Read Angami Naga Keriekitho 15 Bible Online

Keriekitho 15 - Angami Naga bible

Keriekitho 15

¹Mha hako sie ziemho puo nunu Jihovae Abram ki, “Michie hiecie Abram, a n zhüu, mu n zhakhra kezhau zo,” ita.

²Derei Abram la sie, “He-i Niepuu Ukepenuopfü, no kedipuo pie a tsü ta? A tsierei a nuo jü zocü la, a kayie sü Damaskamia Eliezer zote” sishü.

³Sidi Abram-e sie, “Noe nuo puorei pie a tsü mote, mu a diemiako mia puo thuo a vie pete wecü zotatie” sita.

⁴Sitse Jihova die puo ki la vorcü, “Themia hau bu n ka welie lho zo. N nuo n noupra puo bu n ka we zotuo” ita.

⁵Süsie Jihovae puo ze chazou vo di, “Tosie tei mehoshü di themvüko phrülie vi ro phrüshücie. N nuosenuoyie bu luko mhie zotuo ho” ita.

⁶Sitse Abram-e Jihova pelelie, mu süla Jihovae puo üse miathoüta.

⁷Süsie Jihova puo ki “Ae kijü hau pie n bu n vie chütuoü di Chaldianmia rüna Ur nunu n ze parkeshüu Jihova zo” ishü.

⁸Derei Abram puo ketso la di, “He-i Niepuu Ukepenuopfü kedipuo mhie di hau a vie chütuoücü silietuo ga?” ita.

⁹Sitse Jihova puo ki, “Teicie seketa thukrüpfü puo, temvükrü puo mu tekuochü puo siro mekhru puo mu paruonuo yopuo se a ki vorshücie” ishü.

¹⁰Süla Abram-e süko se puo ki voshü, di da kenienie chülie, di tietsa puo pie kekreitsatieu ze kepetsoushü; derei puo perako we dawa mo.

¹¹Sitse chürhaüko tsur kesia moko gei balie, Abram-e süko whuowa.

¹²Niaki letakezhü ki, Abram-e ze pesou seta, mu harie kemerie mu zeibouikecü puo puo gei vor.

¹³Sitse Jihovae sie Abram ki, “N nuosenuoyiekoe u kijü kemo puo nu solhimia chü di mia diemia chü di mia bu cie krie dia uko peseketuo si touliecie;

¹⁴derei a ketsokecüu se uko pesekecü seyieko gei shütuo, süsie uko mhanyi phi di tuo partatuo.

¹⁵Derei no we n nou mene di n puonuoko ki votatuo; n tsa zenu n khrutuo.

¹⁶Siro n nuosenuoyieko phou diau sie nu hanu la vortuo, Amormia kejokemou kechü tsierei tsei moluokecü la” isi.

¹⁷Niaki leta di zeibouiketa ki, harie, mikhubou puo mu mitu puo themuoko donu vota.

¹⁸Sünhie Jihovae Abram ze dietseidiekho puo chülie, di puo ki, “A Ijipt rüu nunu vo kerü kezhau Eufrat unie,

¹⁹süsie rei themia lhou keba kijü hako pete sa, Kenmiako, Kenizmiako, Kadmonmiako,

²⁰Hitmiako, Perizko, Refako,

²¹Ammormiako, Kananmiako, Girgasmiako mu Jebusmiako lhou keba kijü pete pie n nuosenuoyieko tsüwate” sishü.