Read Ang Bagong Ang Biblia Luke 4 Bible Online

Luke 4 - Ang Bagong Ang Biblia bible

Luke 4

¹ Si Jesus, na puno ng Espiritu Santo, ay bumalik mula sa Jordan at dinala ng Espiritu sa ilang,

² na doon ay tinukso siya ng diyablo sa loob ng apatnapung araw. Hindi siya kumain ng anuman sa mga araw na iyon, at nang makalipas ang mga araw na iyon ay nagutom siya.

³ Sinabi sa kanya ng diyablo, "Kung ikaw ang Anak ng Diyos, ipag-utos mo na ang batong ito ay maging tinapay."

⁴ At sumagot sa kanya si Jesus, "Nasusulat, 'Ang tao ay hindi nabubuhay sa tinapay lamang.' "

⁵ Pagkatapos ay dinala siya ng diyablo sa isang mataas na lugar at ipinakita sa kanya sa isang saglit ang lahat ng mga kaharian sa sanlibutan.

⁶ At sinabi sa kanya ng diyablo, "Ibibigay ko sa iyo ang lahat ng kapangyarihang ito, at ang kaluwalhatian nila, sapagkat ito'y naibigay na sa akin, at ibinibigay ko kung kanino ko ibig.

⁷ Kaya't kung sasamba ka sa akin, ang lahat ng ito ay magiging iyo."

⁸ At sumagot si Jesus sa kanya, "Nasusulat, 'Sambahin mo ang Panginoon mong Diyos, at siya lamang ang iyong paglingkuran. "

⁹ Pagkatapos ay kanyang dinala siya sa Jerusalem at inilagay siya sa tuktok ng templo, at sinabi sa kanya, "Kung ikaw ang Anak ng Diyos, magpatihulog ka mula rito,

¹⁰ sapagkat nasusulat, 'Ipagbibilin ka niya sa mga anghel na ikaw ay ingatan,

¹¹ at, 'Aalalayan ka nila ng kanilang mga kamay, baka masaktan mo ang iyong paa sa isang bato'

¹² At sumagot si Jesus sa kanya, "Sinasabi, 'Huwag mong tutuksuhin ang Panginoon mong Diyos.' "

¹³ Nang matapos na ng diyablo ang lahat ng panunukso, lumayo siya sa kanya hanggang sa isa pang pagkakataon.

¹⁴ Bumalik si Jesus sa Galilea na nasa kapangyarihan ng Espiritu at kumalat ang balita tungkol sa kanya sa palibot ng buong lupain.

¹⁵ Nagturo siya sa kanilang mga sinagoga at pinuri ng lahat.

¹⁶ Dumating siya sa Nazaret na kanyang nilakhan. Siya'y pumasok sa sinagoga nang araw ng Sabbath, tulad ng kanyang nakaugalian at tumindig siya upang bumasa,

¹⁷ at ibinigay sa kanya ang aklat ni propeta Isaias. Binuksan niya ang aklat, at natagpuan ang dako na kung saan ay nasusulat:

¹⁸ "Ang Espiritu ng Panginoon ay nasa akin, sapagkat ako'y hinirangr niya upang ipangaral ang magandang balita sa mga dukha. Ako'y sinugo niya upang ipahayag ang paglaya sa mga bihag, at ang muling pagkakaroon ng paningin sa mga bulag, upang palayain ang mga naaapi,

¹⁹ upang ipahayag ang taon ng biyayas mula sa Panginoon."

²⁰ Isinara niya ang aklat, isinauli ito sa tagapaglingkod at naupo. At ang mga mata ng lahat ng nasa sinagoga ay nakatutok sa kanya.

²¹ At siya'y nagsimulang magsabi sa kanila, "Ngayo'y naganap ang kasulatang ito sa inyong pandinig."

²² Lahat ay nagsalita ng mabuti tungkol sa kanya at namangha sa mga mapagpalang salita na lumabas sa kanyang bibig. At sinabi nila, "Hindi ba ito ay anak ni Jose?"

