Read Angami Naga Keriekitho 27 Bible Online

Keriekitho 27 - Angami Naga bible

Keriekitho 27

¹Isak-e tsata mu puo mhi merü di mha ngu moketa ki, puo nuo phichüu Isau kieshü di puo üse, “A nuo” isi, ru puo sie, “A haki bawe” ishü.

²Isak sie, “Harie, ae tsate; a se zha si mote.

³Süla no tsie n rünyieko, n theütsie bouko mu theü selie di nha nu tsucie di chügei se vor a tsücie.

⁴Sidi a neiyakezha, gacha chülie di se vor a bu siaketa mhodzü japie n tsüshüketuo la” ita.

⁵Rebekae Isak puo nuo Esau rüchü keba ki unie die rünyü ba. Süla Esau chüwhuotuoü nhanu tsuketa ki,

⁶Rebeka puo nuo Jakob ki, “N puoe n dzürieu Esau ki,

⁷‘Nhachü se vorlie di cü kevi mhacha chüpie a bu cücie, a bu siaketa mhodzü Jihova mhodzünu japie n tsüshüketuo la’ ikeba a si ho.

⁸Süla a nuo, tsie a die ze di a n ki pukeshü chüliecie.

⁹Khunuo kro nu vo di puo phou kevi se vorlie, siro a n puoe puo neiyakezha gacha cha puo tsüshütuo;

¹⁰mu n bu se vo n puo tsütuo, sidi puo bu cülie di puo se mhodzü jashü n tsütuo” ita.

¹¹Derei Jakob sie puo zuo Rebeka üse, “Harie, a dzürieu puomie kenyi puo, mu a we themia kemeju puoe.

¹²Mhanuü a puoe a kese di a puo seketuo silie ro, theja monyü rüse se vor a gei shülietatie” ita.

¹³Puo zuo sie puo ki, “Rüseu bu a gei vortacie, a nuo a dieze di vo sünie se vorlie” ita.

¹⁴Süla puo vo di sünie se vor puo zuo tsüshü; mu puo zuoe puo puo neiyakezha gacha chalie.

¹⁵Süsie kinu nu puo nuo phichüu pfhenei kevithoko chülie di pie Jakob bu selie.

¹⁶Siro khunuo zhü lopie puo dzienie mu puo vo kemeju gei rei dashü.

¹⁷Sidi puoe kesekelie cü kevi gachau mu niekhrüda khapie puo nuo Jakob dzie nu shüshü.

¹⁸Sitse Jakob-e puo puo ki vo di sie, “A Puo” ishü; ru puoe sie, “A haki bawe, no supuo ga, a nuo?” ishü.

¹⁹Jakob sie puo puo ki, “Ae n nuo nuorieu Esau we, no a ki kepu kemhiei chüliete; tsie sielie di a chügei cülie di, n bu jashü a tsüketuo la setuolie” ishü.

²⁰Derei Isak sie puo nuou üse “A nuo kedipuomhie di mha ngu mhailiete mu?” ita. Puo sie, “Jihova n Kepenuopfü a bu khriekelie la zemu” ishü.

²¹Sitse Isak sie Jakob ki, “A nuo phircie, a bu n keseshüketuo la, a nuo, mu no a nuo Esau tou zo mo mo shi silieketuo la” sita.

²²Süla Jakob-e tuo puo puo Isak penuo phi, ru puo puoe puo kese di sie, “Puo pfhe we Jakob pfhe, derei puo dzie we Esau dzie ze,” ita.

²³Sidi puo silie mota, kekreilamonyü puo dzienie-e puo dzürieu Esau dzie tuoi puo mie nyiketa la; süla puo japie puo tsüwa.

²⁴Isak sie, “No a nuo Esau tou zo me?” ishü, puo sie “N zo” ita.

²⁵Süla puo sie, “Süu se phirshücie, a bu a nuo chügeichüu cülie di jashü n tsüketuo la” sita, süla puo süu se phi puo penuoshü di puo bu cüükrielie; siro puo khubedzü se vorshü ru puo krielie.

²⁶Süsie puo puo Isak-e sie puo üse, “A nuo, penuo phir di a meboshücie” ita.

²⁷Süla puo puo penuo phi di puo meboshü, ru Isak-e puo pfhenei thengu di jashü puo tsü di sie, “Harie, a nuo re sü, Jihova japie ketsü lieu re mhielie!

