Read Angami Naga Keriekitho 14 Bible Online

Keriekitho 14 - Angami Naga bible

Keriekitho 14

¹Süki Shinar kediu Amrafel, Elasar nu kediu Ariok, Elam nu kediu Kedorlaomer mu Goim nu kediu Tidal,

²ukoe kedi kekrei pengou: Sodom nu kediu Bera, Gomora nu kediu Birsha, Adma nu kediu Shinab, Zeboim nu kediu Shemeber mu Bela, süu Zoar nu kediu uko ze terhü chüta.

³Kedi pengoukoe uko rüpfhünuoko ze vor Sidim Razhau, (tsiedo Kesia Dzükezhau ücüu)[14] nu kengulie.

⁴Ukoe cie kerekenie Kedorlaomer khro tuota di cie kerese cie puo petsou sierta.

⁵Cie keredia cie Kedorlaomer-e puo keze kedi kekreiko ze vor Ashterot-karnaim nu Refako, Ham nu Zuziko, Shaveh-kirithaim nu Emimko,

⁶mu Seir kijüthou geinu Horko penyü zo vo rayha ze ketieriekecü El-paran ketso shüwa.

⁷Süsie uko rürei lalie di En-mishpat, (süu Kadesh, ükecüu) nu volie, di Amelekmiako kijü pete, mu Hazazon-tamar nu lhou keba Amormia pete penyüwa.

⁸Süsie Sodom, Gomora, Adma, Zeboim mu Bela, süu Zoar nu kedikoe uko rüpfhünuoko kezu ze vor Sidim Razha nunu

⁹Elam nu kediu Kedorlaomer, Goim nu kediu Tidal, Shinar nu kediu Amrafel mu Elasar nu kediu Ariok kediko ze terhü chütuoü di kengulie. Kedi pengou mu kedi dia idi terhü chü.

¹⁰Siro alakatar kheho thuo Sidim Razhau tshupie zhü, süki Sodom mu Gomora nu kediko tatatuoü kesie ki, huomia te thekhe nu leta mu huomia ta kijüthou gei vota.

¹¹Süki uko ngumvüko vo Sodom mu Gomora nie nu mha pete va pfülieta, kecüca pete sa;

¹²Abram siezeu nuou Lot Sodom nu lhou baya, mu ukoe puo vie pete valie mu puo te rei sa zeta.

¹³Derei mia puo telie di vor Amormia Mamre ükecüu phrie seiko khieki lhou keba Ibriu Abram ki rükhruoshü; Mamre mu puo siezenie Eshkol mu Aner; uko liro Abram khriethomia.

¹⁴Siro Abram-e puo siezeu te zeketa silie tse, puo themia krie se di kerethetha kie kengulie di süko ze luko whuo Dan ketso vo.

¹⁵Sidi puoe puo themiako keza petselie di pezei ze ngumvümia whuo le di uko penyüwa. Puoe uko whuo se Damaska mhotsa keba Hoba ketso vowa.

¹⁶Sidi ukoe mha va pfüketa pete kelalie. Puo siezeu nuou Lot mu puo vieko pete siro thenuko rei mu themia kekreiko rei pete ze la vorta.

¹⁷Siro Abram-e Kedorlaomer mu kedi kekreiko mho kuolie di la kevor ki Sodom nu kediue Shaveh Razhau, kedimia Razha irei di kieyakezhau nunu puo ze kesetuoü pra.

¹⁸Salem nu kediu Melkizedek rei niekhrüda mu khubezu se vor Abram tsü, puoe Kerükrietho-u Ukepenuopfü zievo chüya.

¹⁹Siro japie puo tsü di, “Kerükrietho-u Ukepenuopfü, tei mu kijü chükeshüu, bu japie Abram ketsüu chülie.

²⁰N ngumvümia mho kuokelie pie n ketsü, Kerükrietho-u Ukepenuopfü bu thetshe pfücie” ishü. Siro Abram-e mhangu lakelie nunu ker za puo pie Melkizedek tsüwa.

²¹Siro Sodom nu kediue Abram ki, “Terhü mhavako pete n thuo lielie derei themiako pie a tsücie” sita.

²²Sitse Abram-e Sodom nu kediu ki,

²³“A n vie puorei, kelo yopuo morei phikourhü yopuorei lielie lho zoücü tei mu kijü chükeshü Kerükrietho-u Ukepenuopfü[15] Jihova mhodzünu rüseshüwate. Noe, ‘A la Abram mhanyiliewe’ ituotalie vicü la.

²⁴A themiakoe cükelieko zo mo liro a mhapuorei lielie lho. Derei a zeko Aner, Eshkol mu Mamre uko bu we uko ya pieliecie” ita.