Read Ang Bagong Ang Biblia Luke 13 Bible Online

Luke 13 - Ang Bagong Ang Biblia bible

Luke 13

¹ Nang panahong iyon, mayroong ilan na naroon na nagsabi sa kanya tungkol sa mga taga-Galilea, na ang dugo ng mga iyon ay inihalo ni Pilato sa mga alay nila.

² At sinabi niya sa kanila, "Akala ba ninyo na ang mga taga-Galileang iyon ay higit na makasalanan kaysa lahat ng mga taga-Galilea, dahil sila'y nagdusa nang gayon?

³ Sinasabi ko sa inyo, Hindi! Subalit malibang kayo'y magsisi, mapapahamak din kayong lahat tulad nila.

⁴ O ang labingwalo na nabagsakan ng tore sa Siloam at sila'y napatay, inaakala ba ninyo na sila'y higit na maysala kaysa lahat ng taong naninirahan sa Jerusalem?

⁵ Sinasabi ko sa inyo, Hindi! Subalit malibang kayo'y magsisi, kayong lahat ay mapapahamak ding tulad nila."

⁶ Isinalaysay niya ang talinghagang ito: "Ang isang tao ay may isang puno ng igos na nakatanim sa kanyang ubasan. Siya'y pumunta upang maghanap ng bunga roon, subalit walang nakita.

⁷ Sinabi niya sa tagapag-alaga ng ubasan, 'Tingnan ninyo, tatlong taon na akong pumaparito na humahanap ng bunga sa punong igos na ito, at wala akong makita. Putulin mo ito. Bakit sinasayang nito ang lupa?'

⁸ At sumagot siya sa kanya, 'Panginoon, hayaan mo muna sa taong ito, hanggang sa aking mahukayan sa palibot at malagyan ng pataba.

⁹ At kung ito ay magbunga sa susunod na taon, ay mabuti; subalit kung hindi, maaari mo na itong putulin.'"

¹⁰ Noon ay nagtuturo siya sa isa sa nga sinagoga nang araw ng Sabbath.

¹¹ At naroon ang isang babae na may espiritu ng karamdaman sa loob ng labingwalong taon. Siya ay baluktot at hindi niya kayang tumayo ng talagang matuwid.

¹² Nang siya'y makita ni Jesus, kanyang tinawag siya at sinabi sa kanya, "Babae, pinalaya ka na sa iyong sakit."

¹³ Ipinatong ni Jesus ang kanyang mga kamay sa kanya at kaagad siyang naunat at niluwalhati niya ang Diyos.

¹⁴ Subalit ang pinuno ng sinagoga, nagalit sapagkat si Jesus ay nagpagaling sa Sabbath, ay nagsabi sa maraming tao, "May anim na araw na dapat gumawa, pumarito kayo sa mga araw na iyon at kayo'y pagagalingin at hindi sa araw ng Sabbath."

¹⁵ At sinabi sa kanya ng Panginoon, "Kayong mga mapagkunwari! Hindi ba kinakalagan ng bawat isa sa inyo sa Sabbath ang kanyang bakang lalaki o ang kanyang asno mula sa sabsaban at ito'y inilalabas upang painumin?

¹⁶ At hindi ba dapat na ang babaing ito na anak ni Abraham, na ginapos ni Satanas sa loob ng labingwalong taon ay kalagan sa pagkagapos na ito sa araw ng Sabbath?"

¹⁷ Nang sabihin niya ang mga bagay na ito, napahiya ang lahat ng kanyang mga kaaway at nagalak ang maraming tao dahil sa lahat ng maluwalhating bagay na kanyang ginawa.

¹⁸ Sinabi niya, "Ano ang katulad ng kaharian ng Diyos at sa ano ko ito ihahambing?

¹⁹ Ito ay tulad sa isang butil ng mustasa na kinuha ng isang tao at inihasik sa kanyang halamanan. Ito'y tumubo, naging isang punung-kahoy at dumapo sa mga sanga nito ang mga ibon sa himpapawid."

²⁰ At muling sinabi niya, "Sa ano ko ihahambing ang kaharian ng Diyos?

²¹ Ito ay tulad sa pampaalsa na kinuha ng isang babae at inihalo sa tatlong takal na harina, hanggang sa ito'y nahaluang lahat ng pampaalsa."

²² Si Jesus ay nagpatuloy sa kanyang lakad sa mga bayan at mga nayon na nagtuturo habang naglalakbay patungo sa Jerusalem.

²³ At may nagsabi sa kanya, "Panginoon, kakaunti ba ang maliligtas?" At sinabi niya sa kanila,

²⁴ "Magsikap kayong pumasok sa makipot na pintuan, sapagkat sinasabi ko sa inyo na marami ang magsisikap na pumasok at hindi makakapasok.

²⁵ Kapag tumayo na ang may-ari ng bahay at maisara na ang pinto, magsisimula kayong tumayo sa labas at tutuktok sa pintuan, na magsasabi, 'Panginoon, pagbuksan mo kami.' At siya'y sasagot sa inyo, 'Hindi ko alam kung saan kayo nanggaling.'

²⁶ Kaya't magsisimula kayong magsabi, 'Kami ay kasama mong kumain at uminom at nagturo ka sa aming mga lansangan.'

²⁷ Subalit sasabihin niya, 'Hindi ko alam kung saan kayo nanggaling. Lumayas kayo, kayong lahat na gumagawa ng kasamaan!'

²⁸ Magkakaroon ng pagtangis at pagngangalit ng mga ngipin kapag nakita na ninyo sina Abraham, Isaac, Jacob at ang lahat ng mga propeta sa kaharian ng Diyos, at kayo mismo'y inihahagis sa labas.

²⁹ At may mga taong manggagaling sa silangan at kanluran, sa timog at hilaga, at uupo sa hapag sa kaharian ng Diyos.

³⁰ Sa katunayan, may mga huling magiging una at may mga unang magiging huli."

³¹ Dumating nang oras ding iyon ang ilang Fariseo na nagsabi sa kanya, "Lumabas ka na at umalis dito, sapagkat ibig kang patayin ni Herodes."

³² At sinabi niya sa kanila, "Humayo kayo at inyong sabihin sa asong-gubat na iyon, 'Narito, nagpapalayas ako ng mga demonyo at nagpapagaling ngayon at bukas, at sa ikatlong araw ay matatapos ko ang aking gawain.

³³ Gayunma'y kailangang ako'y magpatuloy sa aking lakad ngayon at bukas at sa makalawa, sapagkat hindi maaari na ang isang propeta ay mamatay sa labas ng Jerusalem.'

³⁴ O Jerusalem, Jerusalem, na pumapatay sa mga propeta at bumabato sa mga sinugo sa kanya! Makailang ulit kong ninais na tipunin ang iyong mga anak, na gaya ng pagtitipon ng inahing manok sa kanyang sariling mga sisiw sa ilalim ng kanyang mga pakpak, at ayaw ninyo!

³⁵ Tingnan ninyo, sa inyo'y iniwan ang inyong bahay. At sinasabi ko sa inyo, hindi ninyo ako makikita, hanggang sa inyong sabihin, 'Mapalad ang dumarating sa pangalan ng Panginoon.'"