Read Angami Naga Keriekitho 21 Bible Online

Keriekitho 21 - Angami Naga bible

Keriekitho 21

¹Jihova pukeshü tuoi Sara ki vor mu Jihova phrakeshü mhiei Sara gei chüshü.

²Sitse Sara nuonipfülie, di Abraham tsa zenu thepfumia puo penuoshü puo tsü, Kepenuopfü pukeshü tei tou ki.

³Abraham-e Sara penuoshü puo ketsü thepfunuou za thopie Isak chülie.

⁴Sitse Abraham-e Ukepenuopfü puo ki diekhakeshü mhiei di zha thetha nhie puo zhü relie.

⁵Siro Isak penuokelie ki Abraham cie krie puota.

⁶Sara-e sie, “Ukepenuopfüe kenyü kha a tsüshüte, kehoupuorei a dze sikeliemia a ze di u neituo” isi.

⁷Mu puo sie, “Supuonie Sarae nuoranuo ngutuoücü Abraham ki pulie vi ta? Puo tsa zenu thepfunuomia puo penuoshü puo tsü ze ru,” ita.

⁸Siro unuoyo memie sie di nuokho chüta; mu Abraham-e Isak nuokholie viketa nhie thehe kezha puo chüshü.

⁹Derei Sara-e Ijiptpfü Hagar-e penuopie Abraham ketsü Ishmael-e Isak ze meruo chü keba ngushü.

¹⁰Süla puoe sie Abraham ki, “Kituo hapfü mu puo nuo unie whuowaliecie; kituo hapfü nuou a nuo Isak ze kayie chülie lhocü la.”

¹¹Mha hau Abraham la puo nou kesuo se puota, puo nuo Ishmael la.

¹²Derei Kepenuopfü Abraham üse, “N nuou mu n kituopfü la n nousuo ba hie, mha kehoupuorei Sara n ki kepu mhie chülie, Isak nuosenuoyie geinu n za kieketuo la.

¹³A n kituopfü nuou rei chüpie seyie puo chüshütuo, puoe n tsia zocü la” sita.

¹⁴Süla Abraham-e khiserüna sielie di niekhrüda mu dzü chüzhü sü puo chüpie Hagar tsüshü, siro süu pie puo bouka gei shü di puo nuou sa di hapfü ketsewa. Hapfü tuota mu vo Beersheba rayha nu rühou tuota.

¹⁵Siro chüzhü sü nu dzü tseita tse, hapfü unuoyo khapie seibo puo khro zhüwa.

¹⁶Sidi puo vo unuoyo ze kepeciekecü theü ciekeshü chie puo nu ba di sie, “A bu unuoyo se ngu hie zoyi” ibata. Siro puo vo sünu nu puo pfhephra di kra ba.

¹⁷Siro Ukepenuopfü unuoyo pfhe silie; mu Ukepenuopfü dielieu teigei nu Hagar kie di sie, “Hagar, kedipuo la n nou kemezhieta ga? Michie hiecie; Ukepenuopfüe n nuoyo kirapuo nu kra ba shiü puo pfhe si baketa la.

¹⁸Sielie, di vo n dzie pie unuoyo phou pieliecie, a puo chüpie seyie kezha puo chüshüketuo la” ita.

¹⁹Sitse Ukepenuopfü puo mhi chü kemhirhoshü ru puo dzükhou puo ngulie; puo vo dzü pelipie puo süu tshulie di se vo unuoyo bu krielie.

²⁰Siro Ukepenuopfü unuoyo zetuo di puo bu zhalie. Puoe rayha nu lhou sier theü se kesimia puo chülie.

²¹Puoe Paran rayha nu lhou; mu puo zuo Ijipt nunu thenu puo lieshü puo tsü.

²²Sümeseki Abimelek mu puo rüpfhünuo mhokezhau Fikol-e sie Abraham ki, “Ukepenuopfüe n mhatho nu n zetuoya.

²³Süla tsie Ukepenuopfü se di, a gei morei a nuonuoko gei, morei a nuosenuoyieko gei diethokemo chülie lhoü rüseshücie, a n gei tseikeshü mhie chüpie a gei mu no rüsomia chü di lhou keba kijüu gei shücie” ita.

²⁴Sitse Abraham-e sie “A rüseshütuo” ishü.

²⁵Süsie Abimelek kituoko dzükhou khakewa la Abraham-e Abimelek ki panyashü,

²⁶sitse Abimelek-e sie, “Supuonie hau chüwa shi a si mo, no rei a ki pu mo, mu süu thie nu zo mo ro si rei tuo mo” sita.

²⁷Süla Abraham-e tekuo mu mithu khapie Abimelek tsüshü; di unie dietseidiekho puo chüwa.

²⁸Abraham-e tekuo kro nunu tekuokrü thenie kha kreipie balie.

²⁹Süla Abimelek-e sie, Abraham ki, “Tekuokrü thenie kha kreipie keba hau puoca kedipuo ga?” ita.

³⁰Puo sie, “A dzükhou hau thieshü ücü zhapu puo chüketuo la n bu a dzie nunu tekuokrü hako lietuoü di we” ishü.

³¹Süla thechü süu üse Beersheba[24] üdi kieta; unie süki nu keze rüse puo chüwaketa la.

³²Sidi unie Beersheba nunu dietseidiekho chülie. Süsie Abimelek mu puo rüpfhünuo mhokezhau Fikol unie Filistinko kijü nu la vota.

³³Abraham-e tamariskbo puo leipie Beersheba nu shü, sidi Kechachie ketuo Ukepenuopfü[25] Jihova za kieshü.

³⁴Siro Abraham-e teisozha kekra Filistinko kijü nu solhimia chü di lhou.