Read Ang Bagong Ang Biblia Joshua 6 Bible Online

Joshua 6 - Ang Bagong Ang Biblia bible

Joshua 6

¹ Ang Jerico nga ay ganap na nakasara dahil sa mga anak ni Israel, walang nakakalabas at walang nakakapasok.

² At sinabi ng PANGINOON kay Josue, "Tingnan mo, ibinigay ko na sa iyong kamay ang Jerico, ang hari nito at ang mga mandirigma.

³ Lilibutin ninyo ang buong lunsod, lahat ng mga lalaking mandirigma ay liligid na minsan sa lunsod. Gagawin ninyo ito sa loob ng anim na araw.

⁴ Ang pitong pari ay magdadala ng pitong tambuli na mga sungay ng tupa sa unahan ng kaban; at sa ikapitong araw ay inyong paliligiran ng pitong ulit ang bayan at hihipan ng mga pari ang mga tambuli.

⁵ Kapag hinipan na nila nang matagal ang sungay ng tupa, at kapag inyong narinig ang tunog ng tambuli ay sisigaw nang malakas ang buong bayan. Ang pader ng lunsod ay guguho at ang buong bayan ay tuluy-tuloy na sasalakay."

⁶ Kaya't tinawag ni Josue na anak ni Nun ang mga pari at sinabi sa kanila, "Buhatin ninyo ang kaban ng tipan; pitong pari ang magdala ng pitong tambuli na mga sungay ng tupa sa unahan ng kaban ng PANGINOON."

⁷ At kanyang sinabi sa bayan, "Sumulong kayo at lumakad sa palibot ng lunsod; at palakarin ninyo ang mga lalaking may sandata sa unahan ng kaban ng PANGINOON."

⁸ Nang makapagsalita na si Josue sa bayan, ang pitong pari na may dalang pitong tambuli na mga sungay ng tupa sa harapan ng PANGINOON ay lumakad na pasulong at hinipan ang mga tambuli; at ang kaban ng tipan ng PANGINOON ay sumunod sa kanila.

⁹ Ang mga lalaking may sandata ay nauna sa mga pari na humihihip ng mga tambuli, at ang bantay sa likuran ay sumusunod sa kaban, habang ang mga tambuli ay patuloy na hinihipan.

¹⁰ At iniutos ni Josue sa bayan, "Huwag kayong sisigaw, ni maririnig ang inyong tinig, ni magsasalita ng anumang salita hanggang sa araw na aking sabihing kayo'y sumigaw; at saka lamang kayo sisigaw."

¹¹ Kaya't kanyang inilibot na minsan sa lunsod ang kaban ng PANGINOON. Sila'y pumasok sa kampo at nagpalipas ng gabi doon.

¹² Kinaumagahan, si Josue ay bumangong maaga, at binuhat ng mga pari ang kaban ng PANGINOON.

¹³ Ang pitong pari na may dalang pitong tambuli na mga sungay ng tupa ay lumakad na pasulong sa unahan ng kaban ng PANGINOON, habang patuloy na hinihipan ang mga tambuli. Ang mga lalaking may sandata ay nauna sa kanila; at ang bantay sa likuran ay sumusunod sa kaban ng PANGINOON, habang patuloy na hinihipan ang mga tambuli.

¹⁴ Sa ikalawang araw ay minsan silang lumakad sa palibot ng lunsod at bumalik sila sa kampo. Gayon ang kanilang ginawa sa loob ng anim na araw.

¹⁵ At nangyari, nang ikapitong araw nang mag-uumaga na, sila'y maagang bumangon at pitong ulit silang lumakad sa palibot ng lunsod sa gayunding paraan. Nang araw lamang na iyon sila lumakad ng pitong ulit sa palibot ng lunsod.

¹⁶ Sa ikapitong ulit, nang hipan ng mga pari ang mga tambuli ay sinabi ni Josue sa bayan, "Sumigaw kayo; sapagkat ibinigay na ng PANGINOON sa inyo ang lunsod.

¹⁷ Ang lunsod pati ang lahat na naroroon ay itatalaga sa PANGINOON sa pagkawasak. Tanging si Rahab na upahang babae, siya at ang lahat na kasama niya sa bahay ang mananatiling buhay sapagkat kanyang ikinubli ang mga sugo na ating isinugo.

¹⁸ Ngunit kayo, layuan ninyo ang mga itinalagang bagay; baka kapag naitalaga na sa inyo ay kumuha kayo ng anuman sa itinalagang bagay. Sa gayo'y susumpain dahil sa inyo ang kampo ng Israel, at magkakaroon ng kaguluhan.

¹⁹ Ngunit lahat ng pilak, ginto, mga sisidlang tanso at bakal ay banal sa PANGINOON; ang mga ito ay ipapasok sa kabang-yaman ng PANGINOON."

²⁰ Kaya't sumigaw ang bayan, at hinipan ang mga tambuli. Nang marinig ng bayan ang tunog ng tambuli, ang bayan ay sumigaw ng napakalakas. Ang pader ay gumuho, kaya't ang bayan ay lumusob sa lunsod, ang bawat lalaki ay tuloy-tuloy na pumasok at kanilang sinakop ang lunsod.

²¹ Kanilang lubos na pinuksa ng talim ng tabak ang lahat ng nasa lunsod, maging lalaki at babae, ang bata at matanda, ang baka, tupa, at asno.

²² At sinabi ni Josue sa dalawang lalaking naniktik sa lupain, "Pumasok kayo sa bahay ng. upahang babae at ilabas ninyo roon ang babae at ang lahat niyang ari-arian gaya ng inyong ipinangako sa kanya."

²³ Kaya't ang mga binatang espiya ay pumasok at inilabas si Rahab, ang kanyang ama, ina, mga kapatid, at lahat ng kanyang ari-arian. Ang lahat niyang kamag-anak ay kanila ring inilabas at sila ay inilagay sa labas ng kampo ng Israel.

²⁴ At kanilang sinunog ng apoy ang lunsod at ang lahat na naroroon; tanging ang pilak at ginto, mga sisidlang tanso at bakal ang kanilang ipinasok sa kabang-yaman ng bahay ng PANGINOON.

²⁵ Ngunit si Rahab na upahang babae, ang sambahayan ng kanyang ama, at ang lahat niyang ari-arian ay iniligtas ni Josue. Siya'y nanirahang kasama ng Israel hanggang sa araw na ito, sapagkat kanyang ikinubli ang mga sugo na ipinadala ni Josue upang maniktik sa Jerico.

²⁶ Sumumpa si Josue ng sumpa sa kanila nang panahong iyon, na sinasabi, "Sumpain sa harapan ng PANGINOON ang taong magbabangon at muling magtatayo nitong lunsod ng Jerico. Sa halaga ng kanyang panganay ay ilalagay niya ang saligan nito at sa halaga ng kanyang bunsong lalaki ay itatayo niya ang mga pintuan nito."

²⁷ Kaya't ang PANGINOON ay naging kasama ni Josue; at ang kanyang kabantugan ay lumaganap sa buong lupain.