Read Ang Bagong Ang Biblia Mark 12 Bible Online

Mark 12 - Ang Bagong Ang Biblia bible

Mark 12

¹ Nagsimula siyang magsalita sa kanila sa mga talinghaga. "Nagtanim ang isang tao ng isang ubasan, binakuran ang paligid nito, humukay ng pisaan ng ubas, nagtayo ng isang tore, pinaupahan iyon sa mga magsasaka, at nagpunta siya sa ibang lupain.

² Nang dumating ang kapanahunan, nagsugo siya ng isang alipin sa mga magsasaka upang kunin sa kanila ang kanyang bahagi mula sa mga bunga ng ubasan.

³ Ngunit siya'y kanilang sinunggaban, binugbog at pinaalis na walang dala.

⁴ Siya'y muling nagsugo sa kanila ng isa pang alipin at ito'y kanilang pinalo sa ulo at nilait.

⁵ Nagsugo siya ng isa pa at ito'y kanilang pinatay; gayundin sa marami pang iba. Binugbog ang ilan at ang iba'y pinatay.

⁶ Mayroon pa siyang isa, isang minamahal na anak na lalaki. Sa kahuli-hulihan siya'y kanyang isinugo sa kanila na sinasabi, 'Igagalang nila ang aking anak.'

⁷ Ngunit sinabi ng mga magsasakang iyon sa isa't isa, 'Ito ang taga-pagmana. Halikayo, patayin natin siya at magiging atin ang mana.'

⁸ At siya'y kanilang sinunggaban, pinatay, at itinapon sa labas ng ubasan.

⁹ Ano kaya ngayon ang gagawin ng may-ari ng ubasan? Siya'y darating at pupuksain ang mga magsasaka at ibibigay ang ubasan sa iba.

¹⁰ Hindi pa ba ninyo nababasa ang kasulatang ito: 'Ang batong itinakuwil ng mga nagtayo ng gusali, ay siyang naging batong panulukan.

¹¹ Ito'y gawa ng Panginoon, at ito'y kagila-gilalas sa ating mga mata?'"

¹² Nang kanilang mahalata na sinabi niya ang talinghagang ito laban sa kanila, pinagsikapan nilang hulihin siya, ngunit sila'y natakot sa maraming tao at siya'y iniwan nila at sila'y umalis.

¹³ Kanila namang sinugo sa kanya ang ilang Fariseo at Herodiano, upang siya'y mahuli nila sa pananalita.

¹⁴ At nang sila'y lumapit ay kanilang sinabi sa kanya, "Guro, nalalaman naming ikaw ay tapat at hindi ka nangingimi kaninuman; sapagkat hindi ka nagtatangi ng mga tao, kundi itinuturo mo ang daan ng Diyos ayon sa katotohanan. Matuwid bang magbayad ng buwis kay Cesar o hindi? Dapat ba kaming magbayad o hindi?"

¹⁵ Ngunit dahil alam niya ang kanilang pagkukunwari ay sinabi niya sa kanila, "Bakit ninyo ako sinusubok? Magdala kayo rito sa akin ng isang denario upang makita ko."

¹⁶ Nagdala nga sila ng isa at sinabi niya sa kanila, "Kaninong larawan at pangalan ang nakaukit?" Sinabi nila sa kanya, "Kay Cesar."

¹⁷ Kaya't sinabi sa kanila ni Jesus, "Ibigay ninyo kay Cesar ang kay Cesar at sa Diyos ang sa Diyos." At sila'y namangha sa kanya.

¹⁸ Lumapit sa kanya ang mga Saduceo na nagsasabi na walang muling pagkabuhay at siya'y kanilang tinanong, na sinasabi.

¹⁹ "Guro, isinulat para sa amin ni Moises na kung ang kapatid na lalaki ng isang lalaki ay mamatay at may maiwang asawa, at walang maiwang anak, pakakasalan ng kanyang kapatid ang kanyang asawa, at bibigyan ng anak ang kanyang kapatid.

²⁰ May pitong lalaking magkakapatid. Nag-asawa ang panganay at nang mamatay siya ay walang naiwang anak.

²¹ Pinakasalan ng pangalawa ang balo at namatay na walang naiwang anak at gayundin naman ang pangatlo.

²² At ang pito ay walang iniwang anak. Sa kahuli-hulihan, ang babae naman ang namatay.

²³ Sa muling pagkabuhay, sino sa kanila ang magiging asawa ng babae? Sapagkat siya'y naging asawa ng pito."

