Read Angami Naga Keriekitho 1 Bible Online

Keriekitho 1 - Angami Naga bible

Keriekitho 1

¹Sietsenu Ukepenuopfüe teiko mu kijüu chükeshü[1] ki,

²kijüu methuo mu puorhi jü, siro kezei thuo kesouko zepfü ba, mu Ukepenuopfü Ruopfüue dzü süko mhogei mele tuo.

³Süki Ukepenuopfüe, “Zielie” sishü, sitse zie parta.

⁴Sitse Ukepenuopfü kezieu ngu puo neilie; süsie Ukepenuopfüe kezieu mu kezeiu kho kekreiwa.

⁵Siro Ukepenuopfüe kezie pie “Teiso” üdi kielie mu kezeiu pie “Teizei” üdi kielie. Sünu thevatie mu khise ba, zha puote.

⁶Siro Ukepenuopfüe, “Dzüko donu teimeluo bu balie; süu bu dzüko pfükho kekreise balie” ishü ru silie.

⁷Sidi Ukepenuopfü tei chüshü, mu süu bu puomho rei puokhro rei dzü kebako pfükho kekreiwa.

⁸Ukepenuopfüe süu pie “Tei” üdi kielie. Sünu thevatie mu khise ba, zha keniete.

⁹Siro Ukepenuopfüe, “Tei khro dzüko bu vo thechü puo nu kengulie, mu kijü keso bu parlie” ishü, ru silie.

¹⁰Sitse Ukepenuopfüe kijü keso-u üse, Kijü mu dzü kengukelieko üse Dzükezha üdi kielie. Tsiu Ukepenuopfüe mha süko ngu puo neilie.

¹¹Süsie Ukepenuopfüe, “Kijüu gei nha, puotsia kepfü gako, mu puo thuo puosi kepfü nhasiboko bu puo thuo puorhi kheki chü di lhou parlie” ishü ru silie,

¹²Sütuoi kijüue nha, puo thuo puotsia kepfü gako, siro puo thuo puosiu vüshüyakezha puotsia kepfü seiboko bu lhou parlie, mu Ukepenuopfü mha süko ngu puo neilie.

¹³Sünu thevatie mu khise ba, zha sete.

¹⁴Siro Ukepenuopfü, “Kezieko bu teigei zhalie, süko bu zasiko chü di teizei mu teiso chü kekreishü mu puotei kekreikecüko, teisozhako, teicieko mu thenyiko thashülie,

¹⁵tsiu uko bu kijüu va pezielie” ishü, ru silie.

¹⁶Hamhie di Ukepenuopfüe kezie kezhanie chüshü, niaki bu khinhie mho mu khrüu bu theva mho dinu di; mu puo themvüko rei chüshü.

¹⁷Ukepenuopfüe süko bu kijüu va pezieketuo,

¹⁸teiso-u mu teizeiu mho baketuo tsiu kezieu mu kezeiu kho kekreiwaketuo la süko pie teigei shüshü; mu Ukepenuopfüe süko ngu puo neilie.

¹⁹Sünu thevatie mu khise ba, zha diate.

²⁰Siro Ukepenuopfüe, “Rheiketuo khunuo kekra bu dzüko ketshu chülie, mu perako bu kijü mhogei ketshu chü pruo tuolie” ishü.

²¹Sidi Ukepenuopfüe puo thuo dzükezha nu khunuo kezhako mu dzü nu khunuoko pete, mu puoshü chükepfü pera kheko rei, u thuo u rhi kheki sü chü phreshü: siro Ukepenuopfüe süko ngu puo neilie.

²²Sitse Ukepenuopfüe japie uko tsü di “Nie si vülie mu kruolie; sidi dzükezhako nu dzüko ketshu chülie, mu kijü gei perako bu rei kruolie” sishü.

²³Sünu thevatie mu khise ba, zha pengoute.

²⁴Siro Ukepenuopfüe “Kijüu bu khunuo kekreikecüko, perinuoko, tsiu gouketuo khunuo mu nhachüko pete, u thuo u rhi kheki sü chü di pelhoushülie” ishü.

²⁵Sidi Ukepenuopfüe puo thuo nhachüko, perinuoko mu gouketuo khunuoko pete u thuo u rhi kheki sü chü di chüshü. Mu Ukepenuopfüe süko ngu puo neilie.

²⁶Siro Ukepenuopfüe, “Úko u rhi nunu themia[2] chülie khe; u kemhie di, sidi uko bu dzükezha nu khunuoko, teigei perako, perinuoko mu khunuo kekreiko, tsiu kijüu mho ba di süko kekhase balietuo” sishü.

²⁷Sidi Ukepenuopfüe puo thuo puo rhi nunu themia chüshü, Ukepenuopfü rhi nunu themia chüshü; puoe thenu mu thepfu chüshü.

²⁸Puoe japie themia tsü di, “Nie si vülie mu kruolie, di kijüu ketshu chülie, di süu penyülie, tsiu dzükezha nu khuoko, teirako mho, mu kijüu gei mele ketuo kheko mho tuolie” sishü.

²⁹Siro Ukepenuopfüe “Harie kijüu zie gei ketuo khe, ae puotsia kepfü ga pete, seibo puosi chü di puotsia khashüyakezha pete pie n tsüwate ho, süsü pie n ca chüshüwate.

³⁰Kijüu gei ha mu mele ketuo nhachüko, teirako mu goutuoyakezha khunuoko bu nha kepejoko pie uko ca chütuoü ae khashüwate” sishüwa. Ru süu silie.

³¹Siro Ukepenuopfüe puo mhatho chükelieko pete mehoshü, ru harie puo süko pete ngu puo neithor zo. Sünu thevatie mu khise ba, zha soroute.