²⁸Ukepenuopfü bu teigei thezeiu se n tsücie, tsiu telha mu khubedzü ketshukelhuoshücie.

²⁹Themiako bu n theke chücie, mu seyieko tsu n kelutuo. N siezedzürieko mho kezha chülie, mu n zuo nuonuoko bu tsu n kelutuo. N kerüse kehoupuo bu rei rüsepfütuo, mu ja n ketsü kehoupuo bu rei thejapfütuo!” ishü.

³⁰Siro Isak-e japie Jakob tsü tseiwa di Jakob-e puo mhodzünu nu tuo prata mumetha puo dzürieu Esau sü chüwhuoketuo nunu vorlie.

³¹Sidi puo rei ga chapie cü vi selie, di se puo puo ki vor. Sidi puo puo ki, “A puo bu sielie, di puo nuou chügeichü cücie, n bu jashü a tsüketuo la” si.

³²Sitse puo puo Isak sie puo üse, “No supuo ga?” ita. Puo sie, “A n nuo, nuorieu Esaulie” ishü.

³³Sitse Isak pekhrukhru di sie, “Di siro no vor kemo nu khunuo chügei üdi chase vor a bu cülie mu a bu japie puo tsüwaketau supuo ga? Uwe, puo thejapfülieta zotuo!” ita.

³⁴Esau sü puo puo die sikelie ki kra meleimekuoi di sie, puo puo ki, “Jashü a rei tsü zocie, a puo” ita.

³⁵Derei puo sie, “N siezeu vor a sewa di n thejau sete” ita.

³⁶Esau sie, “Puo za thopie Jakob chü toulie moü me? Puo tsieu va sa va kenie a selieketa la. Puo a phichüzhau lielie, mu harie, tsiewe a theja rei lieliete” ita. Sidi puo sie, “No a la theja puo rei khapie ba mote me?” ita.

³⁷Isak-e Esau üse, “Harie, a puo bu n niepu chüketuo chüwate, siro puo siezedzürie pete bu puo kituo chüketuo a kha puo tsüwate, tsiu a telha mu khubedzü kha puo khruohishüwate. A nuo, a bu n la kedipuo cha salietuo mu?” ita.

³⁸Süsie rei Esau sü puo üse, “No theja puo rübei bacü zo me? Japie a rei tsü zocümu, a puo” ita. Sidi Esau sü puo pfhephra di kra bata.

³⁹Sitse puo puo Isak sie puo ki: “Harie, n bu kijü kekruoko nu lhou motatuo mu tei peso geinu thezei khashüyakezha n ketsüko nu lhou motatuo,

⁴⁰Siro zhiecha se di n bu lhoutuo, mu no n siezeu theketuo; derei no puo petsou kesie nhie we, n vo gei puo vocieu lhouwatuo” ishü.

⁴¹Süsie Esaue puo puo japie Jakob tsükewa thejau la Jakob ngumecüta, süla Esaue puo thuo puo rüchü di sie, “A puo la thekrü chüketuo zhako penuo bate; süla a a siezeu Jakob dukhriwatuo” ibata.

⁴²Derei puo nuo phichüu Esau dieko pu vo Rebeka bu silieta; sitse puo puo nuo nhicu-u Jakob kielie di sie, puo ki, “Harie, n dzürieu Esau sü n dukhriwatuoü rhükelieu pie puo thuo puo nou thupeluo se bate.

⁴³Süla a nuo no tsie a die zeliecie; sidi sielie di tase a prüu Laban ki votalie.

⁴⁴Sidi dopuo puo ze batalie, n dzürieu bu puo noupfhünouyie rükreta kemochie;

⁴⁵n dzürieu bu puo nou kemeyie nu rüdita, di no puo gei chükeshüu rükra moketa sie, a mia ketseshü di sünu nu n zelietuo. Kiüdi a bu khunhie puo nu nnie kenienie pejü phrewatuo dimu?” ita.

⁴⁶Süsie Rebeka-e Isak ki, “A we Hitmiapfüko la a nyieta zolie. Mhanuü Jakob rei rüna hau nu lhou keba Hitmiapfü haikecüpfü puo lie latuoü ro, a kelhou kedipuo kemevi ba ta?” ita.