Read Ang Bagong Ang Biblia Mark 10 Bible Online

Mark 10 - Ang Bagong Ang Biblia bible

Mark 10

¹ Mula roon. siya'y umalis at pumunta sa lupain ng Judea at sa kabila ng Jordan. At muling nagtipon ang napakaraming tao sa paligid niya at tulad ng kanyang nakaugalian, muli niyang tinuruan sila.

² Dumating ang mga Fariseo at upang subukin siya ay kanilang itinanong, "Ipinahihintulot ba sa lalaki na makipaghiwalay sa kanyang asawa?"

³ At sumagot siya sa kanila, "Ano ba ang iniutos sa inyo ni Moises?"

⁴ Sinabi nila, "Ipinahintulot ni Moises na sumulat ang isang lalaki ng kasulatan ng paghihiwalay, at makipaghiwalay sa babae."

⁵ Ngunit sinabi sa kanila ni Jesus, "Dahil sa katigasan ng inyong puso, isinulat niya ang utos na ito sa inyo.

⁶ Ngunit buhat pa sa pasimula ng paglikha, 'ginawa sila ng Diyos na lalaki at babae.'

⁷ 'Dahil dito'y iiwan ng lalaki ang kanyang ama at ina, at makikipisan sa kanyang asawa;

⁸ at ang dalawa ay magiging isang laman!' Kaya't hindi na sila dalawa, kundi isang laman.

⁹ Kaya't ang pinagsama ng Diyos ay huwag hayaang paghiwalayin ng tao."

¹⁰ Sa bahay naman ay muling tinanong siya ng mga alagad tungkol sa bagay na ito.

¹¹ At sinabi niya sa kanila, "Ang sinumang makipaghiwalay sa kanyang asawang babae at mag-asawa sa iba ay nagkakasala ng pangangalunya laban sa kanya.

¹² Kung nakipaghiwalay siya sa kanyang asawang lalaki at mag-asawa sa iba, nagkakasala siya ng pangangalunya."

¹³ At dinadala ng mga tao sa kanya ang maliliit na bata upang sila'y kanyang hipuin, ngunit sinaway sila ng mga alagad.

¹⁴ Ngunit nang ito'y makita ni Jesus, nagalit siya at sinabi sa kanila, "Hayaan ninyong lumapit sa akin ang maliliit na bata, Huwag ninyo silang pagbawalan, sapagkat sa mga ganito nauukol ang kaharian ng Diyos.

¹⁵ Tunay na sinasabi ko sa inyo, ang sinumang hindi tumanggap sa kaharian ng Diyos na tulad sa isang maliit na bata, ay hindi makakapasok doon."

¹⁶ At kinalong niya sila, ipinatong ang kanyang mga kamay sa kanila at binasbasan sila.

¹⁷ Nang siya'y naghahanda na sa kanyang paglalakbay, may isang lalaking patakbong lumapit sa kanya, at pagluhod sa kanyang harapan, siya'y tinanong, "Mabuting Guro, ano ang dapat kong gawin upang magmana ng buhay na walang hanggan?"

¹⁸ Sinabi sa kanya ni Jesus, "Bakit tinatawag mo akong mabuti? Walang mabuti kundi ang Diyos lamang.

¹⁹ Nalalaman mo ang mga utos: 'Huwag kang pumatay; Huwag kang mangalunya; Huwag kang magnakaw; Huwag kang sumaksi sa kasinungalingan; Huwag kang mandaya; Igalang mo ang iyong ama at ina.'"

²⁰ At sinabi niya sa kanya, "Guro, ang lahat ng mga bagay na ito'y aking tinupad mula pa sa aking kabataan."

²¹ Si Jesus, pagtingin sa kanya ay minahal siya at sinabi, "Isang bagay ang kulang sa iyo. Humayo ka, ipagbili mo ang lahat at ibigay mo ang salapi sa dukha, at magkakaroon ka ng kayamanan sa langit. At pumarito ka, sumunod ka sa akin."

²² Subalit siya'y nanlumo sa sinabing ito, at siya'y umalis na nalulungkot sapagkat siya'y maraming ari-arian.

²³ At sa pagtingin ni Jesus sa palibot ay sinabi niya sa kanyang mga alagad, "Napakahirap para sa mga may kayamanan na pumasok sa kaharian ng Diyos."

²⁴ At namangha ang mga alagad sa kanyang mga salita. Ngunit muling sumagot sa kanila si Jesus, "Mga anak, napakahirap pumasok sa kaharian ng Diyos.

²⁵ Mas madali pa para sa isang kamelyo ang dumaan sa butas ng isang karayom kaysa isang mayaman ang pumasok sa kaharian ng Diyos."

²⁶ Sila'y lalong nagtaka at sinabi sa kanya, "Sino nga kaya ang maliligtas?"

²⁷ Tiningnan sila ni Jesus at sinabi, "Sa mga tao, ito'y hindi maaaring mangyari ngunit hindi sa Diyos; sapagkat sa Diyos ang lahat ng mga bagay ay maaaring mangyari."

