Read Angami Naga Keriekitho 24 Bible Online

Keriekitho 24 - Angami Naga bible

Keriekitho 24

¹Tsiewe Abraham-e tsate, puo teicie rei kho phita; mu Jihovae mha pete nu japie Abraham tsü.

²Siro Abraham-e sie puo kinu kituo phichütho-u, puo vie pete mehoyakezhau üse, “N dzie pie a dokhro shüshücie,

³di n bu Jihova, tei mu kijü Kepenuopfü za se rüsetuo, a uko donu lhouketuo Kananpfüko liepie a nuou tsülie lho zoü di,

⁴derei a kijü mu a se a yieko ki vo di a nuo Isak kimia ze vortuo” sita.

⁵Sitse kituou sie puo ki, “Mhanuü thenupfü a siemedzi thechü hau nu vor mvüta ro, a bu n nuou ze no kevor thechüu nu la vo morosuotuo me?” ita.

⁶Abraham sie puo üse, “Kehoupuo chü rei no a nuou ze sünu la vo hiecie.

⁷Jihova, teigei Kepenuopfü, a puo ki nunu a kepenuochüu nunu a zekelieu, tsiu a rüchü mu a ki rüsekeshü, ‘A kijü hau khapie n nuosenuoyieko tsütuo’ ikeshüu, puo puo dielieu ketsepie n mhodzü shütuo, mu no sünu nu a nuou kimia ngulietuo.

⁸Mhanuü thenupfü n siemedzi mvüta ro, rüse hau bu n pha salie lho; derei a nuou we ze sünu vo mo zolie” sishü.

⁹Sitse kituoue puo dzie pie puo niepu-u Abraham dokhro shüshü, di mhatho hau chüketuo la rüseshüwa.

¹⁰Süsie kituou puo niepu-u ut ker zelie mu se mia tsüketuo mhanyamhara kevi huo pfülie di tuota; puo sie di tuo se Masopotamia kijü nu Nahor nadiu nu vo.

¹¹Siro thevatie thenumia dzü keü teiki, nadiu casie dzükhou khieki puo utko bu khoutou balie.

¹²Sidi puo sie, “He-i Jihova, a niepu-u Abraham Kepenuopfü, a n ki chaya, a bu thie mhachü khrielieyi, mu ketseikevi pie a niepuu Abraham pekieshücie.

¹³Harie, a dzükhou khieki tha, mu nadiu nu themiako nuopfüko dzü ütuoü vorzhie.

¹⁴A puo rüchükeshü rüüpfü bu hamhielie üthienyü, ‘N pezie rei, n lipfhü seker di a bu dzü kriecie’ ishü ro, süpfü sie, ‘Krieliecie, mu a dzü pie n utko bu rei krielietuo’ ikeshüpfü bu noe n kituou Isak la kedase kebapfü chüliecie. Sügeinu ae no a niepu-u Abraham gei tseikeshü silietuo” sita.

¹⁵Puo diepu tseilie kemo nu harie, Abraham siezeu Nahor kimia Milka nuou Bethuel nuopfü Rebeka puo lipfhü puo bouka geinu pie di tuo vor.

¹⁶Rüü hapfü zivi, thepfumia puorei puo siwa kemo rüü phousepfü puo. Puoe dzükhou nu ke dzüü pie puo pfhü tshulie di khor.

¹⁷Sitse kituou puo ze kesetuoü ta vo, di sie, “N pezie rei, n lipfhü nunu dzü huoyo pie a bu kriecie” ishü.

¹⁸Sitse hapfü sie, “Krieliecie, a niepu-u” isi; sidi puo rükri puo dzie pie puo lipfhü se ker di puo bu krielie.

¹⁹Puo krie tseilie tse süpfü sie, “A n utko bu rei krieketuo la dzü üshütuowe” ita.

²⁰Sidi rükri puo pfhü rupie dzübou nu shüwa di dzüü latuoü ta vota, mu puo utko pete la dzü üshü.

²¹Siro themiau sü Jihova puo rüve chü pevishü mo mo shi silietuoü di süpfü meho terü thata.

