Read Angami Naga Keriekitho 29 Bible Online

Keriekitho 29 - Angami Naga bible

Keriekitho 29

¹Siro Jakob-e rüve se niathutsa kelhou themiako kijü nu volie.

²Sidi puo mha mehoshü ru, harie, lie nu dzükhou puo mu tekuo kro se süu khieki kezhü ngulie; tekuo kroko dzükhou sünu nu krieyakezha la. Dzükhou kege ketsie kezha puo.

³Mu tekuo kroko pete vo sünu kengulie ro, kuopfheko vo ketsie ketouwa di dzü pie tekuoko bu krielieya, sidi ketsieu chüpie dzükhou-u ge lawawaya.

⁴Sitse Jakob sie uko üse, “A kezeko, nieko kirapuonu vor ga?” ishü. Uko sie, “Hieko Haran nunu vorwe” ishü.

⁵Puo uko ki, “Nieko Nahor nuou Laban si me?” sishü; ru uko “Hieko puo siwe” ita.

⁶Süsie puo uko üse, “Puo vi ba zo nhie?” sishü uko sie, “Uwe, mu harie puo nuopfü Rachel tekuo ze di vorzhie” sita.

⁷Sitse puo uko ki, “Harie, khinhieluo zoluo, tekuoko khaketuo tei moluo; nieko vo dzü pie tekuoko bu krielie, di uko bu vo nhacü la tuotacie” sishü.

⁸Derei uko sie, “Tekuo kro pete vor tseilie kemochie silie suolie, sikelie ze dzükhou kege tsieu phou ketoushü di hieko dzü pie tekuoko tsüshüya” ita.

⁹Puo uko ze kerüchü ketha nu Rachel-e puo puo kuoko ze di vor; puo süko pfheya.

¹⁰Sitse Jakob sü puo zuo prüu Laban nuopfü Rachel mu puo prüu kuoko ngushü tse, phi di dzükhou kege tsieu ketouwa, di dzüpie puo zuo prüu Laban kuoko bu krielie.

¹¹Süsie Jakob-e Rachel meboshü di kra peto parta.

¹²Sidi Jakob-e Rachel ki puoe puo puo seyiemiaü mu puoe Rebeka nuou ücü pushü. Sitse süpfü ta vo di puo puo ki pushü.

¹³Siro Laban puo üpfü nuou Jakob dze silie tse puo ze kesetuoü di ta vor, di puo meboshü, sidi puo ze puo kinu vorlie. Jakob-e Laban ki mha hako pete pushü tse,

¹⁴Laban puo ki, “No sü a ru mu a chü ketho zo” ita. Sidi puo thekhrü puo sünu puo ze bata.

¹⁵Süsie Laban-e Jakob ki, “No a siezedzüriemia üdi n bu methuo a lie chü ba zotuo memu? Kedipuo pie n zha chütuo shi se a ki pushücie” ita.

¹⁶Laban-e puo nuo rüümia kenie ba; phichüpfü za Leah mu nhicupfü za Rachel.

¹⁷Leah mhi zivi phi, derei Rachel-e ngupie menenuoi mu mia neipfü.

¹⁸Jakob-e Rachel ngu puo nei, süla puo sie, “A n nuo nhicupfü Rachel la cie thenie n lie chüshütuo” ishü.

¹⁹Sitse Laban sie, “Puo pie mia kekreimia ketsüu ki n ketsü we vikuo, süla a ze batalie” sita.

²⁰Siro Jakob-e cie thenie Rachel la mhachü; derei puo süpfü ngu puo neicü la puo mhodzü ki süko zha keduo yopuo mhie zo.

²¹Süsie Jakob Laban üse, “A tei tseite ru a kimia khashü a tsücie, a bu puo ki volieketuo la” sishü.

²²Süla Laban-e thechü sünu keba pete kie kengulie di thehe puo chüshü.

²³Derei thevatie puoe puo nuopfü Leah ze vor Jakob tsüwa; sidi puo bu süpfü ki vowa.

²⁴Laban-e puo kituopfü Zilpa pie puo nuopfü Leah bu puo kituopfü chülienu di khashü.

²⁵Süsie teisolie tse, harie, Leah takecü ngulie; süla Jakob-e sie Laban ki, “No a gei chükeshü hau kedipuota ga? A Rachel la n lie chü vor mo me, siro no kiüdi a sewata ga?” ita.

²⁶Laban sie, “Hauha hie kijü nu chüya molie, phichüpfü mhodzü nhicupfü nyhükecü.

²⁷Zhadoudo hau bu tseitaliecie, mu no kekreipfü la rei cie thenie a lie chü sa ro khashü n tsütuo” ita.

²⁸Jakob-e sikecü chüwa, mu süpfü zhadoudo-u tseita tse, Laban puo nuopfü khapie puo kimia chüwa.

²⁹Laban-e puo kituopfü Bilha bu puo nuopfü Rachel kituo chülienu di pie puo tsüshü.

³⁰Siro puo Rachel ki rei vo, mu puo Leah ki rei Rachel puo neikuo, sidi puo teicie kekrei thenie Laban lie chü la.

³¹Jihovae puo Leah khrie mokecü ngushü tse, Leah nuobvü khrüshü derei Rachel bu nuojüpfü puo chüta.

³²Sidi Leah nuonipfülie di thepfunuomia puo penuolie, mu puo süu za thopie Reuben[34] chülie; puo sie, “Jihova a mezhieko mehoshüte; tsiewe a nupfu a ngu puo neitatuo” isi.

³³Puo nuonipfü lalie di thepfumia puo penuolie; ru sie, “Jihova mia a ngumecükecü sishüte, puo süla nuo hau rei kha sapie a tsü zo” ita, sidi puo süu za thopie Simeon chülie.

³⁴Siro puo nuonipfü lalie di thepfumia puo penuo lalie ru sie, “Tsiewe a nupfu a ze kekutatuo,[35] a thepfumia se penuoshü puo tsüte ru,” ita. Sidi puo süu za thopie Levi chülie.

³⁵Siro puo nuonipfü lalie di thepfumia puo penuolie, sitse puo, “Tsiewe a Jihova tshetuo”,[36] idi puo nuo za thopie Juda chülie; süsie puo nuoze sa mota.