy."

³² Sinabi niya sa kanila, "Humayo kayo." Lumabas nga sila at pumasok sa mga baboy, at ang buong kawan ng mga baboy ay bumulusok sa bangin patungo sa dagat at namatay sila sa tubig.

³³ Tumakas ang mga tagapag-alaga ng mga iyon; at pagpasok nila sa bayan ay sinabi nila ang buong pangyayari at ang nangyari sa mga inalihan ng mga demonyo.

³⁴ Lumabas ang buong bayan upang salubungin si Jesus at pagkakita nila sa kanya, pinakiusapan nila siyang umalis sa kanilang nasasakupan.