Read Angami Naga Keriekitho 16 Bible Online

Keriekitho 16 - Angami Naga bible

Keriekitho 16

¹Abram kimia Sarai-e nuojüpfü puo. Puo kituo Ijiptmiapfü puo nyi, süpfü za Hagar;

²mu Sarai Abram ki, “Harie Jihovae a bu nuo kepenuo khawate; a kituopfü ki vocie; a bu puo geinu a nuo ngulie rei si lho mu” si. Sitse Abram-e Sarai die zeta.

³Sidi Abram Kanan kijü nu lhou ketuo teicie kerketa zenu puo kimiapfüe Hagar ze vo Abram bu pie puo kimia chülie.

⁴Sitse puo Hagar ki vo, ru puo nuonipfülie; puo nuonipfüketa silie tse, puo niepupfü peseta.

⁵Sitse Sarai Abram ki, “A gei kekrükeshü hau bu n gei pfücie! A a kituopfü khapie n merü gei shü mu puo nuonipfüketa silie tse a pesete. Jihova bu avu donu capiu chüliecie” si.

⁶Derei Abram sie Sarai ki, “Harie kituopfü sü n dzie nu baze; puo gei n thuo n medo-u chüwalie vi ze” si. Sitse Sarai hapfü peseta, süla puo bu puo ki nunu tata.

⁷Jihova dieliemia puoe Shur nu kevo chau rayha nu dzüluo puo khieki nu süpfü ngulie.

⁸Sidi sie puo ki, “Hagar, Sarai kituopfü, no kirapuonu vor mu kirapuo votuoüzhü ga?” si. Puo sie, “Ae a niepupfü Sarai ki nunu tatazhie” si.

⁹Jihova dielieu sie puo ki, “N niepupfü ki la volie, di n khapie puo khrükhro balie” si.

¹⁰Jihova dielieu puo ki pu di, “A n nuosenuoyie chü pekruo phipie phrü hulie kelho chüshütuo” si.

¹¹Sidi Jihova dielieue puo ki pu sa di, “Harie, no phoupie mo bate, no thepfumia puo penuolietuo mu no puo za pie Ishmael[16]chüliecie; kekreilamonyü Jihovae n mezhieko rünyülieketa la.

¹²Puo nhanu ketuo gada puo tuoi zotuo, puo dzie-e mia pete petsoutuo, mu mia pete dzie rei puo petsoutuo; puo puo siezedzürie pete petsou di lhoutuo” si.

¹³Süla puoe Jihova puo rüchükeshüu üse; “No El-roi[17]” idi kieta; puo sie, “A Ukepenuopfü ngu ketho me mu a puo ngukewa sie rei rhei balie vi zo me?” ita.

¹⁴Süla puoe dzükhou-u za thopie Beer-lahai-roi iwa; süusü Kadesh mu Bered unie donu zhü.

¹⁵Süsie Hagar-e thepfumia puo penuopie Abram tsü; mu Abram-e puo za thopie Ishmael chülie.

¹⁶Siro Hagar Ishmael penuopie puo ketsü ki cie hiethepfüesorouta.