Read Ang Bagong Ang Biblia Luke 20 Bible Online

Luke 20 - Ang Bagong Ang Biblia bible

Luke 20

¹ Isang araw, samantalang tinuturuan ni Jesus ang mga taong-bayan sa templo at ipinangangaral ang magandang balita, lumapit ang mga pari at ang mga eskriba na kasama ang matatanda.

² At sinabi nila sa kanya, "Sabihin mo sa amin, sa anong awtoridad mo ginagawa ang mga bagay na ito? O sino ang nagbigay sa iyo ng awtoridad na ito?"

³ Siya'y sumagot sa kanila, "Tatanungin ko rin kayo ng isang tanong, at sabihin ninyo sa akin:

⁴ Ang bautismo ba ni Juan ay mula sa langit, o mula sa mga tao?"

⁵ At sila'y nag-usapan sa isa't isa na sinasabi, "Kung sasabihin natin, 'Mula sa langit,' ay sasabihin niya, 'Bakit hindi ninyo siya pinaniwalaan?'

⁶ Subalit kung sasabihin natin, 'Mula sa mga tao,' ay babatuhin tayo ng mga taong-bayan, sapagkat sila'y napapaniwala na si Juan ay isang propeta."

⁷ Kaya't sila'y sumagot na hindi nila nalalaman kung saan iyon nagmula.

⁸ At sinabi sa kanila ni Jesus, "Hindi ko rin naman sasabihin sa inyo kung sa anong awtoridad ko ginagawa ang mga bagay na ito."

⁹ At sinimulan niyang isalaysay sa taong-bayan ang talinghagang ito: "Isang tao ang nagtanim ng ubasan. Ipinagkatiwala niya ito sa mga magsasaka, at pumunta sa ibang lupain nang mahabang panahon.

¹⁰ Nang dumating ang panahon ay nagsugo siya ng isang alipin sa mga magsasaka upang siya'y bigyan mula sa bunga ng ubasan, subalit binugbog siya ng mga magsasaka, at pinaalis na walang dala.

¹¹ Nagsugo siya ng isa pang alipin, subalit ito'y kanilang binugbog din at hiniya, at pinaalis na walang dala.

¹² At nagsugo pa siya ng ikatlo. Ito ay kanilang sinugatan at pinagtabuyan.

¹³ Pagkatapos ay sinabi ng panginoon ng ubasan, Anong gagawin ko? Susuguin ko ang minamahal kong anak, baka siya'y igagalang nila.'

¹⁴ Subalit nang makita siya ng mga magsasaka ay sinabi nila sa kanilang mga sarili, 'Ito ang tagapagmana, patayin natin siya upang ang mana ay maging atin.'

¹⁵ Kaya't kanilang itinapon siya sa labas ng ubasan at pinatay. Ano kaya ang gagawin sa kanila ng panginoon ng ubasan?

¹⁶ Siya'y darating at pupuksain niya ang mga magsasakang ito, at ibibigay ang ubasan sa iba." At nang marinig nila ito ay sinabi nila, "Huwag nawang mangyari."

¹⁷ Subalit tumingin siya sa kanila at sinabi, "Ano nga itong nasusulat, 'Ang batong itinakuwil ng mga tagapagtayo ay siyang naging batong panulok?'

¹⁸ Ang bawat mahulog sa ibabaw ng batong ito ay magkakadurug-durog, at dudurugin nito ang sinumang mabagsakan nito."

¹⁹ Pinagsikapan siyang pagbuhatan ng kamay sa oras na iyon ng mga eskriba at ng mga punong pari, sapagkat nahalata nila na sinabi niya ang talinghagang ito laban sa kanila, subalit sila'y natakot sa taong-bayan.

²⁰ Kaya't siya'y minatyagan nila at nagsugo ng mga espiya na nagkunwaring matatapat, upang siya'y hulihin sa kanyang salita, para siya'y maibigay sa mga pinuno at awtoridad ng gobernador.

²¹ At kanilang tinanong siya, "Guro, nalalaman namin na ikaw ay nagsasabi at nagtuturo ng matuwid at wala kang pinapanigang tao, kundi itinuturo mo ayon sa katotohanan ang daan ng Diyos.

