Read Angami Naga Keriekitho 25 Bible Online

Keriekitho 25 - Angami Naga bible

Keriekitho 25

¹Abraham-e thenu kekreipfü puo lie la, puo zae Ketura.

²Süpfü geinu lhoukelieko hako Zimran, Jokshan, Medan, Midian, Ishbak mu Shua.

³Jokshan-e Sheba mu Dedan unie Puou. Dedan nuoko Ashurim, Letushim mu Leumim.

⁴Midian nuonuoko ro: Efa, Efer, Hanok, Abida mu Elda. Hako pete Ketura nuonuo.

⁵Abraham-e puo vie keba pete khapie Isak tsüwa.

⁶Derei Abraham-e puo meshüpfüko nuonuo la rei mha methuo khapie uko tsü. Sidi puo rhei baluocü nu Isak kinu uko ketsepie niathutsa rüna nu shüwa.

⁷Abraham kelhouzha, cie krie puo di hietheniepengou.

⁸Abraham-e phichümia puo chü tsato ba di puo keha thelau hashüwa di siata, mu puo themiako ki vota.

⁹Puo nuonie Isak mu Ishmael-e Hitmia Zohar nuo Efron lieu nu, Mamre niathutsa kezhü Makpela tsiepfüu nunu puo khruwa.

¹⁰Lie hau Abraham-e Hitmia kinu khrülie. Sünu nu puo kimia Sara ze Abraham khruwa.

¹¹Abraham se sie Ukepenuopfü japie puo nuo Isak tsüshü mu Isak-e Beer-lahai-roi nu lhouta.

¹²Hakohae Sara die Ijiptpfü geinu penuopie Abraham ketsü nuou Ishmael nuosenuoyieko.

¹³Ishmael nuonuo kesieso di penuokelieko za hamhie: Ishmael nuorieu Nebaiot, süsie Kedar, Adbil, Mibsam.

¹⁴Mishma, Duma, Masa,

¹⁵Hadad, Tema, Jetur, Nafish mu Kedema.

¹⁶Hako Ishmael nuonuoko mu uko za, uko rüna mu kebachüko mu uko seyie geinu lekeshü kedinuo kerekenie.

¹⁷Hako Ishmael lhoukelie teicieko, cie krie puo di serethenie sidi puo siata, mu puo ze puo themiako kinu vota.

¹⁸Ishmael nuosenuoyiekoe Havila nunu vo Shur ketso donu lhou, süu Asiria kevatsa Ijipt kepetsou nu zhü mu puo siezedzürieko donu lhou tuota.

¹⁹Hako Abraham nuou Isak nuosenuoyieko: Abraham-e Isak Puou

²⁰mu Isak-e puo kimia Rebeka, Padan-aram nu Aramimia Bethuel nuopfü mu Aramimia Laban üpfü.

²¹Isak-e puo kimia nuojüpfü puocü la Jihova ki cha; sitse Jihova puo kecha chü puo tsü, di puo kimia Rebeka bu nuonipfülieta.

²²Puo nuonie puo vanu tuoluocünu kegei tuota; süla puoe sie, “Haituoü ro, kiüdi a bu rheituo shi?” ituoya. Süla puoe Jihova ki ketsotuoü vo.

²³Sitse Jihovae puo ki, “Seyie kenie-e n va nu tuo, mu n geinu penuokeshünie kepfüphrotatuo; mu mia puoe kekreiu ki kuokuotuo, phichüu nhicuu theketuo” si.

²⁴Puo nuoze tei tsolie tse, harie puo va nu nuobi tuo.

²⁵Phichüu penuolie ru puo mo pete merie mu puomie tsüpie pfhemie tuoi zo; süla uko puo za thopie Esau chülie.

²⁶Süsie puo siezeu penuolie, mu puo dzie-e Esau phitshü teshü par; süla puo za thopie Jakob chülie. Siro Rebeka-e nuo sünie penuokeshü ki Isak-e cie hiesorouta.

²⁷Unuonie zha sierkelie ki, Esaue nha nu chüwhuo kevimia puo chü, derei Jakob-e zei-i di pfheki nu baya.

²⁸Isak-e Esau khrieya, kekreilamonyü puoe süu chügei puo neiyakezha la, derei Rebekae Jakob khriekuoya.

²⁹Khunhie puo Jakob-e gadzü puo kemeluopie zha; süki Esau lie nunu vor, mu puo va merü setuo.

³⁰Süla Esau-e Jakob ki, “A bu no mhacha kemerieyharapie kebau huo cücie, a merüketa la” si. (Süla puo za üse Edom[26]) üya)

³¹Jakob sie, “N phichüzhau se a ki ze riecie” ita.

³²Esau sie, “A siatatuoüzhie, mu a a phichüzhau se kedipuo chü ta?” ita.

³³Sitse Jakob sie, “A ki rüseshü riecie” ita. Süla puo rüsewa di puo phichüzhau se Jakob ki zewa.

³⁴Süsie Jakob-e niekhrüda mu rücü galuou pie Esau tsüshü; mu puo mhacümhakrielie di sie tuota. Hamhie di Esau puo phichüzhau zhasewa.