²⁴ Sinabi sa kanila ni Jesus, "Hindi ba't ito ang dahilan kaya kayo nagkakamali, hindi ninyo nalalaman ang mga kasulatan, o ang kapangyarihan ng Diyos?

²⁵ Sapagkat sa pagkabuhay nilang muli mula sa mga patay, hindi na sila mag-aasawa, o pag-aasawahin pa; kundi tulad sila ng mga anghel sa langit.

²⁶ Ngunit tungkol sa mga patay, na sila'y muling bubuhayin, hindi ba ninyo nabasa sa aklat ni Moises, tungkol sa mababangpunungkahoy, kung paanong sinabi sa kanya ng Diyos, 'Ako ang Diyos ni Abraham, ang Diyos ni Isaac, at ang Diyos ni Jacob?'

²⁷ Hindi siya Diyos ng mga patay, kundi ng mga buhay; maling-mali kayo."

²⁸ Lumapit ang isa sa mga eskriba, at narinig niya ang kanilang pagtatalo, at palibhasa'y nalalamang mabuti ang pagkasagot niya sa kanila ay tinanong siya, "Alin ang pangunahing utos sa lahat?"

²⁹ Sumagot si Jesus, "Ang pangunahin ay, 'Pakinggan mo Israel: Ang Panginoon nating Diyos, ang Panginoon ay iisa.

³⁰ Ibigin mo ang Panginoon mong Diyos nang buong puso mo, nang buong kaluluwa mo, nang buong pag-iisip mo, at nang buong lakas mo.'

³¹ Ang pangalawa ay ito, 'Ibigin mo ang iyong kapwa na gaya ng iyong sarili. Wala nang ibang utos na higit pang dakila sa mga ito.' "

³² Sinabi sa kanya ng eskriba, "Tama ka, Guro; katotohanan ang sinabi mo na siya'y iisa; at wala nang iba maliban sa kanya.

³³ Ang siya'y ibigin nang buong puso, buong pagkaunawa, buong lakas, at ibigin ang kapwa niya na gaya ng kanyang sarili, ay higit pa kaysa lahat ng mga handog na sinunog at mga alay."

³⁴ Nang makita ni Jesus na siya'y sumagot na may katalinuhan, sinabi niya sa kanya, "Hindi ka malayo sa kaharian ng Diyos." Pagkatapos noon, wala nang nangahas na magtanong pa sa kanya ng anuman.

³⁵ Habang nagtuturo si Jesus sa templo, ay sinabi niya, "Paanong nasasabi ng mga eskriba na ang Cristo ay anak ni David?

³⁶ Si David mismo ang nagpahayag sa pamamagitan ng Espiritu Santo, 'Sinabi ng Panginoon sa aking Panginoon, "Maupo ka sa aking kanan, hanggang sa ilagay ko ang iyong mga kaaway sa ilalim ng iyong mga paa." '

³⁷ Tinawag din siya ni David na Panginoon; kaya't paano siyang magiging anak ni David?" At ang napakaraming tao ay tuwang-tuwa na nakikinig sa kanya.

³⁸ Sinabi niya sa kanyang pagtuturo, "Mag-ingat kayo sa mga eskriba, na ibig magpalakad-lakad na may mahahabang damit, at batiin na may paggalang sa mga pamilihan.

³⁹ At ibig nila ang pangunahing upuan sa mga sinagoga at ang mga upuang pandangal sa mga handaan.

⁴⁰ Sinasakmal nila ang mga bahay ng mga babaing balo at bilang pakitang-tao, nananalangin sila ng mahahaba. Ang mga ito'y tatanggap ng lalong malaking kahatulan."

⁴¹ Umupo siya sa tapat ng kabang-yaman at minasdan ang mga taong naghuhulog ng salapi sa kabang-yaman. Maraming mayayaman ang naghuhulog ng malalaking halaga.

⁴² Dumating ang isang babaing balo at siya'y naghulog ng dalawang kusing na ang halaga'y halos isang pera.

⁴³ Pinalapit niya sa kanya ang kanyang mga alagad at sinabi sa kanila, "Katotohanang sinasabi ko sa inyo na ang dukhang balong ito ay naghulog ng higit kaysa lahat nang naghuhulog sa kabang-yaman.

⁴⁴ Sapagkat silang lahat ay naghulog mula sa kanilang kasaganaan, ngunit siya sa kanyang kasalatan ay inihulog ang lahat ng nasa kanya, ang kanyang buong kabuhayan."