²³ Sinabi niya sa kanila, "Tiyak na sasabihin ninyo sa akin ang kawikaang ito, 'Manggagamot, pagalingin mo ang iyong sarili.' Ang anumang aming narinig na ginawa mo sa Capernaum ay gawin mo rin sa iyong lupain."

²⁴ Sinabi niya, "Sinasabi ko sa inyo ang katotohanan, walang propetang tinatanggap sa kanyang sariling bayan.

²⁵ Ngunit ang totoo, maraming babaing balo sa Israel noong panahon ni Elias, nang sarhan ang langit sa loob ng tatlong taon at anim na buwan at nagkaroon ng malubhang taggutom sa buong lupain.

²⁶ Ngunit si Elias ay hindi sinugo sa kaninuman sa kanila, kundi sa isang babaing balo sa Zarefta, sa lupain ng Sidon.

²⁷ Maraming ketongin sa Israel nang panahon ni propeta Eliseo, at walang sinumang nilinis sa kanila, maliban kay Naaman na taga-Siria."

²⁸ Nang marinig nila ang mga bagay na ito, napuno ng galit ang lahat ng nasa sinagoga.

²⁹ Sila'y tumindig, ipinagtabuyan siya sa labas ng bayan at dinala siya hanggang sa taluktok ng burol na kinatatayuan ng kanilang bayan, upang siya'y ihulog nila nang patiwarik.

³⁰ Ngunit dumaan siya sa gitna nila at siya'y umalis.

³¹ Siya'y bumaba sa Capernaum, na isang bayan ng Galilea. At siya'y nagturo sa kanila sa araw ng Sabbath.

³² Sila'y namangha sa kanyang pagtuturo, sapagkat ang kanyang salita ay may kapangyarihan.

³³ Sa sinagoga ay may isang lalaki na may espiritu ng karumaldumal na demonyo, at siya'y sumigaw nang malakas na tinig,

³⁴ "Ah! anong pakialam mo sa amin, Jesus na taga-Nazaret? Pumarito ka ba upang kami'y puksain? Kilala kita kung sino ka, ang Banal ng Diyos."

³⁵ Subalit sinaway siya ni Jesus, at sinabi, "Tumahimik ka at lumabas sa kanya!" At nang ang lalaki ay nailugmok ng demonyo sa gitna nila, ay lumabas siya sa lalaki na hindi ito sinaktan.

³⁶ Namangha silang lahat at sinabi sa isa't isa, "Anong salita ito? Sapagkat may awtoridad at kapangyarihang inuutusan niya ang masasamang espiritu at lumalabas sila."

³⁷ Kumalat ang balita tungkol sa kanya sa lahat ng dako sa palibot ng lupaing iyon.

³⁸ Umalis siya sa sinagoga at pumasok sa bahay ni Simon. Noon ay mataas ang lagnat ng biyenang babae ni Simon at pinakiusapan nila si Jesus para sa kanya.

³⁹ Tumayo si Jesus sa tabi niya at kanyang sinaway ang lagnat at umalis ito sa kanya. Kaagad siyang tumayo at naglingkod sa kanila.

⁴⁰ Nang lumulubog na ang araw, dinala ng lahat sa kanya ang kanilang mga maysakit na sari-sari ang karamdaman at ipinatong niya ang kanyang mga kamay sa bawat isa sa kanila at sila'y pinagaling.

⁴¹ Lumabas din sa marami ang mga demonyo na nagsisisigaw, "Ikaw ang Anak ng Diyos!" Subalit kanyang sinaway sila, at hindi sila pinahintulutang magsalita, sapagkat alam nilang siya ang Cristo.

⁴² Kinaumagahan, umalis siya at nagtungo sa isang ilang na pook. Hinanap siya ng napakaraming tao, at lumapit sa kanya. Nais nilang pigilin siya upang huwag niyang iwan sila.

⁴³ Subalit sinabi niya sa kanila, "Kailangan ko ring ipangaral sa ibang bayan ang magandang balita ng kaharian ng Diyos, sapagkat ako ay sinugo para sa layuning ito."

⁴⁴ Kaya't siya'y patuloy na nangaral sa mga sinagoga ng Judea.