Read Angami Naga Keriekitho 18 Bible Online

Keriekitho 18 - Angami Naga bible

Keriekitho 18

¹Siro khinhieluo ki Abraham-e Mamre phrieboko donu puo pfheki kicie nu keba ki Jihovae puo pengushü.

²Sidi puoe tosie mehoshü ru, harie, mia se puo mhodzünu tha. Puo uko ngukeshü ki, puo pfheki kicie nunu uko ze kesetuoü vo di tsu zerepfü zhüta.

³Sidi sie, “A Niepuu, a n mhingu ki n khriepfüya üro, tuo n kituou therhieta hiecie.

⁴A bu dzü huoyo se vor di nieko phi khrüwacie. Sidi nieko seibo khro nu rüleiliecie.

⁵A niekhrüda huoyo se vor di nieko bu nieko chü pekuolietuo, süze nu nieko tuoliecümu, nieko nie kituou ki vorte ru” isi. Sitse uko sie, “N kepu kemhie chüliecie” ita.

⁶Sitse Abraham rükri se puo pfhekiu nu Sara ki vo di sie, “Thou kememhie kemejü se nelie, di niekhrüda rieliecie” sishü.

⁷Siro Abraham ta se thukro nu vo di mithunuo kemedzü puo phou kevi yopuo se vor puo kituou tsüshü, sitse puo süu kese mhailie.

⁸Süsie puo thunudzü khie, thunudzü, mu mithunuo gacha se vor di khapie uko mhodzü shü; sidi uko mhacü kebachie puo vor uko khieki seibo khro tha tso.

⁹Uko sie puo ki, “N kimia kirapuo ba ga?” si ru, puo sie “Puo pfheki nu ba” sishü.

¹⁰Puoe sie, “A hasie bayie teiu nu n ki la vortuo, mu n kimia Sara thepfumia puo ngulietuo” sishü.

¹¹Süki Abraham mu Sara unie phichüte, tsa phi phreta, siro Sara gei thenumia zho rei tuo mota.

¹²Süla Sara puo dzükerüchü di, “A mu a nupfu rei tsaketa sienu, a kenei ba lalie vi me?” ita.

¹³Sitse Jihova Abraham ki, “Kiüdi Sara nyü di, ‘A tsa zenu a nuo nyilie vi ketho me?’ iba ga?

¹⁴Jihova la mhachülie kere huo nyi me? Puoteiu chiekeshü ki a n ki la vortuo, bayie teiu nu, Sara thepfunuomia puo ngulietatuo” isi.

¹⁵Derei Sara-e, “A nyü mo zo” ita; puoe michieketa la. Sitse puoe “No nyü tou zo” ita.

¹⁶Süsie themiako sünu nu tuo se Sodomtsa vata; mu Abraham-e cha nu uko ze voshü.

¹⁷Sitse Jihova sie, “A mha chüshütuoü kebau pie Abraham pekhretuo me?

¹⁸Abraham-e seyie kezha mu kekuo phi puo chü zotuo, mu kijü nu seyie peteko puo geinu theja ngulie zotie ru.

¹⁹Mo, a puo kedaliete[22], puo bu kemiatho mu kethoca se lhou di puo nuonuoko mu puo kinuko chathapie Jihova chau nu tuolieketuo la. Sitse Jihova bu puoe phrakeshüko chü tseipie Abraham gei shülietuo” sishü.

²⁰Sidi Jihova sie, “Sodom mu Gomora nie kephouma rethorketa la unie pejokecü pfhe kemeriete.

²¹A tsie tsu di unie pejo keba die, a ki vor keba de suo mo üro a silietuo” sita.

²²Sidi themiako sünu nu tuo rürei se Sodom kevatsa vota; derei Abraham-e Jihova khie ki tha zo.

²³Sitse Abraham tuo penuo phi di sie, “No kemiathoko rei kerüzhüko ze pekawatuo me?

²⁴Mhanuü nadiu nu kemiathomia hiepengou ba ro: no mia hiepengou süko la rünau kelashü mo di pekawatuo me?

²⁵Mhatho hamhiecüko bu n kinu petsetacie, kemiathoko pie kerüzhüko sa dukhriwaketuo, mu sidi kemiathoko bu rei kerüzhüko mhieketa, süu bu n kinu petsetacie! Kijü pete Capiu kemezhüu chüshü lhoü me?” sita.

²⁶Sitse Jihovae “A Sodom nu kemiathomia hiepengou nadiu nu ba di ngukelie sie, süko la a thechüu pete kelashü zotuo” si.

²⁷Abraham puo die kela di sie, “Harie, a supuo mu, nyophe mu mige zorei, a thuo a khapie Niepuu rüchütuoü thate.

²⁸Mhanuü mia pengou kemiathomia hiepengou tso mota ro, no pengouko la nadiu pete pekawatuo me?” sishü. Sitse Puo sie, “A mia hiediaepengou ngukelie sie pekawalie lho” si.

²⁹Süsie rei puo la sie, “Mhanuü sünu mia hiedia ngulie ro” isi. Sitse puoe sie, “A mia hiedia la süu chü mota zotuo” si.

³⁰Süsie puo la sie, “He-i, Niepuu bu puo nei mota hiecie, a dieputuo, mhanuü sünu mia ser ngulie ro” isi. Puo la sie, “Mia ser ngulie ro süu rei chülie lho” isi.

³¹Puo sie, “Harie, a thuo a khapie Niepuu rüchütuoüzhie. Mhanuü sünu mia mepfü ro,” si. Puo sie “Mia mepfüko la a süu chülie lho” sita.

³²Süsie puo sie, “He-i, Niepuu bu puo nei mota hiecie, a tsieu va rübei diepucü zotatuo mu. Mhanuü sünu mia ker ngulie ro” si, puoe sie, “Mia kerko la a süu pekawalie lho” si.

³³Sidi Jihova Abraham ze kerüchü tseiwa tse tuota, mu Abraham rei puo chü nu la vorta.