Read Angami Naga Keriekitho 26 Bible Online

Keriekitho 26 - Angami Naga bible

Keriekitho 26

¹Abraham teiki kesier pekrie therieu rübei kemo pekrie kekrei puo kijü nu la sier, süla Isak-e Gerar nu Filistinko kediu Abimelek ki vo.

²Sitse Jihova puo pengushü, di sie, “Ijipt nu vo hie, a n ki pushütuoükezhü kijüu nu lhoulie.

³Thechü hau nu rüsomia chü di lhoulie, derei a n ze tuotuo mu ja n tsütuo, kijü hako pie no mu n nuosenuoyieko tsüshüketuo la, siro a n puo Abraham ki rüsekeshü chü tseishütuo.

⁴A n nuosenuoyieko chü pekrapie teigei themvüko mhieshütuo, mu kijü hako pie n nuosenuoyieko tsütuo; tsiu n yieko geinu kijü nu seyie pete bu theja pfütuo,

⁵Abraham-e a pfhe rünyü mu a dieko se balie, a die khakeshü, a kepethadieko mu a zhoko zekelie la” si.

⁶Süla Isak-e Gerar nu lhouta.

⁷Siro thechü sünu themiako puo kimia dze ketsocü ki, puoe sie, “Puo a üpfülie” ishü. Puoe puo a kimia icü pu michieketa la, puo lekecü, “Thechü hau nu themiako Rebeka la a dukhriwa rei si lho mu” icü lecü la, hapfü ngu zivi phi eru.

⁸Puo thechü sünu ba pechaketa sie, Filistinko kediu Abimelek-e khirki nunu mha mehoshü ru Isak-e puo kimia Rebeka ze kekhrie keba ngulie.

⁹Süla Abimelek-e Isak kielie di sie, “Harie, hapfü n kimia zo! No kiüdi ‘Puo a üpfülie’ idi pu ga?” ita. Isak sie puo ki, “Kekreilamonyü a hapfü la a siata rei si lho mu, itelie” sishü.

¹⁰Sitse Abimelek sie, “Hieko gei chükeshü mha hau kedipuo ga? Themiako donu mia puo n kimia zezhüwaketuo sü rüü phi ze, siliro no kejo se vor hieko gei shütie” sita.

¹¹Sidi Abimelek-e themia peteko ki sie, “Kehoupuorei themia hau morei puo kimia kebieu bu sia petuo zotuo” iwa.

¹²Siro Isak-e kijü sünu tsia prushü, ru süu teicie nu süde krie puo ngu lalie. Jihova japie puo tsü.

¹³Sidi themiau mhanyilie, mu puo mhanyi sa philie kemochie kruo miemiezhüta.

¹⁴Puoe tekuo mu mithu kro rei nyi, mu puo kirinuoko rei kra seta, süla Filistinko puo ngu urota.

¹⁵Sitse puo puo Abraham teiki puo kituoko bu thiekeshü dzükhouko rei Filistinkoe khawa mu rünyo pie luowa.

¹⁶Sitse Abimelek-e sie Isak ki, “Hie kinu tuotacie; noe hieko ki kuokuoketa la” ita.

¹⁷Süla Isak-e sünu nu tuota, di vo Gerar razha puo nu razhüchü ba di sünu lhouta.

¹⁸Siro Isak-e puo puo Abraham teiki thiekeshü dzükhouko thie kesa lalie; Filistinko Abraham se sie khakewa la; mu puo thiedzü puo puoe thokeshü zako se süko kie lalie.

¹⁹Derei Isak kituoko razhau nu dzükhou thielie di dzü ngukelie ki,

²⁰Gerar nu thupfheko puo ze kemeü di sie, “Dzü hieko vie” ita. Süla puo dzükhou-u za thopie Esek[27] chüwa, kekreilamonyü ukoe puo ze kemeüketa la.

²¹Süsie uko dzükhou kekrei puo thie lalie, süu la rei uko puo ze kegei lata; süla puo süu za thopie Sitna[28] chü la.

²²Sitse puo sünunu tuota di vo dzükhou kekrei puo thie lalie, süu la we mia uko ze kemeü mota; süla süu za thopie Rehoboth[29] chülie, di pucü, “Tsiewe Jihova u la thechü khashüte ru úko kijü hau nu kruolietuo” ita.

²³Sünu nu puo tuo se Beersheba nu vota.

²⁴Sitse Jihova süzhü puo mho geinu puo pengushü di sie, “Ae n puo Abraham Kepenuopfü zo, michie hie, a n zeketuo la, mu a ja n tsütuo, tsiu a kituou Abraham la n nuosenuoyie chü pekrashütuo” sita.

²⁵Süla puo sükinu ruosuoba puo chülie di Jihova za kieshü, mu puo pfheki pie süki pethoupie balie. Sidi Isak kituoko dzükhou puo thielie.

²⁶Sitse Abimelek-e Gerar nunu puo tarhoyakezhau Ahuzat mu puo rüpfhünuo mho kezhau Fikol zelie di puo ki vor.

²⁷Isak-e uko üse, “Kiüdi a ki vorzhü ga, nie a ngumecü di nie kinu nu a ketsewata mo me?” ita.

²⁸Sitse uko sie, “Jihova n ze ketuo hie ngu toute; süla úko donu pfhekho puo bu balie di hie bu n ze dietseidiekho puo chüwacie idi hie puya.

²⁹Siliro hieko rei n bie mo mu n gei mha kevi sie kesuo puo rei chüwa mo di kezekevi nunu n ketsekewa tuoi, n bu rei hieko pechü kelho la. Noe Jihova theja kepfüute ru” sita.

³⁰Sitse puo thehe puo kesepie uko tsü, di uko bu cüükrielie.

³¹Süsie uko khiserüna sielie di rüse pie huoniehuo kiewa; mu Isak-e uko cha nu uko ketseshüwa, mu uko nou mene di puo ze kekhota.

³²Teisozha sünhiesü Isak kituoko vor di uko thie keba dzükhou dze pie puo ki pu di, “Hieko dzü nguliete” isi.

³³Puoe süu za thopie Shiba[30] chüwa; süla thie ketso rei nadi süu za üse Beer-sheba[31] üdi kietuoya zo.

³⁴Esau cie hiedia keta ki Hitmia Biri nuopfü Judit mu Hitmia Elon nuopfü Basemat unie lielie;

³⁵mu unie la Isak mu Rebeka unie bu lhou re phita.