²⁸ Si Pedro ay nagsimulang magsabi sa kanya, "Tingnan mo, iniwan namin ang lahat at sumunod kami sa iyo."

²⁹ Sinabi ni Jesus, "Katotohanan ang sinasabi ko sa inyo, walang taong nag-iwan ng bahay, o mga kapatid na lalaki, o mga kapatid na babae, o ina, o ama, o mga anak, o mga bukid, dahil sa akin, at dahil sa magandang balita,

³⁰ ang hindi makakatanggap ng isandaang ulit, ngayon sa panahong ito, ng mga bahay, at mga kapatid na lalaki, mga kapatid na babae, mga ina at mga anak, at mga bukid, na may mga pag-uusig; at sa darating na panahon ay walang hanggang buhay.

³¹ Ngunit ang maraming nauuna ay mahuhuli, at ang huli ay mauuna."

³² Sila'y nasa daang paakyat sa Jerusalem at nauuna sa kanila si Jesus. Sila'y namangha at ang mga sumunod ay natakot. Muli niyang ibinukod ang labindalawa, at sinimulang isalaysay sa kanila ang mga bagay na mangyayari sa kanya

³³ na sinasabi, "Tingnan ninyo, umaahon tayo patungo sa Jerusalem at ipagkakanulo ang Anak ng Tao sa mga punong pari at sa mga eskriba. Siya'y hahatulan nila ng kamatayan, at ibibigay siya sa mga Hentil.

³⁴ Siya'y kanilang tutuyain, at duduraan, siya'y hahampasin at papatayin. Pagkaraan ng tatlong araw siya ay muling mabubuhay."

³⁵ Lumapit sa kanya sina Santiago at Juan na mga anak ni Zebedeo, na nagsasabi sa kanya, "Guro, ibig naming gawin mo sa amin ang anumang aming hingin sa iyo."

³⁶ At sinabi niya sa kanila, "Ano ang ibig ninyong gawin ko para sa inyo?"

³⁷ Sinabi nila sa kanya, "Ipagkaloob mo sa amin na makaupo kami, ang isa'y sa iyong kanan, at ang isa'y sa kaliwa, sa iyong kaluwalhatian."

³⁸ Subalit sinabi ni Jesus sa kanila, "Hindi ninyo nalalaman ang inyong hinihingi. Kaya ba ninyong uminom sa kopang aking iinuman; o mabautismuhan sa bautismo na ibinabautismo sa akin?"

³⁹ Sumagot sila, "Kaya namin." Sinabi naman ni Jesus sa kanila, "Ang kopang aking iinuman ay iinuman ninyo; at sa bautismo na ibinabautismo sa akin ay babautismuhan kayo.

⁴⁰ Ngunit ang maupo sa aking kanan o sa aking kaliwa ay hindi ako ang magkakaloob; subalit ito'y para sa kanila na pinaghandaan nito."

⁴¹ Nang marinig ito ng sampu, nagsimula silang magalit kina Santiago at Juan.

⁴² Kaya't sila'y tinawag ni Jesus at sinabi sa kanila, "Nalalaman ninyo na ang mga kinikilala upang mamuno sa mga Hentil ay tumatayong panginoon sa kanila; at ang mga dakila sa kanila ang siyang nasusunod sa kanila.

⁴³ Subalit hindi gayon sa inyo, ngunit ang sinumang ibig na maging dakila sa inyo ay kailangang maging lingkod ninyo;

⁴⁴ at ang sinumang nais na maging una ay kailangang maging alipin ng lahat.

⁴⁵ Sapagkat maging ang Anak ng Tao ay hindi naparito upang paglingkuran, kundi upang maglingkod at ibigay ang kanyang buhay na pantubos sa marami."

⁴⁶ At dumating sila sa Jerico. Habang nililisan niya ang Jerico, kasama ang kanyang mga alagad at ng napakaraming tao, isang pulubing bulag, si Bartimeo na anak ni Timeo, ay nakaupo sa tabi ng daan.

⁴⁷ Nang marinig niya na iyon ay si Jesus na taga-Nazaret, nagsimula siyang magsisigaw at magsabi, "Jesus, Anak ni David, mahabag ka sa akin!"

⁴⁸ At sinaway siya ng marami na siya'y tumahimik, ngunit siya'y lalong nagsisigaw, "Anak ni David, mahabag ka sa akin!"

⁴⁹ Tumigil si Jesus at sinabi, "Tawagin ninyo siya." Tinawag nila ang lalaking bulag na sinasabi sa kanya, "Matuwa ka. Tumayo ka; tinatawag ka niya."

⁵⁰ Pagkahagis sa kanyang balabal, nagmamadali siyang tumayo at lumapit kay Jesus.

⁵¹ Pagkatapos sinabi sa kanya ni Jesus, "Ano ang ibig mong gawin ko para sa iyo?" Sinabi ng lalaking bulag, "Rabboni,? ibig kong muling makakita."

⁵² Sinabi sa kanya ni Jesus, "Humayo ka, pinagaling ka ng iyong pananampalataya." Agad na nagbalik ang kanyang paningin at siya'y sumunod sa kanya sa daan.