Read Angami Naga Keriekitho 13 Bible Online

Keriekitho 13 - Angami Naga bible

Keriekitho 13

¹Abram-e puo kimia mu puo vie pete se di Ijipt nunu tuo Negeb nu vota, mu Lot puo ze vota.

²Abram-e tekuo, temvü, mithu siro suna mu raka nyi.

³Puoe sünu nu tuo Betheltsa vota. Sidi puo thiedzü bakecü Bethel mu Ai nie donu thechüu nu volie.

⁴Puo thiedzü ruosuoba puo chüpie keba thechüu nu. Sidi puo sünu nu Jihova za kieshü.

⁵Abram zeketuo Lot rei tekuo, temvü mu mithu siro puo thuo puo kikru mu puo kituo rei nyi.

⁶Mu unie perinuo krathorketa la, unie kenienie la kijüu mereta.

⁷Süla Abram thupfheko mu Lot thupfheko kegeita. Süki Kananmia rei mu Perizmia rei kijü sünu lhou tuo zo.

⁸Süla Abram-e Lot ki, “Avu sü siezedzürie ze, siro avu mu avu themiako bu kegei tuo suo.

⁹Süla avu kekreita khe. N thuo kijü n keneitsa kedalie. No thevitsa vata ro a thezatsa vatatuo, no thezatsa ro a thevitsa votatuo” ita.

¹⁰Sitse Lot-e kijüu mehoshü ru Jordan razhau pete, Jihova zieu, mu Ijipt kijü süu Zoar kevatsa mhiei dzü vi sekecü ngulie. Hau Jihova Sodom mu Gomora pekakewa mhodzü.

¹¹Süla Lot-e puo thuo puo la Jordan razhau kedalie di niathutsa vata. Sümhie di unie kekhota.

¹²Abram-e Kanan kijü nu bata mu Lot vo Sodom kepenuo ki nadiko donu lhouta.

¹³Sodom nu themiako lhou rüzhü mu Jihova gei phouma pezha seta.

¹⁴Lot tuoketa sie Jihovae Abram ki, “No n tha nunu tosie pesotsa, pekhrotsa, niathutsa mu niakratsa mehoshücie;

¹⁵ae n bu n mhi pie kengu kijü pete pie no mu n nuosenuoyieko tsütuo, mu süu kechachie n vie chütuo.

¹⁶A n nuosenuoyie[13] chü pekrapie nyophe mhieshütuo, sidi mia puoe nyopheko phrü hulie liro, n nuosenuoyieko rei phrülietatuo.

¹⁷Sielie di tuo kijüu puochapuochie meho vocie, ae süu pie n tsüketuo la” sishü.

¹⁸Süla Abram-e puo pfheki rhuose Hebron nu phriebo keba Mamre nu vota, di sünu rei puo ruosuoba puo chüpie Jihova tsü.