Read Angami Naga Keriekitho 19 Bible Online

Keriekitho 19 - Angami Naga bible

Keriekitho 19

¹Siro teigeidieliemia kenie thevatie Sodom nu vor; mu Lot-e Sodom kharu ki ba. Lot-e unie ngu tse, unie ze kesetuoü sie tuota, sidi nerhutsu puo zie pie kijü zerepfü zhüta.

²Sitse puo sie, “A niepu, rürei se nnie kituou kinu lerliecie, nnie phi khrüwa di tsiezhü batacie. Khise nnie bu sie zilie di nnie cha nu volietuo” si; sitse unie sie, “Mo, hienie teizeizhau pete chadi nu ba zotuo” sita.

³Derei puo unie ki pu beilieta, süla unie puo kinu lelie, siro puo unie ze hieshü, sidi khreiü shükemo niekhrüda rieshü ru unie süu cülie.

⁴Derei unie zhütsu kemo nu, Sodom nadiu nu thepfumiako, phichü nhicu pete vor kiu houpfülie;

⁵sidi uko Lot kie di sie, “Tsiezhü n kinu vor kebanie kirapuo ba ga? ze parshücie, sitse hie unie silietuo” ita.

⁶Lot tuo uko ki par mu puo kikha shüpie kha lawa,

⁷di sie, “A siezedzürieko, a nieko ki chaya, mha kesuo chü hai zota hiecie.

⁸Harie, thepfu si mo zokecü a nuo rüü kenie ba, a bu unie ze par nieko ki shü, di unie gei we nie thuo chü kenyüu chüwa mu themia hanie gei we mhapuorei chü hie zocie, unie a ki khrükhro lerketa la” sita.

⁹Derei ukoe sie, “Phir hie” ita. Süsie rei uko la sie, “Themia hau rüso chü vor, di puo bu u capi chütuo le! Tsiewe hie unie ki rei n gei we suokuotatie” ita. Sidi uko Lot khu toutou zo kikha vaphapfü letatuoüta.

¹⁰Derei themianie unie dzie chase pra Lot teshü ze kinu lerta. Sidi ki khawa.

¹¹Süsie unie kikha ki kethako pete, phichü nhicu mhi chü pecie phrewa, di uko bu kikha pfhülie lho bata.

¹²Sitse themianie sie Lot ki, “Haki n nuo thepfu rei thenu rei, n nyanuo morei n kicükinumia huo nadi hau nu ba saluo me? Thechü hau nunu uko ze partacie;

¹³hie thechüu pekawatuoüzhie, kekreilamonyü Jihova mhodzünu uko kepejo pfhe re se baketa la mu Jihovae süu pekaketuo la hienie ketseshüwe” ita.

¹⁴Süla Lot vo di puo nuonie lietuoü keba puo nyanuoko rüchü di sie, “Sielie di thechü hau nunu tuotacie; Jihova nadi hau pekawatuoü baketa la” sishü. Derei puo nyanuokoe puo üse keyu chü keba mhieta.

¹⁵Khise teiso pi par tse, teigeidielienie Lot kesou di sie, “Sielie, di n kimia mu n nuo thenunie ze tatalie siazha pie nadiu tsükeshü ki nieko pekawa molieketuo la” si.

¹⁶Derei puo ge ba zo; sitse themianie sie puo mu puo kimia mu puo nuo thenunie dzie merhashülie, Jihova puo ngumezhieshü, di puo ze par nadiu khieshülie.

¹⁷Süsie unie uko ze chazou parshü di sie uko ki, “Nie kerheiro la tataliecie; rei la vo nie sietsa meho hie, morei razhau nu bata mo zolie: nie pekakewa keprei la ta kijüthou gei votalie” si.

¹⁸Sitse Lot sie unie ki “He-i, si hiecie, a niepunie;

¹⁹harie, n kituou n mhodzünu n nei chüliete, mu no a kerheiro kelakeshü geinu n kekhrie ngukemezhie se a pesipengushüte; derei a kijüthou gei ta volie kenjü zolie, kesuo a valie ro a siatatie.

²⁰Harie, lutsakhie rüna kecü yopuo nu ta volieketuo la penuo ba, a bu vo sünu rüshütacie, süu kecü yopuo zo mo me? Siro a kelalietuo” sita.

²¹Sitse puo sie, “Harie, n die hau rei lieliete; süla n kepu rünau pekawalie lhote.

²²Rükrilie di ta sünu volie; no sünu vo tsolie kemochie a mhapuorei chülie kenjü zocü la” sita. Süla nadi süu za üse Zoar[23] üta.

²³Lot-e Zoar nu vorkelie ki niaki thuse kijüu va bata.

²⁴Süsie Jihovae teigei nu mitsie mu mi perüpie Sodom mu Gomora va;

²⁵sidi nadi sünie siro razhau pete, nadinie nu kelhou pete mu kijüu gei lhou keba pete peka phrewa.

²⁶Derei Lot kimiapfü rürei puo sietsa meho lashü sidi metsiekro puo mevita.

²⁷Siro Abraham khiserüna sielie di puo Jihova mhodzünu thakecü thechüu nu la vota;

²⁸sidi puo Sodom mu Gomora, mu kijü razha pete mehoshü, ru harie kijü süu nu mikhu sü miü kezha puo mikhu tuoi siekezhü ngulie.

²⁹Derei Ukepenuopfüe Lot kelhou thechü razhau nu, nadinie pekakecü ki, puo Abraham rükralie, sidi kepeka nunu Lot ketsewa.

³⁰Lot-e Zoar nunu tuota, sidi puo nuopfünie ze kijüthou gei lhou tuota. Puoe Zoar nu lhou michieketa la; süla puo nuopfünie ze di tsiepfü puo nu lhou.

³¹Sitse puo nuo phichüpfüe nhicupfü ki, “Avu puou phichüte, mu kijü pete nu thepfumia puorei kijüu zho tuoi avu ki kevor tuo mote.

³²Vorlie, avu puo bu khubezu krielie khe, sidi avu puo ze zhütuo, di puo geinu avu puo tsia se tuolietuo” ita.

³³Süla süzhü unie puo bu khubezu krielie; sidi phichüpfü le di puo puo ze zhü, mu puoe kicükipuo süpfüe ler mu sieta shi si mo.

³⁴Süsienhie phichüpfüe puo siezepfü ki sie, “Harie, a nzhü a puo ze zhüwate; avu tsiezhü rei puo bu khubezu krie lalie khe; sidi no le puo ze zhülie, siliro avu puou tsia setuolietuo” sita.

³⁵Süla unie puou bu süzhü rei khubezu krie lalie, sidi nhicupfü bu le puo ze zhü, mu puoe kicükipuo süpfü ler puo zezhü morei siete shi si mo zo.

³⁶Sidi Lot nuopfünie unie puo geinu nuonipfü phrelie.

³⁷Phichüpfü thepfunuomia puo penuolie mu puo za pie Moab tholie; süu tsiedo Moabmiako krüu zo.

³⁸Siro nhicupfü rei thepfunuomia puo penuolie mu puoe puo za pie Ben-ammi tholie; süu tsiedo Ammonko krüu zo.