Read Angami Naga Keriekitho 22 Bible Online

Keriekitho 22 - Angami Naga bible

Keriekitho 22

¹Mha hako sie Ukepenuopfüe Abraham dojü, di puo ki, “Abraham” si; ru puo sie “A haki bawe” sishü.

²Sitse puo sie, “N nuou zelie, n nuo pfuliu Isak, no puo khrieyakezhau, sidi tuose Moria kijü nu volie, di a n ki pushüketuo kijüthouko puo geinu puo khapie kethe ruosuo chüshücie” ita.

³Süla Abraham khiserüna sielie, di puo gadayo gei theba keselie, mu puo khriesamia kenie mu puo nuo Isak zelie, siro kethe ruosuo la sei phrolie, sidi Ukepenuopfü puo ki pukeshü thechüu nu vo.

⁴Zha se nhie Abraham tosie ru thechüu petse nu keba ngulie.

⁵Sitse Abraham-e khriesanie ki, “N nie gadayo ze di haki balie; a mu unuou hienie lutsakhie vo ruosuo chüwa di nnie ki la vortuo” sishü.

⁶Sidi Abraham-e kethe ruosuo kechü seiko chüpie puo nuou Isak bu pfülie; mu puo puo dzie nu mi mu zhietenuo pielie. Sidi unie keze tuo vota.

⁷Sitse Isak puo puo Abraham ki, “A Puo!” isi. Sitse puo sie, “A nuo a haki tuo zo” sishü. Puo sie, “Harie mi mu sei we tuo, derei kethe ruosuo la tekuonuou kirapuo ba ga?” isi.

⁸Abraham sie, “A nuo Ukepenuopfü thuo kethe ruosuo la tekuonuou khashütuo” sishü. Sidi unie keze tuo vota.

⁹Unie vor Ukepenuopfü pukeshü chüu tsokelie ki, Abraham-e süki nu ruosuobau chülie, di sei khapie sügei shülie. Sidi puo nuo Isak phalie di puo khapie ruosuobau gei seiko gei pie zhülie.

¹⁰Süsie Abraham puo nuou dukhrituoü puo dzie se zhietenuoyo chülie.

¹¹Derei Jihova dielieu teigei nu puo kie di sie, “Abraham!” isi. Puo sie, “A haki bawe” sishü.

¹²Sitse puo sie, “N dzie khapie unuoyo gei shü hiecie, puo gei mhapuorei chüwa hie; a tsie no Ukepenuopfü khrüpreiyakecü siliete, no a kinu n nuou, n nuopfuliu se bata mo ze ru,” sita.

¹³Süsie Abraham tosie mehoshü ru harie, puo sietsa tekuochü puo ronyho nunu puo kianie doupfü tha di ngulie, sitse Abraham vo tekuochüu ze vor di puo nuo sounu süu khapie kethe ruosuo chüwa.

¹⁴Süla Abraham-e thechü süu üse “Jihova Jireh” ilie mu thie ketso rei hai di putuoya “Jihova kijüthou-u geinu süu keseshütuo.”

¹⁵Siro Jihova dielieue teigei nu va kenie Abraham kie,

¹⁶di sie, “A a thuo rüseshüte, idi Jihova puya, no mha hau chükeshü, n thuo n nuo pfuliu se bata mo zocü la,

¹⁷a ja n tsü tou zotuo, mu a n nuosenuoyie chü pekrapie teigei themvüko mu dzükezha khie theshünyo mhieshütuo; siro n nuosenuoyiekoe uko ngumvümia kharu pevielietuo.

¹⁸tsiu n nuosenuoyie geinu kijü seyieko theja ngulietuo, kekreilamonyü no a die zeliete” ita.

¹⁹Sitse Abraham tuo khriesanie ki la vorlie, sidi uko keze Beersheba nu vota; mu Abraham Beersheba nu lhou bata.

²⁰Mha hako sie Abraham ki pukecü, “Harie, Milka rei nuo penuopie n siezeu Nahor tsüshüte.

²¹Nuorieu Uz, puo siezeu Buz, Aram puou Kemuel,

²²Kesed, Hazo, Pildash, Jidlaf mu Bethuel” isi.

²³Bethuel sier Rebeka puou chülie. Mia thetha hako Milkae penuopie Abraham siezeu Nahor tsüshü.

²⁴Sümhonu puo pelipfü, puo za Reuma üyakezhapfü rei Teba, Gaham, Tahash mu Maka hako penuolie.