Read Angami Naga Keriekitho 11 Bible Online

Keriekitho 11 - Angami Naga bible

Keriekitho 11

¹Siro kijü pete rei die puo mu pfhe puo zo.

²Ukoe niathutsa rühou tuo di Shinar nu kijü thezha puo nu vor lhouta.

³Sitse ukoe huoniehuo üse, “Khe úko ita chülie mu rie pevi selie khe” ilie. Sidi ukoe ita pie ketsie sou chülie mu süko nyhü kemaketuo la nyoba selie.

⁴Süsie ukoe “Khe úko nadi puo chülie mu sünu nu ketsie pfhe kho teiko thulie di u za chü kemeyielie mu úko rei kijü zieu gei kezakezi tuota moketuo chülie khe” ilie.

⁵Süsie Jihovae themiako chü se keba nadi mu tsiepfheu mehotuoü ker.

⁶Sitse Jihovae sie “Hako themia kro puo zo mu uko die rei puo zo, hauha uko mhatho therieu zo. Cha mo di ukoe chü kenyü pete chülie vi partatuo.

⁷Kerlie úko ke di uko die bie kebvüwa di uko bu huoniehuo die silie mota khe” ita.

⁸Sidi Jihovae uko pfüphropie kijü lukihaki shüwata di uko bu nadiu chülie mota.

⁹Süla nadiu za pie Babel chüte, kekreilamonyü Jihovae themiako die bie kebvüwa mu sünu nu Jihova uko bie kezapie kijüu gei lukihaki shüwa.

¹⁰Hako Shem nuosenuoyieko. Dzüdiu sie cie kenie cie, Shem-e puo kelhouzha cie krie puo keta ki, puo nuo thepfumia puo, Arpakshad ngulie.

¹¹Süsie puoe cie krie pengou lhou sa di puo nuo kekrei thepfu mu thenu ngu salie.

¹²Arpakshad-e cie serepengou keta ki puo nuou Shela ngulie.

¹³Süsie puo cie krie di pengou lhou sa di puo nuo kekrei thepfu mu thenu rei ngulie.

¹⁴Shela-e cie ser keta ki puo nuou Eber ngulie.

¹⁵Süsie puoe cie krie dia di se lhou sa di puo nuo kekrei thepfu mu thenu rei ngu salie.

¹⁶Eber-e cie seredia keta ki, puo nuou Peleg ngulie.

¹⁷süsie puoe cie krie dia di ser lhou sa di puo nuo thenu mu thepfu ngu salie.

¹⁸Peleg-e cie serketa ki Reu ngulie;

¹⁹süsie puo cie krie kenie di thepfü lhou sa di puo nuo thepfu mu thenu rei ngulie.

²⁰Reu cie serekenie keta ki puo nuou Serug ngulie.

²¹Süsie puoe cie krie kenie di thenie lhou sa di puo nuo kekrei thenu mu thepfu ngulie.

²²Serug-e cie ser keta ki puo nuou Nahor ngulie,

²³süsie puoe cie krie kenie lhou sa di puo nuo kekrei thepfu mu thenu rei ngu lalie.

²⁴Nahor-e cie mepfüethepfü ki puo nuo Tera ngulie,

²⁵süsie puoe cie krie puo di kerethepfü lhou sa di puo nuo thepfu mu thenu ngu lalie.

²⁶Tera-e cie hiethenie ki puo nuo Abram, Nahor mu Haran hako ngulie.

²⁷Hako Tera nuosenuoyieko: Puoe Abram, Nahor mu Haran nuoko puou mu Haran-e Lot puo.

²⁸Haran-e puo thuo puo rüna, Chaldian nu keba Ur rüna nunu puo puo mhodzü siata.

²⁹Abram mu Nahor unie thenu lielie. Abram kimia za Sarai mu Nahor kimia za Milka. Hapfü nuo puo liro Haran, Milka mu Iska nuo puou.

³⁰Derei Sarai nuojüpfü puo; puo puo nuo jü.

³¹Siro Tera-e puo nuou Abram mu puo tsu-u Haran nuou Lot siro puo miepfü Abram kimia Sarai, zelie di Chaldian nu keba Ur rünau khawa di Kanan kijü nu voketuo la tuota; derei uko Haran nu vor di sünu bata.

³²Siro Tera-e puo kelhouzha cie krie kenie di pengou keta ki Haran nunu siata.