Read Ang Bagong Ang Biblia Mark 1 Bible Online

Mark 1 - Ang Bagong Ang Biblia bible

Mark 1

¹ Ang pasimula ng ebanghelyo ni Jesu-Cristo, ang Anak ng Diyos.

² Ayon sa nasusulat sa Isaias na propeta, "Narito, ipinapadala ko ang aking sugo sa iyong unahan, na maghahanda ng iyong daan;

³ ang tinig ng isang sumisigaw sa ilang: 'Ihanda ninyo ang daan ng Panginoon, Tuwirin ninyo ang kanyang mga landas,'"

⁴ si Juan na Tagapagbautismo ay dumating sa ilang at ipinangangaral ' ang bautismo ng pagsisisi sa ikapagpapatawad ng mga kasalanan.

⁵ Pumupunta sa kanya ang mga tao mula sa buong lupain ng Judea at ang lahat ng mga taga-Jerusalem; at sila'y binabautismuhan niya sa Ilog Jordan, na nagpapahayag ng kanilang mga kasalanan.

⁶ Si Juan ay nakadamit ng balahibo ng kamelyo, may sinturong balat sa kanyang baywang, at kumakain ng mga balang at pulot-pukyutan.

⁷ At siya'y nangangaral, na nagsasabi, "Dumarating na kasunod ko ang higit na makapangyarihan kaysa akin; hindi ako karapat-dapat yumukod at magkalag ng tali ng kanyang mga sandalyas.

⁸ Binautismuhan ko kayo sa tubig, ngunit kayo'y babautismuhan niya sa Espiritu Santo."

⁹ Nang mga araw na iyon ay nanggaling si Jesus sa Nazaret ng Galilea, at siya'y binautismuhan ni Juan sa Jordan.

¹⁰ Pagkaahon niya sa tubig, nakita niyang biglang nabuksan ang kalangitan, at ang Espiritu na bumababa sa kanya na tulad sa isang kalapati.

¹¹ At may isang tinig na nagmula sa langit, "Ikaw ang minamahal kong Anak, sa iyo ako lubos na nalulugod."

¹² At agad siyang dinala ng Espiritu sa ilang.

¹³ Siya'y nasa ilang ng apatnapung araw, at tinukso siya ni Satanas. Kasama siya ng mababangis na hayop at pinaglingkuran siya ng mga anghel.

¹⁴ Pagkatapos madakip si Juan, pumunta si Jesus sa Galilea na ipinangangaral ang ebanghelyo ng Diyos,

¹⁵ na sinasabi, "Naganap na ang panahon at malapit na ang kaharian ng Diyos: kayo'y magsisi at manampalataya sa ebanghelyo."

¹⁶ Sa pagdaan ni Jesus sa tabi ng dagat ng Galilea, nakita niya sina Simon at ang kanyang kapatid na si Andres na naghahagis ng lambat sa dagat, sapagkat sila'y mga mangingisda.

¹⁷ At sinabi sa kanila ni Jesus, "Sumunod kayo sa akin at gagawin ko kayong mga mamamalakaya ng mga tao."

¹⁸ Kaagad nilang iniwan ang kanilang mga lambat at sumunod sa kanya.

¹⁹ Nang makalakad pa siya ng kaunti, nakita niya sina Santiago na anak ni Zebedeo at si Juan na kanyang kapatid na naghahayuma ng mga lambat sa kanilang bangka.

²⁰ Agad niyang tinawag sila at iniwan nila si Zebedeo na kanilang ama sa bangka na kasama ng mga upahang tauhan at sumunod sa kanya.

²¹ Nagpunta sila sa Capernaum. Nang araw ng Sabbath, kaagad siyang pumasok sa sinagoga at nagturo.

²² Namangha sila sa kanyang aral, sapagkat sila'y tinuturuan niyang tulad sa isang may awtoridad at hindi gaya ng mga eskriba.

²³ At bigla na lamang sa kanilang sinagoga ay may isang tao na may masamang espiritu; at siya'y sumigaw,

²⁴ na nagsasabi, "Anong pakialam mo sa amin, Jesus ng Nazaret? Naparito ka ba upang kami'y puksain? Alam ko kung sino ka, ang Banal ng Diyos."

²⁵ Sinaway siya ni Jesus, na nagsasabi, "Tumahimik ka, at lumabas ka sa kanya!"

²⁶ Nang kanyang mapangisay siya, ang masamang espiritu ay sumigaw nang malakas na tinig, at lumabas sa tao.

²⁷ Silang lahat ay namangha, at nagtanungan sila sa isa't isa, na sinasabi, "Ano ito? Isang bagong aral! May kapangyarihan siyang mag-utos maging sa masasamang espiritu at siya'y kanilang sinusunod."

²⁸ Agad na kumalat ang balita tungkol sa kanya sa buong palibot ng lupain ng Galilea.

²⁹ Pagkalabas sa sinagoga, pumasok sila sa bahay ni Simon at ni Andres, kasama sina Santiago at Juan.

³⁰ At ang biyenang babae ni Simon ay nakahiga na nilalagnat at agad nilang sinabi kay Jesus ang tungkol sa kanya.

³¹ Lumapit siya at hinawakan ang babae sa kamay at siya'y ibinangon. Nawala ang kanyang lagnat at siya'y naglingkod sa kanila.

³² Pagsapit ng gabi, pagkalubog ng araw, kanilang dinala sa kanya ang lahat ng mga maysakit at ang mga inaalihan ng mga demonyo.

³³ Ang buong lunsod ay nagkatipon sa may pintuan.

³⁴ At nagpagaling siya ng maraming iba't ibang may karamdaman at nagpalayas siya ng maraming demonyo. Hindi niya pinahintulutang magsalita ang mga demonyo, sapagkat siya'y kilala nila.

³⁵ Nang madaling-araw, habang madilim pa, pagbangon ni Jesus ay lumabas siya at nagtungo sa isang ilang na lugar, at doon ay nanalangin.

³⁶ Hinanap siya ni Simon at ng mga kasamahan niya.

³⁷ Siya'y natagpuan nila, at sinabi sa kanya, "Hinahanap ka ng lahat."

³⁸ Sinabi niya sa kanila, "Pumunta tayo sa iba pang mga karatig-bayan upang ako'y makapangaral din naman doon, sapagkat dahil dito ako'y naparito."

³⁹ At nagpunta siya sa buong Galilea na nangangaral sa kanilang mga sinagoga at nagpapalayas ng mga demonyo.

⁴⁰ Lumapit sa kanya ang isang ketongin na nakikiusap at nakaluhod na nagsasabi, "Kung gusto mo, maaari mo akong linisin."

⁴¹ Dahil sa awa, iniunat ni Jesus ang kanyang kamay, hinipo ang ketongin at sinabi sa kanya, "Gusto ko, maging malinis ka."

⁴² At kaagad na nawala ang kanyang ketong at siya'y naging malinis.

⁴³ Pagkatapos na mahigpit siyang binalaan, kaagad niya itong pinaalis.

⁴⁴ Sinabi niya sa kanya, "Tiyakin mong wala kang sasabihin kaninuman kundi pumunta ka at magpakita sa pari at maghandog ka para sa pagkalinis sa iyo ayon sa ipinag-utos ni Moises bilang isang patotoo sa kanila."

⁴⁵ Ngunit siya'y umalis at nagsimulang magsalita nang malaya tungkol dito at ikinalat ang balita, kaya't hindi na hayagang makapasok si Jesus sa bayan, kundi nanatili siya sa mga ilang na lugar at pinuntahan siya ng mga tao mula sa lahat ng panig.