Read Angami Naga Keriekitho 23 Bible Online

Keriekitho 23 - Angami Naga bible

Keriekitho 23

¹Sara-e teicie krie puo di mepfüethenie lhoulie. Sara kelhou teicie-e hade.

²Sara-e Kanan nu Kiriat-arba (süu Hebron) nunu siata; mu Abraham-e le Sara krü mu puo la kra.

³Siro Abraham kesiamo mhodzünu nu sielie di vo Hitmiako ki pu di sie,

⁴“Ae nieko donu solhimia mu mia kekreimia chü nieko donu lhouketuomia zo; nieko donu nu mekhruchü puo kha a tsücie, a bu a themia siaketa ki khru keviewaketuo la” isi.

⁵Sitse Hitmiako Abraham ki,

⁶“Hieko pfhe rünyüshücie, a niepu-u; noe hieko donu kedinuo kekuo puo zo. Hieko mekhruchüko n thuo n nei kedalie di kesiamia khruliecie, n bu kesiamia khruketuo la hie miapuorei mekhruchü khashü n tsü khrieta morei chakha chütalie lho” sita.

⁷Sitse Abraham-e sielie di vo Hitmia, kijü niepuko mhodzü nuketsushü.

⁸Sidi puo uko ki, “Nieko medo di a kesiamia khru kevielieketuo sie, a pfhe rünyüshücie, a la Zohar nuou Efron ki chacie.

⁹A bu se mekhruchü puo chülieketuo la, puo lieu mei ki kezhü Makpela tsiepfüu puoma lie tsei di se a tsücie” sishü.

¹⁰Efron-e Hitmiako donu ba, di Efron-e Hitmiako mhodzünu nu Abraham die kelashü, puo nadiu kharu nu keler pete mhodzünu nu sie,

¹¹“Mo, a niepu-u a pfhe rünyüliecie; a lieu mu puo nu keba tsiepfüu sa kha n tsüshüte, a themiako mhodzünu nu n bu kesiamia khrulieketuo la kha n tsüshüte” sita.

¹²Sitse Abraham-e kijü nu themiako mhodzü nuketsushü.

¹³Sidi puo themiako bu rünyüketuo la uko mhodzünu Efron ki pu di sie, “Derei no n medotuo ro, a pfhe rünyüshücie; a lieu ma khashütuo, a kinu süu pieliecie, sitse a kesiamo se sünu khrulietuo” sishü.

¹⁴Efron-e Abraham die kela di sie,

¹⁵“A niepuu, a pfhe rünyüshücie; kijü rakachü shekel krie dia ma puo sü avu donu kedipuoümu? Kesiamia khruliecie” ita.

¹⁶Siro Abraham-e Efron dieu puo medolie, di Abraham Hitmiako puo die kerünyüko mhodzünu nu rakachü shekel krie dia mejüpie Efron tsüwa, lhithomia donu priesa mejüyakezha medzi di.

¹⁷Süla Makpela nu Efron lietsa Mamre niathutsa kezhüu, sünu kezhü tsiepfüu mu ketsau nu keba seibo pete mu sükhiesümhou houpfü keba peteko

¹⁸Hitmiako mu nadiu kharu-u nu keler pete mhodzünu Abraham vie chüta.

¹⁹Hako sie Abraham-e puo kimia Sara pie Kanan kijü Mamre (Hebron ücüu) niathutsa kezhü Makpela nu tsiepfü nunu khruwa.

²⁰Siro lieu mu sünu kezhü tsiepfüu Abraham-e se mia kekhruchü chütuoü di Hitmia kinu khrüpie puo vie chülieta.