Read Angami Naga Keriekitho 17 Bible Online

Keriekitho 17 - Angami Naga bible

Keriekitho 17

¹Abram cie hiethepfüethepfüketa ki Jihovae puo pengu di puo ki, “Ae Kuokejokejüu Kepenuopfü[18] zowe, a mhodzüki tuolie, mu no vi tseilie.

²Sitse a avu donu dietseidiekho puo chüshütuo mu a n chü pekruo phishütuo” si.

³Sitse Abram tsu zerepfü zhüta mu Ukepenuopfü puo rüchü di sie,

⁴“Harie, a dietseidiekho-u n ze tuo zo, mu no seyie krodi puotsau chütuo.

⁵N za bu Abram[19] ülie lhote, derei n za bu Abraham itatuo, kekreilamonyü a n chüpie seyieko krodi puotsau chüshüketa la.

⁶A n chü pekruo phishütuo; mu a n geinu seyieko pelhoushütuo, mu kedimia n geinu siertuo.

⁷A telhekechachie la avu mu n sie vorketuo n nuosenuoyieko pete la dietseidiekho puo chüshütuo, n nuosenuoyie[20] mu n Kepenuopfü chülieketuo la.

⁸Siro ae kechachie la no, tsie solhimia chü lhouketuo kijü pete pie no mu n nuosenuoyieko tsütuo, mu a uko Kepenuopfü chütuo” sishü.

⁹Siro Ukepenuopfüe Abraham ki, “No we a n ze dietseidiekhokelieu se balie, no rei mu n sie vorkezhü thephou pete rei.

¹⁰Hauha nie bu zetuoü di, a mu no, siro n sie vorkezhü thephou pete donu dietseidiekho chükelieu: Nieko donu thepfumia pete bu rei u zhüretuo.

¹¹Nieko nie chü nu nie zhü tieu retuo, mu süu bu a mu nie donu dietseidiekhokewa zasi puo chütuo.

¹²Nieko donu thepfumia zha thethaketa pete zhü retuo; thephou pete nu nie diemia nie kinu penuokelieko rei nie shükeiraka se khrükelieko rei.

¹³Nieko diemia kitiekinu penuokeliemia mu nie raka se khrükeliemia pete zhüretuo. Hai di a dietseidiekho-u kechachie nie chünu tuotatuo.

¹⁴Siro thepfumia kehoupuorei puo chü nu puo zhü re kemomia puo themiako donu nu kelhiwatuo, puoe a dietseidiekho-u varhuoketa la” sishü.

¹⁵Sitse Ukepenuopfüe Abraham ki, “N kimia Sarai, n bu puo üse Sarai üdi kie sa lhote, derei puo za bu Sara ütatuo.

¹⁶A ja puo tsütuo, sizomonyü a puo geinu thepfunuomia puo kha n tsütuo. A ja puo tsütuo, mu puo seyieko zuopfü puo chütuo, seyieko kedimia puo geinu siertuo” si.

¹⁷Sitse Abraham tsu zerepfülie di puo dzükerüchüta, sidi puo thuo puo rüchü di, “Themia puo cie krie puoketa zenu nuo nyilie vi me? Sara cie hiethepfüta di puo nuo nyilie vi me?” ita.

¹⁸Sidi Abraham-e Kepenuopfü üse, “He-i Ishmael bu n mhodzünu lhou tuota zocü mu!” ita.

¹⁹Sitse Ukepenuopfü sie, “Silie lho, n kimia Sara geinu thepfumia puo penuoshü n tsü zotuo, mu no puo za pie Isak[21] chüliecie. A puo ze dietseidiekho chükelieu bu puo sie vorketuo puo nuosenuoyieko la rei sa kechachie dietseidiekhokewa puo chütuo.

²⁰Tsiu Ishmael la we, a n pfhe sishüte; mu harie, a ja puo tsütuo mu a puo chü pekruo mu pekra phishütuo; puo kedimia kerekenie krü chütuo mu puo chüpie seyie kezha puo chüshütuo.

²¹Derei a dietseidiekho-u zowe Isak ze chütuo, süu Sara-e thecie, tsie mese ki penuoshü n tsütuo” si.

²²Sidi Ukepenuopfüe Abraham rüchükewa sie tuota.

²³Sitse Abraham-e puo nuo Ishmael mu puo kinu nu penuokelie puo dieko raka pie khrükelieko, Abraham kinu keba thepfumia pete zelie, di Ukepenuopfü puo ki pukeshü mhiei sünhie teiluo uko chü gei u zhütieu re phrewa.

²⁴Abraham-e puo chü geinu puo zhütieu rekecü ki cie hiethepfüethepfüta.

²⁵Mu puo nuo Ishmael puo zhürekecü ki cie kereseta.

²⁶Sünhie teiso Abraham mu Ishmael unie rei unie zhüre phrelie,

²⁷mu puo kinu keba thepfumia keba pete, kinu nu penuokelie kedieko rei mu raka pie khrükelie chazoumiako rei puo ze di u zhüre phrelie.