²²Utko dzü krie tseilieta tse, themiau suna nyhükha shekel tie puo mesi puo, mu süpfü dzie la shekel ker mesi suna thuo kenie chülie,

²³di sie, “No supuo nuopfü shi a ki pushücie. N puo kinu hieko bu balie kevi thechü ba me?” sishü.

²⁴Hapfü sie puo ki, “A Milka penuoshü Nahor ketsüu Bethuel nuopfülie” si.

²⁵Süsie puo pu sacü, “Hieko rügu mu khunuo ca ba phi, mu balie kevi thechü balie” ishü.

²⁶Sitse themiau tsünge di Jihova rüsuota,

²⁷di sie, “A niepu-u Abraham Kepenuopfü bu thejakepfüu chücie, puoe a niepu-u gei puo kekhrie mu ketseikevi khawa mo zocü la, a zowe Ukepenuopfü thuo a chatha ze a niepu-u yiemia ki vorliete” sita.

²⁸Sitse rüüpfü ta puo kinuko ki vo di mha hako pete pushü.

²⁹Rebekae puo prü puo ba, puo za Laban; Laban-e ta se dzüluo-u nu themiau ki vor.

³⁰Puoe puo üpfü gei nyhükha mu puo dzie gei puo thuonie ngushü mu puo üpfü Rebekae “Themiau sidi pulie” ikeshü sishü tse, puoe themiau pfhü vor, mu themiau dzükhou-u nu utko khieki tha ngulie.

³¹Sitse puo sie, “Vorlie, Jihova theja kepfüu; no kiüdi chazou tha zo ga? A kinu utko la thechü kesepie bate” sita.

³²Sitse themiau kinu lerlie. Mu Laban-e utko pie lhouwa, di rügu mu khunuo ca pie uko tsüshü, tsiu themiau mu puo zeketuoko phi khrüketuo la dzü khashü.

³³Süsie kecüca kesepie puo mhodzünu shü; derei puo sie, “A dielieu pushüwa kemochie mhacülie lho” ita. Laban sie, “Pushülie” sishü.

³⁴Süla puo sie, “Ae Abraham kituouwe,

³⁵Jihova japie a niepu-u tsü phishüte; sidi puo mhanyi philie; Ukepenuopfüe tekuo mu mithu kro, rakachü mu suna, kituo thepfumia mu thenumia rei, utko mu gadako rei kha puo tsü.

³⁶Siro a niepu-u kimia Sara-e puo tsa zenu thepfumia puo penuopie a niepu-u tsü; mu puoe puo vie pete kha puo tsüwate.

³⁷A niepu-ue a bu rüse di pukecü, ‘No a nuou la ae uko kijü nu lhou keba Kananmiapfüko liepie a nuou kimia chülie lho.

³⁸Derei no a puonuo kinuko mu a seyieko ki vo di a nuou kimia ze vorcie,’ isi.

³⁹Sitse a a niepu-u üse, ‘Mhanuü thenupfü a siemedzi mvüta ro’ ishü.

⁴⁰Derei puo a ki, ‘Jihova, a mhodzünu ketuou, puo dielieu ketsepie n ze voshütuo, di n cha chü pevishütuo; mu no a seyieko mu a puo kinuko ki nunu a nuou kimia zeliecie;

⁴¹süsie a rüseu bu n pha salie lho, mhanuü uko süpfü khashü n tsü mota rei, no rüseu bu n pha sa motatuo,’ isi.

⁴²“A dzüluou nu vor di sie, ‘He-i Jihova, a niepu-u Abraham Kepenuopfü, no thie a voketuo cha chü pevishü ro,

⁴³harie, a dzükhou khie ketha ki, rüümiapfü puo bu dzüütuoü parcie, sitse a puo ki, “N lipfhü nunu a bu dzü krienu chaya” si.

⁴⁴Mu süpfü sie a ki, “Krieliecie, mu a n utko la rei dzüüshütuo” isikeliepfü bu Jihovae a niepu-u nuou la kedase kebapfütaüliecie!’ itha.

⁴⁵“Sitse a nou nu diepu tseiwa kemo nu, Rebekae puo bouka geinu lipfhüu pie di tuo vor; sidi puo ke dzüluou nunu dzüülie di par, sitse a sie puo üse, ‘A bu dzü krienu chayalie’ ishü.

