Read Angami Naga Keriekitho 2 Bible Online

Keriekitho 2 - Angami Naga bible

Keriekitho 2

¹Sidi teiko mu kijüu mu sünu ketuo pete chü tseilie.

²Zha thenie nhie Ukepenuopfüe puo mhathoko pete chü tseilie di zha thenie nhie rüleilie.

³Siro Ukepenuopfüe japie zha thenie gei shülie sidi süu chü kemesalie; Ukepenuopfüe sünhie puo mhatho kheko nunu rüleikelie la.

⁴Hako teiko mu kijüu chükeshü dzewe. Ukepenuopfü Jihovae teiko mu kijü chüshü tseki zowe,

⁵kijüu gei nha lhou mo mu nha tsia rei tsü par mo, Niepuu Ukepenuopfü tei bu rü kijü tsur moluocü la; mu kijüu cielieketuo themia puorei tuo mo.

⁶Derei kijü nu dzü rüluo par kijüu petseshüshüya.

⁷Sitse Ukepenuopfü Jihovae kijü nu rünyo nyophe[3] se themia chülie, di kerhei thesü pie puo nyhüki nu shüshü sidi themia bu kerhei themia puo chülie.

⁸Ukepenuopfü Jihovae niathu kevatsa Iden nunu tezie puo chüshü, sidi puo thuo chükelie themiau bu sünu lhou.

⁹Siro Ukepenuopfü Jihovae seibo, umhi ki zivi ücüko, tsiu u ca kevi chülieketuo pete rei pelhoupie sünu shü. Tezie metsuo nunu kerheiprübo-u mu kevikesuo sikelie seibo-u rei pelhoushü.

¹⁰Iden nu kerü puo zhü, mu süu nu dzü thuo tezieu vaya; Iden tseketa sie kerüu pro par kerü dia chüte.

¹¹Kerü kerieu liro Pishon; süu kru suna keba Havila kijü houpfü vo ba.

¹²Sünu suna kevithopfü, mharekethengu sei mu ketsie puoma kere rei ngulieya.

¹³Kerü kenieu liro Gihon; süu kru Kush kijü hou vo.

¹⁴Kerü seu Tigris; süu Asiria mhodzütsa kruzhü, kerü diau liro Eufrat.

¹⁵Ukepenuopfü Jihovae themiau ze vo tezie nu shü, puo bu süu cie cü mu rüguose balieketuo la.

¹⁶Mu Ukepenuopfü Jihova themiau ki, “N thuo tezie nu nhasi kehoupuorei rie cü tuolie,

¹⁷derei kevi mu kesuo kesi seiusi we cü hie. No sei süu si cü suo zo; süu kecü sie no sünhie siata petuo zotuo” sishü.

¹⁸Süsie Ukepenuopfü sie, “Themiau bu puo rübei keba vi molie, a puo dziese puo chüpie puo khruohituo.”

¹⁹Sidi Ukepenuopfü Jihova kijüu geinu khunuoko pete mu teirako rei pete chülie, sidi themiau bu uko za tholieketuo la uko ze puo ki vor, sümhie di themiau uko kekie zakieu se phre tuote.

²⁰Hamhie di themiau[4] thuo khunuoko mu teirako pete za thoshü; derei süko donu puo dziese puo khruohilieketuo tuo mo.

²¹Süla Ukepenuopfü Jihova keze kesou se puo se vor themiau geishü; ru puo zeta. Mu puo zekezhü ki, puoe themiau tieru puo bielie di puo chüu chü kema lawa.

²²Sidi puoe themiau tieru-u se thenumiapfü puo chülie di puo ze themiau ki vor.

²³Sitse themiau sie; “Haha a ruko donu a ru zo, mu a chü donu a chü zo. puo üse Thenupfü[5] ütuo, themia[6] geinu puo se parkelie la” ita.

²⁴Süla themiau puo puo mu puo zuo khawa di puo kimia kitsa votatuo, di unie chü puo chütatuo.

²⁵Siro themiau mu puo kimia unie methuo phre, derei unie menga mo zo.