Read Angami Naga Keriekitho 28 Bible Online

Keriekitho 28 - Angami Naga bible

Keriekitho 28

¹Süsie Isak-e Jakob kielie di japie puo tsüshü, mu puo ki pu bei di sie, “N bu Kananpfüko miapuorei lielie lho.

²Sielie, di Padan-aram nu n zuo pfutsa Bethuel kinu volie; sidi n meiu Laban nuonuoko miepfü puo liepie n kimia chüliecie.

³Kuokejokejüu Ukepenuopfü[32] bu japie n tsülie. N chü pekruo mu chü pekrashücie, n bu seyie kekra pfutsau chülieketuo la.

⁴Puo bu Abraham thejau pie n tsülie, no mu n zeketuo n nuosenuoyieko pete, sidi n bu rühouketuo kijüko Ukepenuopfüe khapie Abraham tsüwaketa kijüko pie n viechülietuo,” sita.

⁵Sidi Isak-e Jakob ketsewa, mu puoe Padan-aram nu Aramimia Bethuel nuou Laban, Jakob mu Esau unie zuopfü Rebeka prüu kinu vota.

⁶Siro Esaue Isak japie Jakob tsüshü di puo ketsepie Padan-aram nu shü di puo bu sünu nu thenu lielienukeshü, mu japie puo tsü di puo ki pu bei di “No Kananpfüko miapuorei lielie lho” ikeshü

⁷mu Jakob-e puo puo mu puo zuo die ze di Padan-aram nu voketa ngushü.

⁸Sidi Esaue puo puo mu puo zuo unie Kananpfüko ngu unie nei mo zokecü silie.

⁹Sitse Esau puo kimia bata zorei Ishmael ki vo di Abraham nuou Ishmael nuopfü Mahalat, Nebaiot üpfü liepie puo kimia chü la salie.

¹⁰Jakob-e Beersheba khawa di Harantsa vota.

¹¹Sidi puo thechü puo nu vorlie di süzhü sünu bata. Kekreilamonyü niaki leketa la. Puoe süki kezhü ketsie puo chüpie puo tsükhe chülie di zelietuoü zhüta.

¹²Sitse puo mho pema mu kheya puo kijü doupie tha, mu puo tsüu kho tei tso ba; mu harie, Ukepenuopfü dielieko sügei kho mu ke ba!

¹³Siro harie, Jihovae puo khieki tha di pucü, “Ae Jihova, n puo Abraham Kepenuopfü mu Isak Kepenuopfü; no zhükezhü kijüu, a pie no mu n nuosenuoyie tsütuo;

¹⁴mu n nuosenuoyieko bu kijü nu nyophe mhietuo, sidi nieko bu niakra mu niathu ketso, peso mu pekhro pete nu tshupfü votatuo; siro no mu n nuosenuoyieko geinu kijü nu ketuo kikru pete bu thejapfütuo.

¹⁵Harie, a n ze tuo zo, mu n kevo cha pete nu n rüguose tuotuo, sidi n ze la thechü hau nu vorshütuo; a n ki pukeshüko chüshüwa kemochie a n khawalie lho zocü la” sita.

¹⁶Sitse Jakob-e keze nunu cosier di pukecü, “Jihova thechü hau nu ba tou zo mu a süu si tuo mo” ita.

¹⁷Siro puo michieta di sie, “Thechü hau u ngo za! Hauha Ukepenuopfü ki kemo puorei mota zo, mu hauha teigei kharu-uta zo” ita.

¹⁸Siro Jakob khiserüna sielie di puo tsükhe chüpfü kezhü ketsieu chülie di süu doupie tsiese puo chüshü, sidi tier lapie süu tsüle gei shüshü.

¹⁹Sidi puo thechü süu za thopie Bethel[33] chüwa; sümhodzü we nadi süu üse Luz üya.

²⁰Süsie Jakob rüse di sie, “Ukepenuopfü a ze tuo, mu a kevo cha nu a rüguo setuo liro, tsiu thiethie va niekhrüda se a tsü mu dziemeneiketuo la pfhemenei se a tsü üliro,

²¹a bu vi di a puo kinu la vorlie üro, a Jihova pie a Kepenuopfü chütuo.

²²Mu a ketsie hau pie tsiese puo chü di sekeshüu bu Ukepenuopfü ki chütuo, mu no mha kha a ketsü peteko nunu a ker za puo pie n tsü petuo zotuo” ita.