Read Ang Bagong Ang Biblia Acts 23 Bible Online

Acts 23 - Ang Bagong Ang Biblia bible

Acts 23

¹ Habang nakatitig na mabuti si Pablo sa Sanhedrin, ay sinabi niya, "Mga ginoo, mga kapatid, hanggang sa mga araw na ito, ako'y nabuhay nang may malinis na budhi sa harapan ng Diyos."

² Pagkatapos, ipinag-utos ng pinakapunong paring si Ananias sa mga nakatayong malapit sa kanya na siya'y hampasin sa bibig.

³ Nang magkagayo'y sinabi sa kanya ni Pablo, "Sasaktan ka ng Diyos, ikaw na pinaputing pader! Nakaupo ka ba riyan upang ako'y hatulan ayon sa kautusan, ngunit ako'y ipinahahampas mo nang labag sa kautusan?"

⁴ Sinabi ng mga nakatayo sa malapit, "Nilalait mo ba ang pinakapunong pari ng Diyos?"

⁵ At sinabi ni Pablo, "Hindi ko alam, mga kapatid, na siya'y pinakapunong pari, sapagkat nasusulat, 'Huwag mong pagsasalitaan ng masama ang isang pinuno ng iyong bayan.' "

⁶ Nang mapansin ni Pablo na ang ilan ay mga Saduceo at ang iba'y mga Fariseo, ay sumigaw siya sa Sanhedrin, "Mga ginoo, mga kapatid, ako'y isang Fariseo, anak ng mga Fariseo. Ako'y nililitis tungkol sa pag-asa at muling pagkabuhay ng mga patay."

⁷ Nang sabihin niya ito, nagkaroon ng pagtatalo ang mga Fariseo at mga Saduceo; at nahati ang kapulungan.

⁸ (Sapagkat sinasabi ng mga Saduceo na walang muling pagkabuhay, o anghel, o espiritu; ngunit pinaniniwalaan ng mga Fariseo ang lahat ng ito.)

⁹ Pagkatapos ay nagkaroon ng malakas na sigawan, at tumindig ang ilan sa mga eskriba na kakampi ng mga Fariseo, at mainitang nagtalo na sinasabi, "Wala kaming makitang anumang kasalanan sa taong ito. Ano nga kung siya'y kinausap man ng isang espiritu, o ng isang anghel?"

¹⁰ Nang lumalaki ang kaguluhan, sa takot ng pinunong kapitan na baka lurayin nila si Pablo, ay pinababa ang mga kawal, sapilitang ipinakuha siya at siya'y ipinasok sa himpilan.

¹¹ Nang gabing iyon, lumapit sa kanya ang Panginoon at sinabi, "Lakasan mo ang iyong loob! Sapagkat kung paano kang nagpatotoo tungkol sa akin sa Jerusalem, ay kailangang magpatotoo ka rin sa Roma."

¹² Kinaumagahan, nagkatipon ang mga Judio, at nagsabwatan sa pamamagitan ng isang sumpa, na hindi sila kakain ni iinom man hanggang sa kanilang mapatay si Pablo.

¹³ Mahigit sa apatnapu ang sumama sa sabwatang ito.

¹⁴ Pumunta sila sa mga punong pari at sa matatanda, at nagsabi, "Kami ay namanata sa ilalim ng mahigpit na sumpa, na hindi titikim ng anumang pagkain hanggang sa mapatay namin si Pablo.

¹⁵ Kaya't kayo, pati ang Sanhedrin ay sabihan ninyo ang punong kapitan na kanyang ibaba siya sa inyo, na kunwari'y ibig ninyong siyasatin ng lalong ganap ang paratang tungkol sa kanya. At nakahanda na kaming patayin siya bago siya lumapit."

¹⁶ Ngunit narinig ng anak na lalaki ng kapatid na babae ni Pablo ang tungkol sa kanilang pag-aabang kaya siya'y pumunta sa himpilan at ibinalita kay Pablo.

