Read Ang Bagong Ang Biblia Luke 23 Bible Online

Luke 23 - Ang Bagong Ang Biblia bible

Luke 23

¹ Tumindig ang buong karamihan at dinala si Jesus harap ni Pilato.

² Nagsimula silang ipagsakdal siya na sinasabi, "Natagpuan namin ang taong ito na inililigaw ang aming bansa, at pinagbabawalan kaming magbuwis kay Cesar, at sinasabi na siya mismo ang Cristo, ang hari."

³ At tinanong siya ni Pilato, "Ikaw ba ang Hari ng mga Judio?" Sumagot siya at sinabi, "Ikaw ang nagsasabi."

⁴ Sinabi ni Pilato sa mga punong pari at sa mga tao, "Wala akong makitang kasalanan sa taong ito."

⁵ Subalit sila'y lalong nagpipilit na sinasabi, "Ginugulo niya ang sambayanan at nagtuturo sa buong Judea, magbuhat sa Galilea hanggang sa dakong ito."

⁶ Nang marinig ito ni Pilato, itinanong niya kung ang taong iyon ay taga-Galilea.

⁷ At nang kanyang malaman na siya'y sakop ni Herodes, kanyang ipinadala siya kay Herodes, na nang panahong iyon ay nasa Jerusalem din.

⁸ Nang makita ni Herodes si Jesus, siya ay tuwang-tuwa, sapagkat matagal na niyang nais na makita siya sapagkat nakabalita siya ng tungkol sa kanya; at siya'y umaasang makakita ng ilang himalang ginawa niya.

⁹ Kaya't kanyang tinanong siya ng matagal subalit si Jesus ay hindi sumagot ng anuman.

¹⁰ Ang mga punong pari at ang mga eskriba ay nanatili, at marahas siyang pinagbibintangan.

¹¹ At hinamak siya at nilibak ni Herodes at ng mga kawal na kasama niya. Sinuotan siya ng maringal na damit at ibinalik kay Pilato.

¹² Nang araw ding iyon ay naging magkaibigan si Herodes at si Pilato sa isa't isa; sapagkat sila'y dating magkagalit.

¹³ Tinipon ni Pilato ang mga punong pari, ang mga pinuno at ang mga taong-bayan,

¹⁴ at sinabi sa kanila, "Dinala ninyo sa akin ang taong ito na gaya ng isang nag-uudyok na maghimagsik ang bayan. At narito, nang aking siyasatin siya sa harapan ninyo, hindi ko nakitang nagkasala ang taong ito ng alinman sa mga bagay na ibinibintang ninyo laban sa kanya.

¹⁵ Maging si Herodes man, sapagkat kanyang ibinalik siya sa atin at tingnan ninyo, wala siyang ginawang anumang nararapat sa kamatayan.

¹⁶ Kaya't siya'y aking ipapahagupit at palalayain."

¹⁷ [Kinakailangan nga niyang sa kanila’y magpakawala ng isang bilanggp sa kapistahan.]

¹⁸ Subalit silang lahat ay sama-samang sumigaw, "Alisin ang taong ito, palayain si Barabas para sa amin."

¹⁹ Ito'y isang taong nabilanggo dahil sa isang paghihimagsik na nangyari sa lunsod, at dahil sa pagpatay ng tao.

²⁰ Si Pilato'y muling nagsalita sa kanila sa kagustuhang palayain si Jesus.

²¹ Subalit sila'y nagsigawan, "Ipako sa krus, ipako siya sa krus."

²² Sa ikatlong pagkakataon ay kanyang sinabi sa kanila, "Bakit, anong kasamaan ang ginawa ng taong ito? Wala akong nakitang anumang batayan para sa parusang kamatayan. Kaya't siya'y aking ipapahagupit at saka palalayain."

²³ Subalit pinipilit nilang hingin na ipinagsisigawan na siya'y ipako sa krus. At nanaig ang kanilang mga tinig.

²⁴ At ipinasiya ni Pilato na ipagkaloob ang kanilang hinihingi.

²⁵ Pinalaya niya ang taong kanilang hinihiling, ang taong ibinilanggo dahil sa paghihimagsik at sa pagpatay, subalit kanyang ibinigay si Jesus gaya ng nais nila.

²⁶ Habang kanilang dinadala siyang papalayo, hinuli nila si Simon na taga-Cirene na nanggaling sa bukid, at ipinasan sa kanya ang krus upang dalhin kasunod ni Jesus.

²⁷ Siya'y sinundan ng napakaraming tao, at ng mga babaing nagdadalamhati at nag-iiyakan para sa kanya.

²⁸ Subalit humarap sa kanila si Jesus at sinabi, "Mga anak na babae ng Jerusalem, huwag ninyo akong iyakan, kundi iyakan ninyo ang inyong mga sarili at ang inyong mga anak.