²² Nararapat bang kami ay magbuwis kay Cesar, o hindi?"

²³ Subalit batid niya ang kanilang katusuhan at sinabi sa kanila,

²⁴ "Ipakita ninyo sa akin ang isang denario. Kanino ang larawan at ang nakasulat dito?" At sinabi nila, "Kay Cesar."

²⁵ At sinabi niya sa kanila, "Kung gayo'y ibigay ninyo kay Cesar ang kay Cesar, at sa Diyos ang sa Diyos."

²⁶ At hindi nila nagawang hulihin siya sa kanyang salita sa harap ng mga taong-bayan. At sa pagkamangha nila sa kanyang sagot sila ay tumahimik.

²⁷ May lumapit sa kanyang ilang Saduceo, na nagsasabing walang muling pagkabuhay.

²⁸ At kanilang tinanong siya, "Guro, isinulat ni Moises para sa amin na kung ang kapatid na lalaki ng isang tao ay mamatay, na may iniwang asawa subalit walang anak, pakakasalan ng lalaki ang balo at bibigyan ng anak ang kanyang kapatid.

²⁹ Ngayon, mayroong pitong magkakapatid na lalaki. Nag-asawa ang panganay, at namatay na walang anak;

³⁰ gayundin ang pangalawa;

³¹ at pinakasalan ng pangatlo ang babae, at namatay ang pito na pawang walang iniwang anak.

³² Pagkatapos ay namatay naman ang babae.

³³ Kaya't sa muling pagkabuhay, sino ang magiging asawa ng babaing iyon sapagkat siya'y naging asawa ng pito.

³⁴ At sinabi sa kanila ni Jesus, "Ang mga anak ng panahong ito ay nag-aasawa at pinag-aasawa,

³⁵ subalit ang mga itinuturing na karapat-dapat makaabot sa panahong iyon at sa muling pagkabuhay mula sa mga patay, ay hindi nag-aasawa o pinag-aasawa.

³⁶ Hindi na sila mamamatay pa, sapagkat katulad na sila ng mga anghel at sila'y mga anak ng Diyos, palibhasa'y mga anak ng muling pagkabuhay.

³⁷ Subalit ang tungkol sa muling pagkabuhay ng mga patay ay ipinakita maging ni Moises sa kasaysayan tungkol sa mababang punungkahoy, na doon ay tinawag niya ang Panginoon na Diyos ni Abraham, Diyos ni Isaac, at Diyos ni Jacob.

³⁸ Ngunit siya'y hindi Diyos ng mga patay, kundi ng mga buhay, sapagkat sa kanya silang lahat ay nabubuhay."

³⁹ At ang ilan sa mga eskriba ay sumagot, "Guro, mahusay ang iyong pagsagot."

⁴⁰ Sapagkat hindi na sila nangahas magtanong pa sa kanya ng anuman.

⁴¹ Kaya't sinabi niya sa kanila, "Paano nila nasasabi na ang Cristo ay anak ni David?

⁴² Gayong si David mismo ang nagsasabi sa aklat ng Mga Awit, 'Sinabi ng Panginoon sa aking Panginoon; "Maupo ka sa aking kanan,

⁴³ hanggang sa ang iyong mga kaaway ay gawin kong tuntungan ng iyong mga paa."'

⁴⁴ Tinatawag siya ni David na Panginoon, kaya't paanong siya'y naging anak niya?"

⁴⁵ At sa pandinig ng lahat ng mga tao ay sinabi niya sa kanyang mga alagad,

⁴⁶ "Mag-ingat kayo sa mga eskriba na nagnanais lumakad na may mahahabang damit, at gustung-gusto ang mga pagpupugay sa mga pamilihan, ang pangunahing upuan sa mga sinagoga, at ang mga mararangal na lugar sa mga handaan.

⁴⁷ Nilalamon nila ang mga bahay ng mga balo, at sa pagkukunwari ay nananalangin sila ng mahahaba. Sila ay tatanggap ng lalong malaking kahatulan."