¹⁷ At tinawag ni Pablo ang isa sa mga senturion, at sinabi, "Dalhin mo ang binatang ito sa punong kapitan sapagkat siya'y mayroong sasabihin sa kanya."

¹⁸ Kaya't siya'y isinama at dinala sa punong kapitan, at sinabi, "Tinawag ako ng bilanggong si Pablo, at ipinakiusap sa aking dalhin ko sa iyo ang binatang ito na mayroong sasabihin sa iyo."

¹⁹ At hinawakan siya sa kamay ng punong kapitan at sa isang tabi ay lihim na tinanong siya, "Ano ang sasabihin mo sa akin?"

²⁰ Sinabi niya, "Pinagkasunduan ng mga Judio na sa iyo'y ipakiusap na iyong dalhin bukas si Pablo sa Sanhedrin, na kunwari'y may sisiyasatin pa silang mabuti tungkol sa kanya.

²¹ Subalit huwag kang maniniwala sa kanila, sapagkat mahigit na apatnapu sa kanilang mga tao ang nag-aabang sa kanya. Sila'y namanata sa ilalim ng isang sumpa na hindi kakain ni iinom man hanggang sa siya'y kanilang mapatay. Ngayo'y handa na sila at naghihintay ng iyong pagsang-ayon."

²² Kaya't pinaalis ng punong kapitan ang binata, at ipinagbilin sa kanya, "Huwag mong sasabihin kaninuman na ipinagbigay-alam mo sa akin ang mga bagay na ito."

²³ Pagkatapos ay kanyang tinawag ang dalawa sa mga senturion, at sinabi, "Sa ikatlong oras ng gabi, ihanda ninyo ang dalawangdaang kawal kasama ang pitumpung mangangabayo at dalawangdaang may sibat upang magtungo sa Cesarea.

²⁴ Ipaghanda rin ninyo sila ng mga hayop na masasakyan ni Pablo, at siya'y ihatid na ligtas kay Felix na gobernador."

²⁵ At siya'y sumulat ng isang sulat, na ganito:

²⁶ "Si Claudio Lisias sa kagalang-galang na gobernador Felix, ay bumabati.

²⁷ Ang taong ito'y hinuli ng mga Judio, at papatayin sana nila, ngunit nang malaman kong siya'y mamamayan ng Roma dumating ako na may kasamang mga kawal at siya'y iniligtas ko.

²⁸ At sa pagnanais kong malaman ang dahilan kung bakit siya'y kanilang isinakdal, ay dinala ko siya sa kanilang Sanhedrin.

²⁹ Nalaman ko na siya'y kanilang isinasakdal tungkol sa mga usaping may kinalaman sa kanilang kautusan, ngunit walang anumang paratang laban sa kanya na marapat sa kamatayan o sa mga tanikala.

³⁰ Nang ipaalam sa akin na may banta laban sa taong iyan, ipinadala ko siya agad sa iyo, at aking ipinag-utos din sa mga nagsasakdal sa kanya na sabihin sa harapan mo ang laban sa kanya."

³¹ Kaya't kinuha si Pablo ng mga kawal, ayon sa iniutos sa kanila, at nang gabi ay dinala siya sa Antipatris.

³² Nang sumunod na araw, pinabayaan nilang samahan siya ng mga mangangabayo, samantalang sila'y nagbalik sa himpilan.

³³ Nang makarating sila sa Cesarea at maibigay ang sulat sa gobernador, iniharap din nila si Pablo sa kanya.

³⁴ At pagkabasa sa sulat, itinanong niya kung taga-saang lalawigan siya at nang malaman niya na siya'y taga-Cilicia,

³⁵ ay sinabi niya, "Papakinggan kita pagdating ng mga nagsakdal sa iyo." At ipinag-utos niya na siya'y bantayan sa palasyo ni Herodes.