²⁹ Sapagkat narito, darating ang mga araw, na kanilang sasabihin, 'Mapapalad ang mga baog, at ang mga tiyan na kailanma'y hindi nagdalang-tao, at ang mga dibdib na kailanman ay hindi nagpasuso!'

³⁰ At sila'y magpapasimulang magsalita sa mga bundok, 'Bumagsak kayo sa amin,' at sa mga burol, Takpan ninyo kami.'

³¹ Sapagkat kung ginagawa nila ang mga bagay na ito kapag ang punungkahoy ay sariwa, anong mangyayari kapag ito ay tuyo?

³² Dinala rin upang pataying kasama niya ang dalawang kriminal.

³³ Nang dumating sila sa lugar na tinatawag na Bungo, kanilang ipinako siya sa krus, kasama ng mga kriminal, isa sa kanyang kanan at isa sa kanyang kaliwa.

³⁴ [Sinabi ni Jesus, "Ama, patawarin mo sila, sapagkat hindi nila nalalaman ang kanilang ginagawa."] At sila ay nagpalabunutan upang paghatian ang kanyang damit.

³⁵ Nakatayong nanonood ang taong-bayan. Subalit tinutuya naman siya ng mga pinuno, na sinasabi, "Iniligtas niya ang iba, iligtas niya ang kanyang sarili kung siya ang Cristo ng Diyos, ang Pinili."

³⁶ Nililibak din siya ng mga kawal na lumapit sa kanya, at inalok siya ng suka,

³⁷ at sinasabi, "Kung ikaw ang Hari ng mga Judio, iligtas mo ang iyong sarili!"

³⁸ Mayroon ding nakasulat na pamagat sa itaas niya, "Ito'y ang Hari ng mga Judio."

³⁹ Patuloy siyang pinagtawanan ng isa sa mga kriminal na ipinako, na nagsasabi, "Hindi ba ikaw ang Cristo? Iligtas mo ang iyong sarili at kami!"

⁴⁰ Subalit sinaway siya ng isa, at sa kanya'y sinabi, "Hindi ka pa ba natatakot sa Diyos, yamang ikaw ay nasa gayunding hatol ng kaparusahan?

⁴¹ Tayo ay nahatulan ng matuwid, sapagkat tinanggap natin ang nararapat na kabayaran sa ating mga gawa. Subalit ang taong ito'y hindi gumawa ng anumang masama."

⁴² Sinabi niya, "Jesus, alalahanin mo ako, pagdating mo sa iyong kaharian."

⁴³ At sumagot siya, "Katotohanang sinasabi ko sa iyo, ngayon ikaw ay makakasama ko sa Paraiso."

⁴⁴ Nang magtatanghaling-tapat na, nagdilim sa ibabaw ng buong lupain hanggang sa ikatlo ng hapon,

⁴⁵ habang madilim ang araw; at napunit sa gitna ang tabing ng templo.

⁴⁶ Si Jesus ay sumigaw ng malakas at nagsabi, "Ama, sa mga kamay mo ay inihahabilin ko ang aking espiritu." At pagkasabi nito ay nalagot ang kanyang hininga.

⁴⁷ Nang makita ng senturion ang nangyari, pinuri niya ang Diyos at sinabi, "Tunay na ito'y isang taong matuwid."

⁴⁸ At ang lahat ng mga taong nagkatipon upang makita ang panoorin, nang makita nila ang mga bagay na nangyari ay umuwing dinadagukan ang kanilang mga dibdib.

⁴⁹ At ang lahat ng mga kakilala niya at ang mga babaing sa kanya'y sumunod buhat sa Galilea ay nakatayo sa malayo at nakita ang mga bagay na ito.

⁵⁰ Mayroong isang mabuti at matuwid na lalaking ang pangalan ay Jose, na bagaman kaanib ng sanggunian,

⁵¹ ay hindi sang-ayon sa kanilang panukala at gawa. Siya'y mula sa Arimatea, isang bayan ng mga Judio, at siya'y naghihintay sa kaharian ng Diyos.

⁵² Ang taong ito'y lumapit kay Pilato at hiningi ang bangkay ni Jesus.

⁵³ At ito'y ibinaba niya, binalot ng isang telang lino, at inilagay sa isang libingang hinukay sa bato, na doo'y wala pang naililibing.

⁵⁴ Noo'y araw ng Paghahanda, at malapit na ang Sabbath.

⁵⁵ Ang mga babae na sumama sa kanya mula sa Galilea ay sumunod at tiningnan ang libingan at kung paano inilagay ang kanyang bangkay.

⁵⁶ Sila'y umuwi at naghanda ng mga pabango at mga panghaplos. At nang araw ng Sabbath sila'y nagpahinga ayon sa kautusan.