⁴⁶Sitse puoe rükri puo bouka geinu lipfhüu se ker di pucü, ‘Krielie, mu a n utko bu krieketuo la rei khashütuo’ ilie. Süla a dzü krielie, mu puoe utko bu rei krielie.

⁴⁷Süsie ae sie, ‘No supuo nuopfü ga?’ ishü. Puo sie, ‘Milkae penuoshü Nahor ketsü nuou Bethuel nuopfülie’ ilie. Sitse a nyhükhau pie puo nyhü nu shüshü, mu kethuonie pie puo dzie nu shüshü.

⁴⁸Süsie a nuketsu Jihova rüsuo mu a Jihova tshe, sidi a niepu-u Abraham Kepenuopfü, puotoukecü chau nu a ze vor puo nuou la lieketuo a niepu-u yiemiako kinu keshü Ukepenuopfüu tsheshü.

⁴⁹Siro tsie, nieko a niepuu gei tseiüvi mu diethoshütuo üro, a ki pushücie; mu lie lho ürei a ki pushücie; a bu rürei thezatsa morei thevitsa valieketuo la” sita.

⁵⁰Sitse Laban mu Bethuel unie sie, “Mha hau Jihova kinu vorte; hie hie nei morei mokecü n ki pulie kenjüte.

⁵¹Harie, Rebeka n mhodzünu ba, puo ze di volie, sidi Jihova pukeshü tuoi puo bu n niepu-u kimia chüliecie” ita.

⁵²Abraham kituoue unie dieko silie tse, nuketsu kijü Jihova mhodzü zhüta.

⁵³Süsie kituou suna mu rakachü üse kechü cümenyieko mu pfhemeneiko se vor khapie Rebeka tsüshü; süsie puoma kere rütsonya huo khapie puo prüu mu puo zuo rei sa tsüshü.

⁵⁴Süsie kituou mu puo zeketuoko mhacümhakrielie di süzhü uko kinu bata. Uko khise sierlie tse, Puo sie “A niepu-u ki a ketseshüwatacie” ishü.

⁵⁵Sitse hapfü prüu mu puo zuo sie, “Rüüpfü bu puotei huoyo, ketsa nu rei zha ker hieko ze bacie, süsie we puo bu tuolietuo,” sita.

⁵⁶Derei kituou sie uko ki, “A bu menyhota hiecie, Jihova a cha chü pevishüte ru, a bu tuotacie, siro a a niepu-u ki volietuo” ishü.

⁵⁷Sitse uko sie, “Hieko rüüpfü kie di puo ketsotuo” ita.

⁵⁸Sidi uko Rebeka kieshü di puo ki, “No themia hau ze votatuo me?” ishü. Puo sie, “A votatuo” ita.

⁵⁹Süla uko uko üpfü Rebeka, puo kituopfü tsiu Abraham kituou mu puo zeketuoko ketseshüwa.

⁶⁰Siro uko japie Rebeka tsü di sie puo ki, “Hieko üpfü, nyie kercü nyienyie zuopfü chülieluo, n nuosenuoyieko bu uko ngumvümia care pevieliecie” sishü.

⁶¹Sitse Rebeka mu puo kituopfü utko gei balie di themiau siemedzita. Siro kituou Rebeka zelie di puo cha nu vota.

⁶²Isak-e Berlahairoi nunu vor di Negeb nu balieta.

⁶³Siro Isak-e mha medotuoü di thevatie lie nu vozhü, süki puo tosie ru, harie, utko vorkezhü ngulie.

⁶⁴Mu Rebeka-e tosie Isak ngu tse, puo ut geinu kerlie,

⁶⁵di sie kituou ki, “Lutsakhie nu supuo lie nunu úko ze kesetuoü vorzhü ga?” ita. Kituou sie, “Puo a niepu-ute” ishü. Sitse puo puo tsüdzeu chüpie puo zie yalieta.

⁶⁶Siro kituou mhachüketa pete pie Isak ki pushü.

⁶⁷Süsie Isak-e süpfü ze puo zuo Sara dzüpfhekiu nu lerlie di süpfü bu puo kimia chülie; mu puoe süpfü khrielie sidi Isak-e puo zuo se sie puo nou luo lalie.