Read Angami Naga Keriekitho 20 Bible Online

Keriekitho 20 - Angami Naga bible

Keriekitho 20

¹Süsie Abraham-e sünu nu rüve se Negeb kijütsa vo di Kadesh mu Shurnie donu lhou; mu puo Gerar nu rüsomia chü di lhou.

²Abraham-e sie puo kimia Sara pu di, “Puo a üpfüwe” sishü. Sitse kediu Abimelek-e mia ketseshü di Sara zelieta.

³Derei Ukepenuopfüe theva Abimelek mho geinu puo ki “Harie, no zekelie thenupfü la no kesiamia puote ho, süpfüe mia nupfünuocü la” sita.

⁴Derei Abimelek süpfü penuo vo mo zoluo, süla puo sie, “Niepuu no kejo kejü themiau dukhrituo me?

⁵Puo thuo a ki, ‘Puo a üpfüwe’ si mo me? Mu süpfü thuo rei, ‘Puo a prüu zo’ size! A a nou dietho mu jokemo dzie se hauha chü zo” sita.

⁶Sitse Jihova puo mho geinu sie, “U zo, no n nou puotou chü di hau chü zo, süla n bu kephouma chü di a petsouta molieketuo la a n bu puo nyükecü khaliete.

⁷Tsie no themiau kimia kha lashüwalie, puoe siedzekesimia puocü la, puo n la chashütuo, mu no rheilietuo. Derei no süpfü khashü mo ro, no mu n themia peteko sia toutaketuo siliecie” sita.

⁸Süla Abimelek khiserüna sie di puo kituoko pete kielie sidi mha hako pete se uko ki pushü; sitse themiako michie phita.

⁹Süsie Abimelek Abraham kielie di sie puo ki, “No hieko gei kedipuo chüshü ga? Mu a n gei kephouma kicüpuo chüwa üdi, no a mu a kedirüvie nu kephouma kezha haicü se vorshü ga? No a gei chü zhükemo mhathoko chüshüte” sita.

¹⁰Süsie rei Abimelek-e Abraham ki, “No kedipuo le di mha hau chüshü ga?” sishü.

¹¹Sitse Abraham sie, “Ae Ukepenuopfü khrü keprei thechü hau nu ba ücü le mo mu uko a kimia la a dukhriwatie ru idi mha hau chüwate.

¹²Sizomoü puo a üpfü ketho zo, puo a puo nuopfü derei a zuo nuopfü mo, sidi puo a kimia chüte.

¹³Mu Ukepenuopfü a bu a puo kinu nu tuo rühou parketa ki, a puo ki, ‘No ketseikevi hau a gei chüshü morosuo: avu thechü kehourapuo vo zo rei, a pu di, puo a prüulie’ silienushü” sita.

¹⁴Sitse Abimelek-e tekuo mu mithu, mu puo kituo thenumia rei mu thepfumia rei khapie Abraham tsü, mu puo kimia Sara kha lapie puo tsüwa.

¹⁵Süsie rei Abimelek-e sie, “A kijü sü n mhodzünu zhü ze, n thuo n neira lhouliecie” ita.

¹⁶Puo Sara üse, “Harie, a rakali nyie puo se n prüu tsüshü ho; süusü bu n zeketuo themia peteko mhi ki no mezhü ücü thashüwaketuo la.”

¹⁷Süsie Abraham-e Ukepenuopfü ki chashü, mu Ukepenuopfü Abimelek mu puo kimia siro puo kituopfüko pete chü keshürhoshü; uko bu uko nuo nyilieketuo la.

¹⁸Kekreilamonyü Jihovae Abraham kimia Sara la Abimelek kinuko pete nuobvü khawaketa la.